1. UKUNGENISWA KWEEFOM ZAMABANGO (SUBMISSION OF CLAIM FORMS)

Kukhunjuzwa iinqununu zezikolo ezineBakala R neentloko zamaziko ophuhliso lwemfundo yabasaqalayo (early childhood development (ECD)) ukuba kufuneka kungeniswe izicelo zenkxaso-mali kwi-ofisi yesithili semfundo yaloo ndawo sikuyo isikolo ingadlulanga le mihla ilandelayo:

Ikota I-Ofisi yeSithili seMfundo KwaNdlunkulu
IKota 1 -2012 NgoLwesihlanu, 10 Februwari 2012 NgoLwesihlanu, 24 Februwari 2012
IKota 2 -2012 NgoLwesihlanu, 18 Meyi 2012 NgoLwesihlanu, 1 Juni 2012
IKota 3-2012 NgoLwesihlanu, 17 Agasti 2012 NgoLwesihlanu, 31 Agasti 2012
IKota 4 -2012 NgoLwesihlanu, 16 Novemba 2012 NgoLwesihlanu, 30 Novemba 2012

Izikolo ezingaphumeleliyo ukulandela ngqo le mihla ingasentla zisengozini yokuphulukana nenkxaso-mali yazo. Izikolo ezifuna uncedo ngokuzaliswa kweefom zamabango enkxaso-mali zingaqhagamshelana nomphathi weze-IMG ECD kwi-ofisi yesithili semfundo esichaphazelekayo.

2. UBHALISO LWEZIKOLO KWI-EMIS NABAFUNDI BEBAKALA R KWI-CEMIS
2.1 NgokweMimiselo neMigangatho kaZwelonke yesabelo-mali samaBakala R (ISaziso sikaRhulumente 30679 sowe-18 Januwari 2008), zonke izikolo ze-ECD zikarhulumente eziqhelekileyo nezikolo ze-ECD ezizimeleyo ezifundisa iBakala R mazibhaliswe kwi-EMIS kwaye mazibe nesatifikethi sobhaliso nesisebenza ngokusemthethweni (valid). Esi satifikethi sobhaliso sisebenza ngokusemthethweni ithuba leminyaka emihlanu kuphela.
2.2 Bonke abafundi beBakala R mababhaliswe kwakhona kwiCEMIS.
2.3 Bonke ootitshala (practitioners) beBakala R mababhaliswe kwiBhunga looTitshala laseMzantsi Afrika (South African Council of Educators (SACE)). Ingcaciso engaphezulu iyafumaneka kwiziko lewebhu leSACE apha www.sace.org.za

3. IZIKOLO EZINGABIZI FIZI EZIFUNDISA IBAKALA R
3.1 Izikolo ezingabizi fizi nezifumana inkxaso-mali yeBakala R kurhulumente azivumelekanga ukuba zibize iifizi zesikolo kubafundi beBakala R (Funda kwiphepha 4 le-National Financial Management Guidelines in Respect of School Offering Grade R Classes, October 2009).
3.2 Bangacelwa abazali ukuba bafake igalelo ngokuzithandela. Kodwa ke, makugxininiswe ukuba eli galelo alisosinyanzelo kwaye malingaze lisetyenziselwe ukukhethela ecaleni (exclude) abafundi ababazali babo bangenako ukufaka igalelo elilolu hlobo.

4. INGXELO-MALI YONYAKA

NgokweSiqendu 55 soMthetho woLawulo lweMali kaRhulumente (uMthetho 29 ka-1999), onke amaziko emfundo afumana isabelo-mali kurhulumente makagcine iirekhodi ezipheleleyo nezifanelekileyo zemicimbi yemali yawo, aze qho ngonyaka angenise ingxelo-mali ephicothiweyo (audited financial statement) kwisigqeba solawulo sawo - kule meko kwiSebe leMfundo leNtshona Koloni (WCED). Ngokumalunga noku, onke amaziko e-ECD makangenise ingxelo-mali yonyaka ephicothiweyo ephathelene nonyaka wezifundo ongaphambili kwi-ofisi yesithili semfundo saloo ndawo likuyo iziko phambi kokuphela kukaMeyi ngonyaka ngamnye. Ukungaphumeleli ukwenjenjalo kuya kulibazisa intlawulo yenkxaso-mali elandelayo kwiziko elo.


5. INTLAWULO YOMVUZO KATITSHALA WEBAKALA R
5.1 Ziyakhunjuzwa izikolo ukuba ootitshala beBakala R kuzo zonke izikolo mabafumane isibonelelo esipheleleyo esiyi-80% yenkxaso-mali, esihlawulwa ngomatshini kabini ngonyaka.
5.2 Ayacelwa amabhunga olawulo ezikolo ze-NQ 4 ne-NQ 5 ukuba ongezelele umvuzo katitshala weBakala R ukwenzela ukuba utitshala lowo afumane isixa-mali esingaphezulu kowona mlinganiselo usezantsi umiselweyo oyi-R5,000.00 ngenyanga.
5.3 Ngaphezulu, iiSGB mazibhalise kwaSARS njengabaqeshi. I-UIF no-PAYE mazitsalwe kumvuzo katitshala weBakala R zize zihlawulwe kuloo masebe karhulumente achaphazelekayo.

6. INANI LABAFUNDI BEBAKALA R ABAVUMELEKILEYO KWIKLASI NGANYE

Ubalo lwakutshanje kumaziko akhethiweyo selungqinile ukuba ubukhulu beklasi yabafundi abangaphezulu kwe-30 ikuchaphazela kakubi ukufundiswa okusemgangathweni kwiklasi yeBakala R. Ukususela ngoJanuwari 2012, iCAPS iya kuphunyezwa kwiiklasi zeBakala R yaye ke ngoko ziyakhunjuzwa izikolo ukuba elona nani likhulu labafundi beBakala R livumelekileyo kwiklasi nganye ngu-30.

7. UKUCHITHWA KWEMALI YE-LTSM

Yonke imali efikileyo yeLTSM (i-20%) yeekota ezimbini mayisetyenziswe lingekapheli elo thuba yaye isetyenziselwe kuphela injongo yokuthenga i-LTSM

8. Okubhalwe kule setyhula makwaziswe bonke abachaphazelekayo kwi-ECD kwizikolo zikarhulumente nakwizikolo ezizimeleyo.


ISAYINWE: NGU-PA VINJEVOLD
INTLOKO: YESEBE LEMFUNDO
UMHLA: 2011:11:30