1. Omsendbriewe 0224/2003, 0033/2010 en 0034/2010 het betrekking.

2. Onderwysinrigtings is voorsien van hulle goedgekeurde personeeldiensstate vir 2011 onder dekking van Omsendbrief 0033/2010 en 0034/2010, terwyl die proses vir die plasing van botallige opvoeders oorgedra is in Omsendbrief 0224/2003

3. Die nasionale Departement van Basiese Onderwys vereis dat voorkeur gegee word an die plasing van Funza Lushaka-beurshouers en botallige opvoeders (in daardie volgorde) in vakante substantiewe opvoederposte voor oorweging geskenk word aan die werwing van ander geskikte opvoeders wat werkloos is.

4. Om te verseker dat voorkeur verleen word aan die plasing van Funza Lushaka-beurshouers en botallige opvoeders in vakante substantiewe poste, sal die volgende maatreëls van toepassing wees van 1 April 2011:
4.1 Die magtiging vir die goedkeuring van die aanstelling van opvoeders op 'n kontrakbasis vir 'n geslote periode sal gesetel wees in kringspanbestuurders in diens van die WKOD. Kringspanbestuurders mag die aanstelling van opvoeders op 'n kontrakbasis in die skole waarvoor hulle verantwoordelik is slegs vir 'n geslote periode goedkeur.
4.2 Die vul van alle Posvlak 1-poste is dus onderhewig aan die vooraf goedkeuring van die kringspanbestuurder wat vir die skool verantwoordelik is. Dit beteken ook dat nominasies vir die aanstelling van opvoeders op 'n kontrakbasis van 1 April 2011 af aan die kringspanbestuurder voorgelê moet word en nie aan die Hoofkantoor van die WKOD nie.
4.3 Voorkeur moet verleen word aan die herindiensneming van botallige opvoeders en/of die plasing van Funza Lushaka-beurshouers wanneer Posvlak 1-poste op 'n kontrakbasis gevul word en voor sodanige poste as vakant in die Departement se vakaturelys geadverteer mag word. In hierdie opsig sal dit ook nodig wees vir hoofde van onderwysinrigtings om vakante poste en poste wat vakant raak so vroeg as moontlik by hulle kringspanbestuurder te registreer.
4.4 Ander geskikte gekwalifiseerde werklose opvoeders mag oorweeg word vir aanstelling in 'n vakante substantiewe pos slegs in afwesigheid van geskikte gekwalifiseerde botallige opvoeders en/of Funza Lushaka-beurshouers.
4.5 Waar kringspanbestuurders en hoofde van inrigtings nie 'n pos kan vul met 'n botallige opvoeder of 'n Funza Lushaka-beurshouer nie, kan die kringspanbestuurder die aanstelling van 'n werklose opvoeder in die vakante substantiewe pos goedkeur. In sulke omstandighede moet die kring-spanbestuurder verklaar dat geen botallige opvoeder of Funza Lushaka-beurshouer vir die aanstelling beskikbaar is nie.
4.6 Kringspanbestuurders mag ook oorplasings na ander skole goedkeur (sonder om die versoek om 'n oorplasing na die Hoofkantoor te verwys) in gevalle waar die oorplasing die proses van herontplooiing sal bevorder, d.w.s. waar die oorplasing die herontplooiing van 'n botallige opvoeder in 'n vakante substantiewe pos sal veroorsaak en so die botallige status van die betrokke opvoeder sal verwyder. Hierdie maatreël is ook van toepassing in gevalle van die plasing van Funza Lushaka-beurshouers waar die oorplasing sodanige beurshouer in staat sal stel om in die vakante pos aangestel te word a.g.v. die oorplasing.

5. U samewerking in hierdie verband sal hoog op prys gestel word.


GETEKEN: PA VINJEVOLD
HOOF: ONDERWYS
DATUM: 2011:03:28