1. VOORLEGGING VAN EISVORMS

Prinsipale van skole met graad R en hoofde van inrigtings vir vroeëkindontwikkeling (VKO) word daaraan herinner dat aansoeke om subsidies voorgelê moet word aan die plaaslike onderwysdistrikskantoor teen die volgende datums:

Kwartaal Distrikskantoor Hoofkantoor
1ste Kwartaal van 2012 Vrydag, 10 Februarie 2012 Vrydag, 24 Februarie 2012
2de Kwartaal van 2012 Vrydag, 18 Mei 2012 Vrydag, 1 Junie 2012
3de Kwartaal van 2012 Vrydag, 17 Augustus 2012 Vrydag, 31 Augustus 2012
4de Kwartaal van 2012 Vrydag, 16 November 2012 Vrydag, 30 November 2012

Inrigtings wat nie by die bogenoemde datums hou nie, loop die risiko dat hulle hulle subsidies kan verloor. Skole wat bystand verlang met die voltooiing van die subsidie-eisvorms kan die IBB VKO-bestuurder by die relevante onderwysdistrikskantoor skakel.

2. REGISTRASIE VAN SKOLE OP OBIS & GRAAD R-LEERDERS OP OBIS
2.1 Ingevolge die nasionale Norme-en-standaarde vir graad R-befondsing (Regeringskennisgewing No. 30679 van 18 January 2008), moet alle gewone openbare en onafhanklike VKO-skole wat graad R aanbied op OBIS geregistreer wees en in besit wees van 'n geldige registrasiesertifikaat. Hierdie sertifikaat is vir slegs vyf jaar geldig.
2.2 Alle graad R-leerders moet ook op SOBIS geregistreer wees.
2.3 Alle graad R-praktisyns moet by die Suid-Afrikaanse Raad vir Opvoeders (SARO) geregistreer wees. Meer inligting is beskikbaar op die SARO-webtuiste te www.sace.org.za

3. GEENSKOOLGELDSKOLE WAT GRAAD R AANBIED
3.1 Geenskoolgeldskole wat graad R-befondsing van die staat ontvang, mag nie skoolgeld hef vir graad R-leerders nie (Sien Nasionale Finansiële Bestuursriglyne ingevolge skole wat graad R-klasse aanbied, Oktober 2009, bladsy 4.
3.2 Ouers kan versoek word om vrywillige bydraes te maak. Daar moet egter beklemtoon word dat hierdie bydraes nie verpligtend is nie en nie gebruik mag word om leerders uit te sluit wie se ouers nie sodanige bydraes kan maak nie.

4. FINANSIËLE JAARSTATE

Ingevolge artikel 55 van die Wet op Openbare Finansiële Bestuur (Wet 29 van 1999) moet alle inrigtings wat finansiële befondsing van die staat ontvang, volledig en behoorlik boekhou van hulle finansiële sake, en jaarliks 'n geouditeerde finansiële staat voorlê aan hulle uitvoerende gesag - in hierdie geval die Wes-Kaap Onderwysdepartement (WKOD). In hierdie verband moet alle VKO-inrigtings voor die einde van Mei elke jaar 'n geouditeerde finansiële staat by hulle plaaslike onderwysdistrikskantoor met betrekking tot die vorige akademiese jaar voorlê. Versuim om dit te doen, sal die volgende subsidiebetaling aan die betrokke inrigting vertraag.


5. BETALING VAN DIE GRAAD R-PRAKTISYN SE SALARIS
5.1 Skole word daaraan herinner dat die graad R-praktisyns by alle skole die volle 80% subsidietoekenning moet ontvang, wat tweekeer per jaar oorgeplaas word.
5.2 Skoolbeheerliggame van NK 4- en NK 5-skole word versoek om die graad R-praktisyn se salaris te verhoog, sodat die praktisyn 'n bedrag ontvang wat meer is as die minimum van R5 000 per maand.
5.3 Verder moet SBL'e by SAID as werkgewers registreer. Die WVF en LBS moet afgetrek word van die graad R-praktisyn se salaris en oorbetaal word aan die betrokke regeringsdepartemente.

6. AANTAL GRAAD R-LEERDERS WAT PER KLAS TOEGELAAT WORD

Onlangse oudits by geselekteerde terreine het bevestig dat 'n klasgrootte van meer as 30 leerders negatief impakteer op die voorsiening van gehalteonderwys in 'n graad R-klas. Vanaf Januarie 2012, sal die KABV in die graad R-klasse geïmplementeer word en daarom word skole daaraan herinner dat die maksimum getal graad R-leerders wat per klas toegelaat sal word, 30 is.

7. SPANDERING VAN LOOM-GELD

Al die geld wat ontvang word vir LOOM (20%) vir die twee kwartale moet binne daardie tydperk spandeer word en slegs vir doeleindes van LOOM-verskaffing.

8. Die inhoud van hierdie omsendbrief moet onder die aandag gebring word van almal wat met VKO te doen het by openbare en onafhanklike skole.


GETEKEN: PA VINJEVOLD
HOOF: ONDERWYS
DATUM: 2011:11:30