1. Hierdie omsendbrief moet saamgelees word met Assesseringsbestuursminuut 0009/2010, van 12 Julie 2010, wat alle Nasionale Senior Sertifikaat (NSS)-eksamensentrums ingelig het oor die infasering van onderwysers as hoofopsieners en hulpopsieners vir die NSS-eksamen.
2. Paragraaf 4.2 en 6 van die bogenoemde minuut het gestipuleer dat twee senior onderwysers by skole die hoofopsiener tydens die opsienwerk van die 2010 NSS-eksamen fyn dop moet hou, met die bedoeling om die bestuur en toesighouery van die NSS-eksamen by die skool na 2010 oor te neem.
3. Vir die 2011 NSS-eksamen moet een van die twee senior onderwysers aangestel word as die hoofopsiener. Die ander senior onderwyser moet een van die opsieners by die skool wees.
4. Skole moet die hoofopsiener van 2010 aanstel as 'n mentor wie se funksie sal wees om 'n gladde oorgang van die oue tot die nuwe stelsel te verseker.
5. Die hoofopsiener sal nou saamwerk met die ekstern aangestelde mentor en sal die pligte van 'n hoofopsiener vervul. Die hoofopsiener sowel as die mentor sal dus tydens elke eksamensessie in die eksamenlokaal teenwoordig moet wees.
6. Onderwysers moet die helfte (50%) van die totale getal opsieners vir die November 2011 NSS-eksamen by elke skool uitmaak. Die orige helfte (50%) moet lede van die publiek wees.
7. Onderwysers wat optree as opsieners hoef nie geskeduleer te wees om vir die volledige eksamensessie toesig te hou nie. Hulle kan vir 'n minimum van een uur toesig hou en sodoende ontwrigting van hulle onderwyspligte tot 'n minimum beperk.
8. 'n Onderwyser wat 'n kind het wat die NSS-eksamen skryf by dieselfde skool as waar daardie onderwyser aangestel is, moet nie as opsiener aangestel word nie.
9. Dit is imperatief dat geen onderwyser toesig sal hou by die vak wat hy of sy by die skool aanbied nie, m.a.w. wanneer Fisiese Wetenskappe geskryf word, mag geen onderwyser van Fisiese Wetenskappe toesig hou nie.
10. Die skoolhoofde moet alle onderwysers wat as opsieners sal optree vir die NSS-eksamens, skriftelik aanstel. 'n Lys van alle aangesteldes moet aan die distrikskantoor voorgelê word teen nie later nie as op 3 Augustus 2011.
11. Die prinsipaal van die skool moet seker maak dat alle opsieners (onderwysers wat as opsieners dien, ingesluit) opgelei word in die uitvoering van hulle opsienerpligte.
12. Opleiding vir die prinsipaal, hoofopsiener en die mentor sal gedurende September 2011 plaasvind.
13. Skoolhoofde moet 'n toesigskedule opstel en moet dit aan die betrokke IBB-bestuurder voorlê teen nie later nie as 18 Augustus 2011. Die toesigskedule moet aflosonderwysers en opsieners vir elke eksamensessie insluit.
14. IBB-bestuurders sal ondersteuning bied met die opstel van die toesigskedule, indien dit versoek word.
15. Skoolhoofde sal verantwoordelik gehou word vir die behoorlike bestuur en toesig van die NSS-eksamen by hulle skole.
16. Die WKOD sal die samewerking van skoolhoofde en onderwysers in die bogenoemde verband hoog op prys stel.


GETEKEN: PA VINJEVOLD
HOOF: ONDERWYS
DATUM: 2011:06:01