Goedkeuring is verleen vir die toename in per capita-subsidie vir leerders in goedgekeurde graad R-klasse by gewone openbare skole en vroeëkindontwikkelingskole retrospektief vanaf 1 April 2011. Die per capita-subsidie per leerder per dag is soos volg verhoog:

Die subsidie vir landelike gewone openbare skole wat vir die minimum subsidie kwalifiseer is verhoog na R60 000 per jaar.

Die eerste deel van die subsidie sal in April uitbetaal word en die tweede in Oktober.

Prinsipale van gewone openbare skole en hoofde van onafhanklike skole word daaraan herinner dat graad R subsidie-eisvorms, Bylae A, B en C, korrek voltooi moet word en onderteken moet word voor hulle aan die onderwysdistrikskantoor voorgelê word. Kopieë van bywoningsregisters, die SOBIS-verslag en kwitansies vir leer en onderrigondersteuningsmateriaal (LOOM) wat aangekoop is, moet ook voorgelê word.

Onvolledig ingevulde vorms (of vorms wat direk aan die Hoofkantoor voorgelê is) sal teruggestuur word, wat natuurlik sal lei tot vertragings in die toekenningsprosedure sowel as in die betaling van eise.

Die kwartaallikse aansoeke om subsidies vir 2011 - 2012 moet voorgelê word aan plaaslike onderwysdistrikskantore teen die volgende datums:

Gewone openbare en onafhankIike skole wat nie hou by die bogenoemde datums nie, loop die risiko dat hulle hulle subsidies kan verloor.

Skole wat bystand verlang met die voltooiing van die subsidie-eisvorms kan die IBB VKO-bestuurder by hulle onderwysdistrikskantoor skakel.

Daar word nog steeds baie navrae ontvang aangaande die salarisse van graad R-praktisyns. Die WKOD wil weer beklemtoon dat die vergoeding van graad R-praktisyns (behalwe diegene wat nog steeds op die diensstaat van die WKOD is) die verantwoordelikheid van die relevant beheerliggaam is. Dit is dus baie belangrik dat beheerliggame 'n kontrak sluit met elke graad R-praktisyn, en duidelik elke praktisyn se vergoeding en diensvoorwaardes uiteensit.

Die nasionale Departement van Basiese Onderwys het aangedui dat, vanaf 1 April 2011, die minimum salaris vir 'n graad R-praktisyn R5,000 per maand behoort te wees. Skole word daaraan herinner dat 80% van die susidietoekenning gebruik moet word vir die praktisyn se salaris en dat skoolbeheerliggame 'n bydrae moet maak tot die salaris van die praktisyn. Die oorblywende 20% van die subsidietoekenning moet gebruik word vir die aankoop van LOOM.

Om enige onderbetaling van salarisse te vermy, word skole versoek om die inligting in Bylae A te gebruik en ook hulle distriksbeamptes te kontak indien hulle hulp nodig het met die korrekte berekening van hulle praktisyn se salaris.

Die Departement van Basiese Onderwys se strategiese plan vir 2011-2014 verskaf 'n raamwerk vir die bekendstelling van die KABV in alle skole en die voorsiening van LOOM vir die implementering daarvan. Om te voldoen aan die behoefte aan hierdie LOOM in graad R-klasse, is skole voorsien van geoormerkte befondsing om hierdie bronne mee aan te koop. Skole word versoek om seker te maak dat die LOOM wat aangekoop word vir graad R-leerders sal bydra tot die ontwikkeling van hulle geletterdheid- en gesyferdheidsvaardighede.