Goedkeuring is verleen vir die verhoging in die per capita-subsidie vir kinders in goedgekeurde graad R-klasse by gewone openbare en onafhanklike skole terugwerkend vanaf 1 April 2009. Die per capita-sudsidies per leerder per dag is soos volg verhoog:

Die subsidie vir landelike skole wat vir die minimum subsidie kwalifiseer is verhoog na R48 000 per jaar. Die subsidies van sommige skole is alreeds aangepas en die agterstallige gelde is in hulle rekeninge inbetaal. Die ander skole sal hulle agterstallige betalings vroeg in die nuwe jaar ontvang.

Elke jaar vanaf 2010 sal die eerste gedeelte van die subsidie in April betaal word, en die tweede gedeelte in Oktober.

Prinsipale van skole en hoofde van onafhanklike skole word weereens daaraan herinner dat aansoeke om graad R-subsidie korrek voltooi en onderteken moet wees voordat hulle by die onderwysdistrikskantoor ingedien word. Onvolledige vorms (of vorms wat direk by Hoofkantoor ingedien word) sal teruggestuur word, wat vanselfsprekend vertragings in beide die goedkeuringsprosedure en die betaling van die eise sal veroorsaak. Die kwartaallikse subsidie-aansoeke vir 2010 - 2011 moet ingedien word by die plaaslike onderwysdistrikskantore en dan by Hoofkantoor teen die volgende datums:

Skole wat nie die bogemelde datums eerbiedig nie, loop die risiko om hierdie subsidies te verbeur. Skole wat hulp benodig met die voltooiing van die subsidie-eisvorms moet in verbinding tree met die IBB-bestuurder by hulle onderwysdistrikskantoor.

In antwoord op talle navrae in bogemelde verband, wil die WKOD dit graag beklemtoon dat die besoldiging van die graad R-praktisyns (met uitsondering van daardie praktisyns wat nog op die diensstaat van die WKOD is), die verantwoordelikheid van die betrokke beheerliggaam is. Dit is dus noodsaaklik dat beheerliggame met elke graad R-praktisyn 'n kontrak aangaan, waarin elke praktisyn se besoldiging en diensvoorwaardes duidelik uiteengesit word.

As gevolg van die toename in lewenskoste word aanbeveel dat die minimum besoldiging van 'n graad R-praktisyn, met ingang 1 Januarie 2010, R4 000,00 per maand moet wees (Bylae A).

Die Departementele subsidie vir graad R-klasse word streng beperk tot die aanbieding van hierdie klasse. Vanaf 1 Januarie 2010, moet tagtig persent (80%) van die subsidie gebruik word as 'n bydrae tot praktisyns se salarisse, terwyl die oorblywende twintig persent (20%) gebruik moet word vir die aankoop van leer-en-onderrigondersteuningsmateriaal (LOOM). Aangesien die WKOD nie die volle begroting vir die aanbieding van graad R-klasse en die salarisse van graad R-praktisyns voorsien nie, is dit die verantwoordelikheid van die skoolbeheerliggaam om deur fondsinsameling en die heffing van skoolgelde vir die tekort voorsiening te maak.

Vanweë die beperkte fondse wat beskikbaar is, word ook aanbeveel dat skole slegs LOOM van 'n goeie gehalte wat vir leerders tot maksimum voordeel kan wees, aanskaf.

Dit moet beklemtoon word dat enige wanaanwending van graad R-fondse die opheffing van die subsidie aan die betrokke skool tot gevolg sal hê. Om hierdie rede is dit noodsaaklik dat behoorlike sorg bestee word aan die opstel van die beknopte finansiële staat wat saam met elke aansoek om subsidie ingedien word.

Dit is belangrik om daarop te let dat indien gewone openbare en onafhanklike skole hulle registrasie van hulle graad R-klasse wil behou, hulle 'n inskrywing van ten minste 20 leerders per graad R-klas moet handhaaf. Subsidies word aan sekere gewone openbare skole in landelike gebiede met 'n minimum inskrywing van tussen 15 en 19 leerders aangebied.

Ingevolge die Nasionale Norme en Standaarde vir graad R-befondsing (Staatskennisgewing nr. 30679 van 18 Januarie 2008), moet alle gewone openbare skole wat graad R aanbied, geregistreer wees op die OBIS en in besit wees van 'n geldige registrasiesertifikaat. Al hulle graad R-leerders moet op die SOBIS geregistreer wees.

Alle gemeenskapsinrigtings wat graad R aanbied, moet op die OBIS as onafhanklike skole geregistreer wees en in besit wees van 'n geldige registrasiesertifikaat. Al hulle graad R-leerders moet op die SOBIS geregistreer wees.

Geengelde-skole wat graad R-befondsing van die staat ontvang, word nie toegelaat om skoolgelde vir graad R-leerders te hef nie (sien Nasionale Finansiële Bestuurriglyne aangaande Skole wat Graad R-klasse aanbied, Oktober 2009, bladsy 4).

Ouers kan versoek word om vrywillige bydraes te maak. Dit moet egter beklemtoon word dat hierdie bydraes nie verpligtend is nie en nie gebruik mag word om leerders wie se ouers nie in staat is om sodanige bydraes te lewer, uit te sluit nie.