| 1. |
Die Wes-Kaap Onderwysdepartement (WKOD) erken en waardeer die positiewe rol wat deur skoolbeheerliggame (SBL'e) vervul word in die finansiële bestuur van ons openbare skole, sowel as in die aanvulling van die finansiële bronne wat deur die departement aan hierdie skole voorsien word. Verpligte skoolgeld bly 'n belangrike bron van addisionele fondse in openbare skole wat nie as nieskoolgeldskole verklaar is nie. |
| 2. |
Die WKOD ontvang egter dikwels besware van ouers aangaande SBL'e van skoolgeldskole wat nie hou by die Regulasies aangaande die Vrystelling van die Betaling van Skoolgeld (2006) nie. Die besware wat ontvang word, wissel, en sluit in kwessies soos die weiering deur skole om ouers te voorsien van die amptelike aansoekvorms, die SBL se weiering om aansoeke te oorweeg waar ouers nie al die besonderhede wat vereis word, ingevul het nie, versuim om ouers in kennis te stel van die uitslag van hulle aansoeke, en versuim om die voorgeskrewe prosedure te volg voor die betaling van skoolgeld deur 'n wetsproses afgedwing word. |
| 3. |
Die WKOD wil graag die volgende belangrike voorwaardes beklemtoon, wat in die bogemelde regulasies voorkom en wat objektief toegepas moet word deur SBL'e en prinsipale wanneer aansoeke om vrystelling behandel word: |
| 3.1 |
Regulasie 3(1)(e) bepaal dat, indien 'n ouer agter raak met een maand of meer, die beheerliggaam ondersoek moet instel of die ouer vir vrystelling van betaling kwalifiseer ingevolge artikel 41(1) van die Suid-Afrikaanse Skolewet (SASW), (Wet 84 van 1996). Dit gebeur dikwels dat 'n regsproses deur 'n skool ingestel word teen die ouers om uitstaande skoolgeld te herwin, sonder dat die bogenoemde bepaling eers toegepas word. Regulasie 3(1)(e) is ook onderworpe aan artikel 41(4) van die SASW. |
| 3.2 |
Ingevolge Regulasie 4(1) moet aansoekers elke jaar skriftelik aansoek doen by die voorsitter van die SBL, deur die vorm in Bylae B van hierdie Regulasies te voltooi. Die prinsipaal van die betrokke skool moet die aansoekers voorsien van die vorms. |
| 3.3 |
Regulasie 4(2) bepaal dat die aansoeker verdere relevante inligting moet verskaf soos wat die beheerliggaam mag verlang. Regulasie 9(3) bepaal dat geen ouer gediskwalifiseer mag word op grond daarvan dat hulle aansoek onvolledig is of dat die vorm verkeerd ingevul is nie. Enkel ouers, veral, ervaar baie probleme met die verskaffing van inligting oor die nie-versorgende ouer. |
| 3.4 |
Ouers se finansiële omstandighede mag verander gedurende 'n spesifieke skooljaar, in welke geval die ouers mag aansoek doen om vrystelling vir die res van die skooljaar of tot tyd en wyl hulle omstandighede gedurende die skooljaar verbeter. Ingevolge artikel 41(3) van die SASW, word die vrystelling van die betaling van skoolgeld retrospektief bereken vanaf die datum waarop die ouers vir vrystelling kwalifiseer. |
| 3.5 |
Die SASW en die genoemde regulasies sluit nie die ouers van leerders wat nie die naaste skool bywoon daarvan uit om aansoek te doen om vrystelling van die betaling van skoolgeld nie. Alle ouers wat nie kan bekostig om skoolgeld te betaal nie, kwalifiseer om aansoek te doen om die vrystelling van die betaling van skoolgeld, afgesien van waar hulle bly. |
| 3.6 |
SBL'e en skole moet ook die volgende in gedagte hou wanneer hulle bereken of die ouer(s) kwalifiseer vir vrystelling van die betaling van skoolgeld ingevolge die Regulasies: Die gekombineerde bruto jaarlikse inkomste van albei ouers gesamentlik of, indien die leerder slegs een ouer het, die totale jaarlikse bruto inkomste van daardie ouer. |
| 4. |
Ingevolge die Regulasies is die Departementshoof die appèlgesag ten opsigte van die vrystelling van ouers van die betaling van skoolgeld. Die Departementshoof kan egter 'n beslissing vel in 'n spesifieke geval alleenlik indien die ouers die besluit van die SBL in 'n appèl wil laat hersien. Alle ander kwessies wat verband hou met skoolgeld en die vrystelling van die betaling van skoolgeld moet opgelos word tussen die ouers en die SBL. |
GETEKEN: PA VINJEVOLD
HOOF: ONDERWYS
DATUM: 2011:04:04
|
 |