Die Departement van Basiese Onderwys het aan provinsiale onderwysdepartemente die volgende besonderhede verskaf vir die implementering van die KABV.

2011 - Voorbereiding vir die bekendstelling van die KABV
2012 - Bekendstelling van KABV in Graad R - 3 en Graad 10.
2013 - Bekendstelling van KABV in Graad 4 - 9 en Graad 11.
2014 - Bekendstelling van KABV in Graad 12

In 2011 sal ons die KABV versprei en voorbereidings tref vir die implementering daarvan in 2012 - 2014. Die status quo soos bepaal in die huidige nasionale onderwysbeleid t.o.v. die bevorderings- en vorderingsvereistes sal gehandhaaf word tot en met die implementering van die KABV.

In 2011 sal die Departement van Basiese Onderwys (DBO) die konsepbeleidsdokument, Nasionale beleid t.o.v. die program en bevorderingsvereistes van die Nasionale Kurrkulumverklaring graad R - 12 finaliseer, Dit sal saam met die KABV die Nasionale Kurrikulumverklaring vir graad R - 12 uitmaak. Hierdie dokument sal vir kommentaar gepubliseer word in Desember 2010 en sal sodra die kommentaar verwerk is, voorgelê word vir ministeriële goedkeuring en daarna in 2011 in die Staatskoerant gepromulgeer word.

WKOD distrik- en hoofkantoorpersoneel sal skole ondersteun in hulle beplanning vir die bekendstelling van KABV in 2011.

In Januarie 2011 sal leerders in graad 1 - 6 voorsien word van werkboeke in Geletterdheid en Gesyferdheid. Werkboek 1 dek die werk vir die eerste 6 maande van 2011 en sal afgelewer word in Januarie 2011, en Werkboek 2 sal aan skole gelewer word teen die middel van 2011 vir gebruik in die tweede helfte van die jaar. Skole moet hierdie werkboeke versprei onder alle leerders in graad 1 - 6 en die leerders moet die boeke in 2011 gebruik.

Grondslagfase

In 2011 sal skole die Grondslae van Leer-dokument en die toepaslike Nasionale Kurrikulumverklaring, graad R - 12 beleidsdokumente vir die Grondslagfase gebruik.

Vanaf 2012 sal die vakke in die Grondslagfase soos volg wees:

'n Taal op Huistaalvlak
'n Taal op Eerste Addisionele Taalvlak
Wiskunde
Lewensvaardighede

Intermediêre Fase

In 2011 en 2012 sal skole die Grondslae van Leer-dokument en die toepaslike Nasionale Kurrikulumverklaring, graad R - 12 se beleidsdokumente vir die Intermediêre Fase gebruik.

In 2011 en 2012 sal leerders van graad 4 - 6 in die volgende leerareas geassesseer word:

  1. Tale
  2. Wiskunde
  3. Natuurwetenskappe
  4. Lewensoriëntering
  5. Sosiale Studies
  6. Tegnologie
  7. Kuns en Kultuur
  8. Ekonomiese en Bestuurswetenskappe

In 2013 sal die volgende vakke aangebied word ooreenkomstig die KABV

Huistaal
Eerste Addisionele Taal
Wiskunde
Lewensvaardighede
Natuurwetenskappe en Tegnologie
Sosiale Studies

Skole moet 2011 en 2012 benut vir behoorlike beplanning vir die bogenoemde vakke.

Senior Fase

In 2011 en 2012 sal skole die toepaslike Nasionale Kurrikulumverklaring, graad R - 12 beleidsdokumente gebruik vir die bestaande agt vakke in die Senior Fase, nl.

  1. Tale
  2. Wiskunde
  3. Natuurwetenskappe
  4. Lewensoriëntering
  5. Sosiale Studies
  6. Tegnologie
  7. Kuns en Kultuur
  8. Ekonomiese en Bestuurswetenskappe

Ingevolge die Regeringskennisgewing no 349 in die Staatskoerant No 33160 van 6 Mei 2010, is Gemeenskaplike Take vir Assessering (GTA's) soos bepaal in die beleidsdokument, Nasionale beleid oor die assessering en kwalifikasies vir skole in die Algemene Onderwys en Opleidingsband, gestaak.

Skole is aangeraai om hulle eie interne eksamens in plek van die GTA's op te stel. Distrikte het die nodige ondersteuning verskaf t.o.v. moderering. Verwys asseblief na Omsendbrief no. 0016/2010 "Algemene Onderwys en Opleidingkwessies vir 2010" vir meer besonderhede in hierdie verband.

In 2013 sal die volgende vakke aangebied word ooreenkomstig die KABV:

  1. Tale
  2. Wiskunde
  3. Natuurwetenskappe
  4. Lewensoriëntering
  5. Sosiale Studies
  6. Tegnologie
  7. Kuns en Kultuur
  8. Ekonomiese en Bestuurswetenskappe

Distrik- en hoofkantoorpersoneel sal skole in 2011 en 2012 ondersteun met behoorlike beplanning vir opstel van roosters en toewysing van onderwysers vir die bogenoemde vakke.

Verdere Onderwys en Opleidingsfase

Die huidige 29 graad 10 - 12 vakke soos dit verskyn in die beleidsdokument, Nasionale Senior Sertifikaat: 'n Kwalifikasie op vlak 4 op die Nasionale Kwalifikasieraamwerk (NKR) sal aangebied word totdat die nuwe KABV vir hierdie grade bekendgestel word soos volg:

GRAAD JAAR
Graad 10 Januarie 2012
Graad 11 Januarie 2013
Graad 12 Januarie 2014

Algemeen

Vanaf 2012 sal 'n hersiene ratio tussen Skoolgebaseerde Assessering (SGA) en die jaareindeksamenpunte toegepas word, naamlik:

Fase SGA Eksamen
Grondslagfase: (Graad R-3) 100% 0%
Intermediêre Fase (Graad 4-6) 75% 25%
Senior Fase (graad 7 - 9) 40% 60%
VOO-fase (graad 10 - 12) 25% 75%

Alhoewel die status quo gehandhaaf word vir 2011, sal ons distriks- en hoofkantoorpersoneel skole ondersteun met beplanning van die samestelling van die twee assesseringskomponente om te voldoen aan die nuwe ratio.

Besonderhede van onderwyseropleiding en handboekvoorsiening sal in die nuwe jaar aan u voorsien word.

Ek wil graag van hierdie geleentheid gebruik maak om u te bedank vir u harde werk, toewyding aan gehalteonderwys en die hoë verwagtinge van al ons leerders. Mag u en u geliefdes 'n vredevolle Kersfeesseisoen en Nuwejaar beleef.


GETEKEN: PA VINJEVOLD
HOOF: ONDERWYS
DATUM: 2010:12:09