1. TOEKENNING

Besonderhede van die Norme-en-standaardetoekenning (N&S) vir u skool vir die finansiële jaar wat strek vanaf 1 April 2012 tot 31 Maart 2013 het op SOBIS verskyn. Skole kan toegang daartoe verkry deur die volgende te doen:

  • Log aan op SOBIS.
  • Daar is 'n boodskap op een van die eerste skerms wat die prosedure aanbeveel.
  • Kliek “Proceed”. Beweeg die pyltjie oor die "Administration"-keuse-item op SOBIS en kliek op "Norms and Standards Allocation".
  • Druk asseblief die bladsy.

U aandag word op die volgende gevestig:

1.1 Toekennings word bereken ooreenkomstig die voorskrifte in paragraaf 108 tot 113 van die Nasionale Norme en Standaarde vir Skoolbefondsing (NNSSB) (in Staatskoerant 29179 van 31 Augustus 2006).

Ooreenkomstig paragraaf 109 van die NNSSB moet die provinsiale onderwysdepartemente die nasionale armoedeverspreidingstabel (armoedetabel) gebruik om te bepaal hoe die teikenbedrae in elke provinsie toegewys moet word. Die gewysigde tabel hieronder gee 'n aanduiding van die persentasie van leerders in die Wes-Kaap wat in die verskillende nasionale kwintiele (NK's) geplaas mag word.

  NK1 NK2 NK3 NK4 NK5 Totaal
Nasionaal 20% 20% 20% 20% 20% 100%
Wes-Kaap 9.5% 13.6% 16.9% 22.1% 37.9% 100%
1.2 Die toekenningsbrief sluit in die toekenning vir 2012/13 asook voorlopige toekennings vir die volgende twee boekjare, nl. 2013/14 en 2014/15. Alle toekennings is bereken op grond van die inskrywings van die 2011 Jaarlikse Opname van Skole (JOS).
1.3 Vir nie-artikel 21-skole, moet die fondse wat ingevolge hierdie Omsendbrief toegeken word, teen 31 Maart 2013 bestee word.

2. BETALINGSKEDULE
2.1 Skoolgeldvorderende skole
2.1.1 Nie-artikel 21-skole moet voor 29 Februarie 2012 hulle N&S-toekenning vir die finansiële jaar eindigende 31 Maart 2013 op vorm WKOD 032 indeel in die vier kategorieë, naamlik leer- en onderrigondersteuningsmateriaal (LOOM), plaaslike aankope, munisipale dienste en instandhouding. By ontvangs van die voltooide WKOD 032-vorm sal die WKOD die begrotings noukeurig bestudeer. Skole sal verwittig word indien hulle vorms nie in orde is nie sodat hulle hersiene WKOD 032-vorms kan indien.
2.2 Geenskoolgeldskole
2.2.1 Vir nie-artikel 21-skole, sal 20% van die totale N&S-toekenning, wat geag word die jaarlikse skoolfondsinkomste te wees, in April/Mei 2012 aan skole oorbetaal word. Skole sal van hierdie bedrag ingelig word in die N&S-toekenningsbrief. Daar moet daarop gelet word dat die bedrag die skool moet deursien tot April 2013 wanneer betaling vir die volgende finansiële jaar ontvang sal word. Nie-artikel 21-skole moet voor 29 Februarie 2012 hulle oorblywende N&S-toekenning vir die finansiële jaar eindigende 31 Maart 2013 op vorm WKOD 032 in die vier kategorieë (kyk paragraaf 2.1.1 hierbo) indeel voor 29 Februarie 2012.
2.2.2 Daarbenewens sal die oordragbetalings aan alle nie-artikel 21-skole vir instandhouding, en vir munisipale dienste (vir daardie skole wat hulle eie munisipalediensterekeninge betaal), soos volg betaal word: 50% van die begrote bedrae sal in April/Mei 2012 betaal word en die oorblywende 50% in November 2012.

3. GEBRUIK VAN DIE TOEKENNING
3.1 Die N&S-toekenning is bedoel hoofsaaklik vir leer- en onderrigondersteuningsmateriaal- (LOOM-), plaaslike aankope, munisipale dienste, noodsaaklike dag-tot-dag instandhouding van skoolgeboue, terreine en toerusting (niegeskeduleerde instandhouding), en ander lopende uitgawes. Eie inkomste, soos bedoel in paragraaf 5, moet eers gebruik word om tekorte in bogenoemde verband te dek voordat dit aangewend word vir die finansiering van beheerliggaamposte.

Daar word voorgestel dat skole hulle beskikbare toekenning soos volg tussen die onderskeie uitgawekategorieë verdeel:

  • 50% vir LOOM bestellings vir 2013 waarvan 10% spesifiek vir biblioteekmateriaal gereserveer moet wees. Elke leerder moet 'n handboek vir elke leerarea/vak hê. Die voorraad skoolbiblioteekmateriaal moet jaarliks aangevul word totdat die totale aantal items die minimum van die internasionale standaarde van 10 items per leerder weerspieël. Sien paragraaf 3.1.1 hieronder vir die lys van items wat onder LOOM val;
  • 24% vir munisipale dienste. Skole kan egter begroot vir 'n groter persentasie as uitgawe-tendense dit vereis, bv.
  • 6% vir instandhouding, en
  • 20% vir plaaslike aankope.
3.1.1 Leer- en onderrigondersteuningsmateriaal (LOOM)

  a. Die Departement van Basiese Onderwys (DBO) definieer LOOM as enige materiaal wat onderrig en leer direk in die klaskamer of by die huis (huiswerk) ondersteun en fasiliteer. Dit sluit die volgende in:

  • Handboeke, leesboeke, naslaanboeke, voorgeskrewe werke, atlasse en woordeboeke;
  • Werkboeke;
  • Plakkate en land- en muurkaarte;
  • Opvoedkundige bordspeletjies;
  • Biblioteekmateriaal (fiksie en niefiksie, naslaanboeke, videos wat vooraf opgeneem is, DVD's, oudiokassette, CD's, CD-ROM.s, multimedia, ens.);
  • Rekenaarsagteware en lisensies;
  • Hulpbronmateriaal vir onderwysers, leerders, klaskamer en biblioteek.
  b. Van skole word verwag om hulle volle LOOM-toekenning te gebruik vir die aankoop van LOOM wat die implementering van die Kurrikulum-en-assesseringsbeleidsverklarings (KABV) in hulle klaskamers sal verryk en versterk. Skole word dus aangemoedig om hulle LOOM-toekenning te benut vir die aankoop van handboeke, voorgeskrewe werke, atlasse, woordeboeke, plakkate, kaarte, muurkaarte, opvoedkundige bordspeletjies, biblioteekmateriaal (fiksie en niefiksie, naslaanboeke, video-opnames, DVD's, oudiokassette, CD's, CD-ROM's en rekenaarsagteware.
  c. Onderhewig aan die volgende voorwaardes, kan skole minder geld aan LOOM toeken indien:

  • elke leerder in die skool 'n handboek vir elke leerarea of vak en toegang tot ander LOOM-hulpbronne het; en
  • die skool jaarliks 10% van die LOOM-toekenning vir die aankoop van biblioteekmateriaal gebruik het om die biblioteekvoorraad aan te vul en die totale aantal items in die biblioteekvoorraad nou bestaan uit die minimum internasionale standaard van 10 items per leerder; en
  • die beheerliggaam 'n formele besluit aangaande die afwyking geneem het. (Hierdie besluit van die beheerliggaam rakende die begroting wat aan 'n ouervergadering voorgele word, moet verduidelik word en die bedrag wat per leerder aan LOOM bestee is, moet voorsien word. Hierdie besluit moet by die ouervergadering voorgele word, ongeag of dit deur die IBB-bestuurder ondersteun word of nie.
  d. Ooreenkomstig die Provinsiale Tesourie-instruksies, sal die WKOD die LOOM-aanvrae van alle nie-artikel 21-skole adverteer op die Elektroniese Aankoopstelsel (SourceLink) wat deur Quadrem Tradeworld bestuur word. Hierdie stelsel laat toe vir kompeterende bieëry ooreenkomstig die Wet op die Beleid vir Voorkeurverkrygingsraamwerk (Wet 5 van 2000). Sodoende kan voornemende verskaffers hulle kwotasies voorlê vir oorweging deur die WKOD.
  e. Hoe om LOOM te verkry

  • Nie-artikel 21-skole moet die voorgeskrewe prosedures in Bylae A volg.

  • Skole moet alle Grondslagfase- en graad 10 KABV-handboeke kies uit die goedgekeurde nasionale katalogus (verwys na DIH) Minuut 0004/2011 en 0005/2011)wanneer hulle addisionele LOOM-bestellings plaas.

  • Die voorgeskrewe letterkundeboeke moet gekies word uit die aanbevole lys van voorgeskrewe boeke wat onder skole gesirkuleer is.

  • Wanneer skole skoolbiblioteekmateriaal kies, moet hulle in verbinding tree met die EDULIS-koördineerder: Skoolbiblioteekdienste, mev. Theresa de Young (tel. 021 957 9638) vir hulp met die kies van die soeke na en aankoop van aanbevole titels. Die distrik se skoolbiblioteekadviseur en/of bronne-sentrumkoördineerder kan ook in verband met die ontwikkeling van hul biblioteke gekontak word.
3.1.2 Munisipale Dienste

  1. Die N&S-toekenning aan skole is bedoel vir die betaling van, onder andere, hulle maandelikse munisipalediensterekeninge, bv. elektrisiteit, water, riool en vullisverwydering, maar sluit die betaling van eiendomsbelasting uit. Soos in die verlede, sal die Staat die eiendomsbelasting op eiendom wat in die naam van die RSA geregistreer is, betaal.
  2. Enkele skole het aangedui dat hulle nie hulle eie munisipale dienste wil bestuur nie en hulle rekeninge sal steeds deur die betrokke distrikskantore betaal word. Die distriksbeamptes sal elke maand vir elke skool voorsien van afskrifte van sy rekeninge sodat hulle nagegaan kan word en daar bevestig kan word dat die rekeninge korrek is. Die WKOD 032-bedrag verteenwoordig dit waarvoor die WKOD aanspreeklik sal wees en dit sal gebruik word om te betaal vir munispale dienste. Skole sal aanspreeklik wees vir die vereffening van enige munisipale skuld aangegaan meer as waaarvoor begroot is. Skole sal ook moet begroot vir addisionele munisipale uitgawes, rekeninge wat tans deur die WKOD aan skole gepos word (211...rekeningreeks), sowel as vir die ou rekeninge wat tans deur skole ontvang word.
  3. Nie-artikel 21-skole moet aan die hand van vorige jare se uitgawes aan hierdie dienste, die bedrag bereken wat hulle opsy sit vir munisipale dienste en dit op die WKOD 032-vorm aandui. Hierdie bedrag, en die skole se instandhoudingsgelde, sal gelyktydig betaal word aan daardie skole wat die funksie aanvaar het.
  4. Skole moet steeds, onder andere, die besparingsmaatreëls wat in Bylae B aangedui word, toepas.
  5. ESKOM en die meeste munisipaliteite het aangedui dat hulle meters vir voorafbetaalde elektrisiteit aan skole beskikbaar kan stel. Dit sal skole in staat stel om hulle elektrisiteitsverbruik beter te beheer.
  6. Waar dit onder die aandag van die departement kom dat skole nie hulle munisipale rekeninge vereffen nie, behou die WKOD die reg voor om fondse wat aan daardie skole toegeken is, agterweë te hou vir daardie doel.
3.1.3 Dag-tot-dag instandhouding

  1. Dag-tot-dag instandhouding sluit in die instandhouding van die terrein asook die instandhouding, skoonmaak, opknap, herstel en/of vervanging van spesifieke gedeeltes van skoolgeboue. Gereelde instandhouding moet gedoen word om te verhoed dat skoolgeboue agteruitgaan en noodherstelwerk a.g.v. verwaarlosing nodig het.
  2. Waar die N&S-toekenning vir dag-tot-dag onderhoud onvoldoende is, word van skole verwag om die toekenning aan te vul vanuit eie skoolfondse, waar nodig. Skole moet begroot vir dag-tot-dag instandhouding na gelang van die toestand van hulle geboue en terreine. Die N&S-toekenning vir dag-tot-dag instandhouding kan ontoereikend wees. In sodanige gevalle behoort skole, waar toepaslik, die toekenning uit die skoolfonds aan te vul.
  3. Skole moet 'n bedrag van sy jaarlikse toekenning vir dag-tot-dag instandhouding terughou vir die instandhouding van toerusting wat gebruik word om die skoolterrein te verfraai, bv. onderhoud van die grassnyer, die aankoop van verf vir banke op die skoolterrein, en die aankoop van kalk en kunsmis.
  4. N&S-toekennings mag nie gebruik word vir dag-tot-dag herstelwerk aan koshuise nie. Sodanige herstelwerk moet befonds word uit leerders se losiesgeld en -beurse.
3.2 Skole moet toekennings vir die instandhouding van geboue, terreine en toerusting as 'n enkelbedrag op die WKOD 032-vorm aandui.
3.3 Die WKOD aanvaar nie aanspreeklikheid vir die betaling van uitgawes waar skole meer bestee as die bedrag wat aan hulle vir hierdie doel toegeken is nie. Skole sal self hierdie uitgawes moet dek. Indien, om welke rede ookal, nie-artikel 21-skole hulle N&S-toekennings oorskry, sal die WKOD enige oorbesteding van die daaropvolgende finansiële jaar se N&S-toekenning van die skool verhaal. Dit moet nie gesien word as 'n aanmoediging om N&S-toekennings te oorskry nie.

4. GROOT NOODHERSTELWERK

Ingevolge paragraaf 97 van die NNSSB aanvaar die WKOD verantwoordelikheid vir groot noodherstelwerk aan geboue, onderhewig aan die beskikbaarheid van fondse wat vir hierdie doel beskikbaar is. Die volgende herstelwerk sal ooreenkomstig die prosedures in Omsendbrief 175/2000 oorweeg word:

KATEGORIE A

Ernstige skade as gevolg van natuurrampe, strukturele probleme en brande

Die WKOD sal verantwoordelikheid vir sodanige noodherstelwerk aanvaar slegs as die koste meer as R5 000 beloop en op voorwaarde dat voldoende fondse beskikbaar is.
Die WKOD sal, volgens eie diskresie, dit oorweeg om 'n oordragbetaling te maak vir materiaal in betreklik minder ernstige gevalle.


5. EIE INKOMSTE

Ingevolge artikel 36(1) van die Suid-Afrikaanse Skolewet (Wet 84 van 1996) (SASW) soos gewysig, moet skoolbeheerliggame (SBL.e) alle redelike stappe doen om die staatshulpbronne aan te vul ten einde die gehalte van onderwys wat deur die skool aan alle leerders by die skool voorsien word, te verbeter. Geenskoolgeldskole mag nie verpligte skoolgeld (insluitende registrasiegelde) hef nie. Hulle word egter aangemoedig om vrywillige bydraes te soek en by fondsinsamelingsfunksies betrokke te raak.


6. VERSLAGDOENING
6.1 Die goedgekeurde begroting van die skool moet jaarliks teen 1 Desember by die betrokke distrikskantoor ingedien word.
6.2 Alle skole moet 'n WKOD 043-vorm (kwartaalverslag) indien by die betrokke distrikskantoor binne 30 dae na die einde van elke kwartaal (uitgawe tot 31 Maart, 30 Junie, 30 September en 31 Desember). Fondse sal slegs aan skole oorbetaal word indien bevredigende WKOD 043-verslae aangaande die finansiële aktiwiteite van vorige kwartale ontvang is. ooreenkomstig artikel 43(5) mnvan die SASW, waarvolgens skole „n kopie van hulle geouditeerde stel finansiële state ingevolge artikel 43 van die SASW) vir die vorige finansiële jaar teen 30 Junie van elke jaar moet voorlê (vir aandag van die betrokke distrikskantoordirekteur).

7. VERDERE VOORWAARDES
7.1 Die SBL moet behoorlike beheer oor inkomste en besteding uitoefen soos uiteengesit in die Handleiding: Basiese Finansiële Stelsel vir Skole. Indien die lede van die SBL nie oor die nodige kundigheid beskik om hierdie funksie te verrig nie, moet hulle iemand koöpteer wat hulle kan help.
7.2 Alle skoolfondse afkomstig van die Staatstoekenning sowel as eie inkomste, moet aangewend word vir doeleindes wat direk met onderwys verband hou, soos bepaal in artikel 37(6) van die SASW, en veral vir die aankoop van LOOM. Ingevolge WKOD-beleid mag handboeke en leesboeke nie gefotokopieer word nie aangesien dit neerkom op skending van die Wet op Kopiereg, 1978 (Wet 98 van 1978).
7.3 Die WKOD het die reg om skoolfondsrekords te ondersoek en op te tree teen enige lid van die personeel of SBL indien hy of sy betrokke is by die wanadministrasie van skoolfondse. Skole moet alle bewyse van inkomste en uitgawes vir hierdie doel bewaar.

8. AANSOEK OM ARTIKEL 21-STATUS

Aansoeke om te verander van nie-artikel 21-status na artikel 21-status moet voor 25 Februarie 2012 op die aangehegte aansoekvorm (Bylae C) ingedien word. Suksesvolle skole sal eers vanaf die aanvang van die daaropvolgende finansiële jaar artikel 21-status ontvang, d.w.s. met ingang van 1 April 2012.


9. APPÈLLE
9.1 Leerdergetalle

Indien die leerderinskrywing, gebaseer op die 2012-10de dag-opname, aan die begin van die nuwe (2012) skooljaar met meer as 7% toeneem of daal in vergelyking met die 2011 JOS- inskrywing, sal die N&S-toekennings aangepas word met die toename wat die 7% oorskry. Gewysigde toekenningsbriewe sal teen Maart 2012 aan skole gestuur word.


10. 2011/12-TOEKENNING

Die fondse wat ingevolge Omsendbrief 0037/2010 aan skole toegeken is, moet voor 31 Maart 2012 deur skole bestee word.


11. KONTAKNOMMERS VIR NAVRAE

Onderwerp Naam Telefoonnr
WKOD 043-kwartaalverslae en geouditeerde finansiële jaarstate Distrikskantoor: Adjunkdirekteur: Korporatiewe Dienste Toepaslike distrikskantoor
Indien van WKOD 032 (Indeling van die N&S-toekenning) Me P Philips 021 900 7061
Aankoop van LOOM (WCED 034) en plaaslike aankope (WCED 026). Alle nie-artikel 21-skole Mnr B Le Keur
Me P Phillips
021 467 2094
021 900 7061
Oordragbetalings aan skole (N&S- toekennings) Mnr M Draai
Me L Shasha
021 467 2005
021 467 2770
Noodherstelwerk Mnr N Nepile 021 467 2578
e-Leer
EDULIS-koördineerder: Skoolbiblioteekdienste
Me T de Young
Mnr O Sadeck
021 957 9638
021 467 2351
Algemene navrae Mnr L van Wyk
Mnr J Kitshoff
Mnr R Eyssen
Fax no.
021 467 2658
021 467 2665
021 467 2662
086 568 2858


GETEKEN: LJ ELY
HOOFDIREKTEUR: FINANSIËLE BESTUUR
DATUM: 2012:01:23

Staatskoerant 29179: "Amended National Norms and Standards for School Funding"  (grootte: 891 KB)
Bylae A: Prosedure vir die verkryging van goedere en dienste  (grootte: 61 KB)
Bylae B: Besparingsmaatreëls ten opsigte van munisipale dienste  (grootte: 24 KB)
Byale C: Aansoek om Artikel-21 Status  (grootte: 17 KB)

WKOD-vorms:
The following forms are in Word® (".doc") format.
To save a form for later use, click on the "zipped" link below and follow the intructions.
If you have Word® installed on this computer, click on the "DOC" link below (the form will open in a separate window: to return to this circular, close that window)


WKOD026-vorm: Rekwisisie vir voorrade en ander benodigdhede  ("zipped" weergawe, grootte: 39 KB)
WKOD026-vorm: Rekwisisie vir voorrade en ander benodigdhede  ("DOC" weergawe, grootte: 79 KB)

WKOD032-vorm: Toekenning vir plaaslike aankope, munisipale dienste en instandhouding  ("zipped" weergawe,
grootte: 40 KB)
WKOD032-vorm: Toekenning vir plaaslike aankope, munisipale dienste en instandhouding  ("DOC" weergawe,
grootte: 80 KB)

WKOD034-vorm: Rekwisisie vir Leer- en Onderrigondersteuningsmateriaal (LOOM)  ("zipped" weergawe, grootte: 9 KB)
WKOD034-vorm: Rekwisisie vir Leer- en Onderrigondersteuningsmateriaal (LOOM)  ("DOC" weergawe, grootte: 50 KB)

The following form is in Excel® format.
To save it for later use, click on the "zipped" link below and follow the intructions.
If you have Excel® installed on this computer, click on the "XLS" link below (the form will open in a separate window: to return to this circular, close that window)


WKOD043-vorm: Kwartaalverslag  ("zipped" weergawe, grootte: 33 KB)
WKOD043-vorm: Kwartaalverslag  ("XLS" weergawe, grootte: 57 KB)