1. Die aangehegte rooster vir die Junie 2011 BOOV Vlak 4-eksamen is so pas ontvang van die Departement van Hoër Onderwys en Opleiding (DHOO). Die eksamens sal 'n aanvang neem op 30 Mei 2011 en eindig op 23 Junie 2011. Alle eksamensessies sal op 14:00 begin. Versuim om te hou by die eksamenrooster se datums en tye sal as 'n onreëlmatigheid beskou word.

2. Gehalteversekering van eksamenprosedures is noodsaaklik om die geloofwaardigheid van die eksamens te verseker. Dit sal onaangekondigde besoeke aan die eksamensentrums insluit om te verseker dat alle eksamens afgeneem word ooreenkomstig die toepaslike regulasies. Verteenwoordigers van die WKOD, Umalusi en die DHOO sal die eksamenprosedures by die eksamensentrums moniteer. Let daarop dat monitors toegelaat kan word om 'n eksamen te moniteer slegs indien hulle bewys van identiteit en 'n magtigingsbrief om 'n eksamen namens die betrokke kantoor te moniteer kan vertoon.

3. Indien 'n sentrum se eksamens op die terrein van 'n hoofstroomskool afgelê word, moet die sentrumbestuurder vooraf reëlings tref vir die gebruik van die kluis, die administratiewe afdeling, klaskamers, ablusiegeriewe, ens.

4. Die sentrumbestuurder moet alle administratiewe kwessies met betrekking tot die eksamens bestuur en moet dus by die eksamensentrum wees voor die begin en aan die einde van elke eksamensessie.

5. Die opsieners wat betrokke was by die November 2010 BOOV-eksamens sal weer gebruik word om in die Junie-eksamens van 2011 toesig te hou, soos in hulle kontrakte bepaal.

6. Geen kandidaat mag toegelaat word in die eksamenlokaal tensy hy of sy 'n toelatingsbrief en 'n identiteitsdokument kan toon nie.

7. Die hoofopsiener moet seker maak dat kandidate die eksamenlokaal binnegaan 35 minute voor die amptelike aanvangstyd van die eksamensessie. Hierdie tyd moet soos volg gebruik word:
7.1 Die eerste 25 minute moet gebruik word om die kandidate in hulle korrekte sitplekke te laat sit, om die vraestelle uit te deel, om die instruksies deur te lees, ens.
7.2 Gedurende die volgende 10 minute mag die kandidate die vraestelle deurlees.
7.3 Niemand mag skryf of aantekeninge maak gedurende enige deel van hierdie 35 minute nie. Enige oortreding van hierdie reël sal as 'n onreëlmatigheid beskou word.
7.4 Kandidate moet ophou skryf op die tyd wat op die eksamenrooster aangedui word.

8. Sentrumbestuurders word versoek om:
8.1 aan al hulle opvoeders en kandidate roosters te verskaf so gou as moontlik, om hulle toe te laat om hulle finale voorbereidings vir die eksamen te tref; en
8.2 al hulle kandidate daaraan te herinner dat hulle identiteitsdokumente en toelatingsbriewe getoon moet word voor die aanvang van elke eksamensessie om enige identiteitsbedrog te voorkom. Let op dat indien 'n kandidaat toegelaat word om eksamen te skryf sonder 'n geldige identiteitsdokument en toelatingsbrief, hy of sy bewys van identiteit moet verskaf binne 24 uur. Versuim om dit te doen sal 'n onreëlmatigheid in die eksamen wees.

9. Bring asseblief die inhoud van hierdie omsendbrief onder die aandag van alle betrokkenes.


GETEKEN: PA VINJEVOLD
HOOF: ONDERWYS
DATUM: 2011:03:10

BOOV VLAK4 Eksamen rooster: Junie 2011  (grootte: 78 KB)