Kunikwe imvume yokunyusa inkxaso-mali enikwa umfundi ngamnye kubantwana abakwiiklasi zeBakala R ezivunyiweyo ezikolweni nakumaziko oluntu ukuqalela emva kwixesha elidlulileyo (retrospectively) nge-1 Apreli 2009. Inkxaso-mali enikwa umfundi ngamnye ngosuku ngalunye inyusiwe ngolu hlobo lulandelayo:

Inkxaso-mali yezikolo neyamaziko oluntu asemaphandleni afanele ukufumana eyona nkxaso-mali isezantsi (minimum sudsidy), inyusiwe yaya kutsho kwi-R48 000 ngonyaka. Inkxaso-mali yezikolo ezithile namaziko oluntu athile sele ilungisiwe (adjusted) zaza iimali ebe zingekahlawulwa (arrears)zafakwa kwii-akhawunti zazo. Ezinye izikolo kunye namanye amaziko oluntu aya kufumana iintlawulo zawo ebe zingekahlawulwa (arrear payments) ekuqaleni konyaka ozayo.

Ngonyaka ngamnye, ukuqalela ku-2010, kuya kuhlawulwa isixa sokuqala senkxaso-mali ngo-Apreli, size isixa sesibini sihlawulwe ngo-Oktobha.

Ziyakhunjuzwa kwakhona iinqununu zezikolo neentloko zamaziko oluntu ukuba izicelo zenkxaso-mali zeBakala R mazizaliswe ngokuchanekileyo yaye zisayinwe phambi kokuba zingeniswe kwi-ofisi yesithili semfundo. Iifom ezingazaliswanga zonke iinkcukacha (okanye iifom ezingeniswe ngqo kwaNdlunkulu) ziya kujikwa zibuyiselwe emva, nto leyo ngokucacileyo eya kukhokelela ekulibazisekeni kwenkqubo yokuvunywa nokuhlawulwa kwamabango. Izicelo zenkxaso-mali zekota zika-2010-2011 mazingeniswe kwii-ofisi zezithili zemfundo zaloo ndawo inesikolo zize emva koko zingeniswe kwaNdlunkulu ngale mihla ilandelayo:

Izikolo, amaziko oluntu kunye nee-ofisi zezithili zemfundo ezingaphumeleliyo ukulandela ngqo le mihla ingasentla zisemngciphekweni wokuphulukana nale nkxaso-mali njengoko iSebe iWCED lifumana izicelo ezicela uncedo lwemali ezivela kwezinye izikolo nakwamanye amaziko asweleyo aneeklasi zeBakala R. Izikolo namaziko afuna ukuncediswa ekuzaliseni iifom zamabango enkxaso-mali maziqhagamshelana nomphathi weze-IMG kwi-ofisi yesithili semfundo sazo.

Ukuphendula imibuzo eliqela emalunga noku kungasentla, iSebe iWCED linqwenela ukugxininisa ukuba intlawulo yemivuzo yootitshala beBakala R (ngaphandle kwabo titshala abazithuba zabo izezo zabiwe liSebe iWCED) luxanduva lwebhunga lolawulo elichaphazelekayo. Ngako oko ke, kunyanzelekileyo ukuba amabhunga olawulo asayine imvumelwano notitshala ngamnye weBakala R, ecacisa gca malunga nomvuzo katitshala neemeko zengqesho.

Ngenxa yokunyuka kweendleko zokuphila, kucetyiswa ukuba owona mlinganiselo omncinane womvuzo wetitshala yeBakala R ube yi-R4 000,00 ngenyanga (isiHlomelo A).

INkxaso-mali yeSebe yeeklasi zeBakala R yenzelwe kuphela qwaba ukuqhutywa kwezi klasi. Amashumi asibhozo epesenti (80%) enkxaso-mali kufuneka asetyenziswe njengegalelo kwimivuzo yootitshala, ize eshiyekileyo, amashumi amabini epesenti (20%) isetyenziselwe ukuthenga izinto zokuncedisa ukufunda nokufundisa (learning and teaching support material) (LTSM). Njengoko iSebe iWCED lingaboneleli bhajethi epheleleyo yokufundiswa kweeklasi zeBakala R kunye nemivuzo yootitshala beBakala R, luxanduva lwebhunga lolawulo lesikolo ukuhlawula imali elityala elishiyekileyo (deficit) ngokunyusa ingxowa-mali nangokubiza iifizi zesikolo.

Ngenxa yokuba ncinane kwemali efumanekayo, kucetyiswa ukuba izikolo namaziko oluntu zithenge kuphela i-LTSM esemgangathweni apho abafundi baya kuzuza lukhulu kakhulu kuyo.

Makugxininiswe ukuba nakuphi na ukusetyenziswa gwenxa kwemali yeBakala R kuya kukhokelela ekurhoxisweni kwenkxaso-mali kwisikolo okanye kwiziko loluntu elichaphazelekayo. Ngenxa yesi sizathu, kunyanzelekile ukuba yenziwe ngenyameko enkulu ingxelo-mali emfutshane eshwankathela imicimbi engeniswa nesicelo senkxaso-mali ngasinye.

Kubalulekile ukuqaphela ukuba, xa izikolo namaziko oluntu zinqwenela ukugcina ubhaliso lweeklasi zazo zeBakala R, kufuneka ke ngoko zibe nabafundi ababhalisiweyo abayi-20 ubuncinane kwiklasi yeBakala R nganye. Apho izikolo zikarhulumente eziqhelekileyo (ngaphandle kwezo zikwindawo esisemaphandleni) zingaphumeleliyo ukulandela ngqo lo mqathango uyimfuneko, yaye kuya kuthi emva kokwenziwa kotyelelo esikolweni ligosa leSebe iWCED, inkxaso-mali leyo inikwe izikolo zikarhulumente eziqhelekileyo ezikwiindawo ezikude zasemaphandleni ezinawona manani asezantsi abafundi abhalisileyo aphakathi kwe-15 ne-19.

Ukungqinelana nemiMiselo neMigangatho kaZwelonke yoLwabiwo-mali lweBakala R (ISaziso sikaRhulumente No. 30679 se-18 Januwari 2008) (National Norms and Standards for Grade R funding), zonke izikolo zikarhulumente ezifundisa iBakala R mazibhaliswe kwi-EMIS zize zibe nesiqinisekiso sobhalisa sangoku. Bonke abafundi bazo beBakala R mababhaliswe kwi-CEMIS.

Onke amaziko oluntu afundisa iBakala R kufuneka abhalise kwi-CEMIS njengezikolo ezizimeleyo nanesiqinisekiso sobhalisa sangoku. Bonke abafundi beBakala R mababhaliswe kwi-CEMIS.

Izikolo ezingabizi zifizi ezifumana inkxaso-mali yeBakala R kurhulumente azivumelekanga ukuba zibize iifizi kubafundi beBakala (funda iSikhokelo sokuLawulwa kweMali sikaZwelonke ngokuNxulumene neZikolo eziFundisa iiKlasi zeBakala R, sika-Oktobha 2009 (funda iNational Financial Management Guidelines in Respect of Schools Offering Grade R Classes, October 2009) Iphepha 4).

Abazali bangacelwa ukuba benze iminikelo eyimali ngokuzithandela. Nakuba kunjalo, mayigxininiswe into yokuba le minikelo ayisosinyanzelo kwaye mayingaze isetyenziselwe ukukhethela ecaleni abafundi ababazali babo bangakwaziyo ukwenza iminikelo elolu hlobo.