Kunikwe imvume yokwandiswa kwenxaso-mali yomfundi ngamnye kubafundi abakwiiklasi ezivunyiweyo zeBakala R kwizikolo zikarhulumente eziqhelekileyo nakwizikolo ezizimeleyo zophuhliso lwemfundo yabasaqalayo (early childhood development (ECD)) ukuqalela emva kowe-1 Apreli 2011. Inkxaso-mali eyabelwa umfundi ngamnye ngosuku yandiswe ngolu hlobo lulandelayo:

Inkxaso-mali yezikolo zikarhulumente eziqhelekileyo zasemaphandleni ezifanele ukufumana inkxaso-mali inyusiwe yaya kutsho kwi-R60,000 ngonyaka.

Isabelo sokuqala sale nkxaso-mali siya kuhlawulwa ngo-Apreli, size isabelo sesibini sihlawulwe ngo-Oktobha.

Ziyakhunjuzwa iinqununu zezikolo zikarhulumente eziqhelekileyo neentloko zezikolo ezizimeleyo ukuba iifom zebango lenkxaso-mali yeBakala R, iziHlomelo A, B no-C, mazizaliswe ngokuchanekileyo yaye zisayinwe phambi kokuba zingeniswe kwi-ofisi yesithili semfundo. Makungeniswe kwakhona iikopi zerejista yokuhamba isikolo, ingxelo yeCEMIS neerisithi zokuthenga izinto zokuncedisa ukufunda nokufundisa (learning and teaching support materials (LTSM)).

Iifom ezingazaliswanga ngokupheleleyo (okanye iifom ezingeniswe ngqo kwaNdlunkulu) ziya kuphindiselwa emva, nto leyo ngokuqinisekileyo eya kukhokelela ekulibazisekeni kwenkqubo yokuvunywa nokuhlawulwa kwamabango.

Izicelo zenkxaso-mali zaqho ngekota ngo-2011-2012 mazingeniswe kwii-ofisi zezithili zemfundo ingadlulanga le mihla ilandelayo:

Izikolo zikarhulumente eziqhelekileyo nezikolo ezizimeleyo ezingayilandelanga le mihla ingasentla zisemngciphekweni wokuphulukana nezi nkxaso-mali.

Izikolo ezifuna uncedo malunga nokuzaliswa kweefom zamabango enkxaso-mali maziqhagamshelane nomphathi we-IMG ECD kwi-ofisi yesithili semfundo sazo.

Kusafika nangoku intlaninge yemibuzo emalunga nemivuzo yabasebenzi abangezotitshala beBakala R. ISebe iWCED linqwenela ukugxininisa kwakhona ukuba intlawulo yomvuzo wabasebenzi abangezotitshala beBakala (ngaphandle kwabo basebenzi abangezotitshala abakwinani lezithuba ezabelwe iSebe i-WCED) luxanduva lwebhunga lolawulo elichaphazelekayo. Ngako oko ke, kunyanzelekile ukuba ibhunga lolawulo lesikolo lenze imvumelwano nomsebenzi ngamnye ongeyotitshala weBakala R ecacisa gca umvuzo neemeko zengqesho zaloo msebenzi ngamnye ongeyotitshala.

ISebe leMfundo esiSiseko likazwelonke liye lavakalisa ukuba, ukuqalela nge-1 Apreli 2011, owona mvuzo usezantsi womsebenzi ongeyotitshala weBakala R mawube yi-R5,000 ngenyanga. Ziyakhunjuzwa izikolo ukuba i-80% yesabelo senkxaso-mali imele ukusetyenziselwa umvuzo wabasebenzi abangezotitshala nokuba kufuneka amabhunga olawulo ezikolo afake igalelo ekuhlawulweni komvuzo womsebenzi ongeyotitshala. I-20% eshiyekileyo yesabelo senkxaso-mali imele ukusetyenziselwa ukuthenga i-LTSM.

Ukwenzelwa ukuthintela nakuphi na ukuhlawulwa kwemivuzo emincinane, ziyacelwa izikolo ukuba zisebenzise ingcaciso ekwisiHlomelo A zize kwakhona ziqhagamshelane namagosa ee-ofisi zezithili zemfundo ukuba zisafuna uncedo ngokubalwa ngokuchanekileyo komvuzo womsebenzi ongeyotitshala wazo.

IsiCwangciso eSenziwe ngosoBuchule seSebe leMfundo esiSiseko likazwelonke sika-2011-2014 sicacisa ngokuqaliswa kwenkqubo yeNkcazo yoMgaqo-nkqubo woVavanyo lweKharityhulam (Curriculum Assessment Policy Statement (CAPS)) kuzo zonke izikolo nokubonelela ngeLTSM yokuyiphumeza. Ukwenzela ukuba kube nokuhlangatyezwana nemfuneko yale LTSM kwiiklasi zeBakala R, izikolo zabonelelwa ngenkxaso-mali ebekelwe ukuthenga ezi zibonelelo. Ziyacelwa izikolo ukuba ziqinisekise ukuba iLTSM ethengelwe abafundi beBakala R iya kunceda ekuphuhliseni ulwazi lokufunda nokubhala nolwazi lokubala lwabo.