OMSENDBRIEF : | 0048/2010 | VERVALDATUM : | GEEN |
AAN: | HOOFDIREKTEURE, DIREKTEURE, KRINGSPAN BESTUURDERS EN HOOFDE VAN ONDERWYSINRIGTINGS |
KORT OPSOMMING: | Verduideliking van beleid oor aansoek om tydelike ongeskiktheidsverlof aan opvoeders en staatsbeamptes |
ONDERWERP: | BELEID RAKENDE ONGESKIKTHEIDSVERLOF EN UITDIENSTREDE WEENS SWAK GESONDHEID |
| 1. |
Die Wes-Kaap Onderwysdepartement het bogemelde beleid onder u aandag gebring in Omsendbrief 0045/2006 van 1 September 2006 en 0004/2009 van 17 Desember 2008. |
| 2. |
Soos in bogemelde omsendbriewe uiteengesit, is 'n werknemer (beide opvoeder en staatsamptenaar) geregtig op 36 dae siekteverlof in 'n driejaarsiklus (die huidige siklus dek die tydperk 2010 tot 2012). Alle siekteverlof wat normale siekteverlof oorskry, word geag ongeskiktheidsverlof te wees en daar moet op die voorgeskrewe vorms aansoek gedoen word om sodanige verlof. Werknemers doen steeds aansoek om hierdie verlof op die Z1-vorm, wat slegs op normale siekteverlof van toepassing is. Die Z1-verlofvorm moet nie vir tydelike ongeskiktheidsverlof gebruik word nie. |
| 3. |
Soos gemeld in paragrawe 3 en 5 van Omsendbrief 45/2006, moet werknemers 'n aansoek om tydelike ongeskiktheidsverlof op die voorgeskrewe wyse binne 5 dae van die eerste dag van afwesigheid indien. |
| 4. |
Indien 'n werknemer nalaat om 'n aansoek om tydelike ongeskiktheidsverlof binne die 5 dae in te dien, geld die volgende reëlings: |
| 4.1 |
Die werknemer se bestuurder of toesighouer moet die Departement binne 2 werksdae inlig dat 'n aansoek om tydelike ongeskiktheidsverlof nie ontvang is nie. Hierdie periode van siekteverlof sal dan gedek word deur jaarlikse verlof (met die werknemer se instemming) en/of onbetaalde verlof, indien onvoldoende jaarlikse of opgehoopte verlofkrediete beskikbaar is. |
| 4.2 |
Versuim van die werknemer om 'n aansoekvorm binne die genoemde periode in te dien, of versuim van die bestuurder of toesighouer om dit behoorlik te bestuur, sal in 'n ernstige lig beskou word en dissiplinêre stappe sal oorweeg word. |
| 5. |
Die voltooiing en indien van die statutêre aansoekvorms (d.w.s. Bylae A, B of E) vir ongeskiktheidsverlof en/of aftrede op grond van swak gesondheid, tesame met sekere bykomende inligting (d.w.s. medies en aanvullend), deur die aansoeker, is verpligtend. Waar sodanige verpligte dokumentasie en/of vereiste inligting nie voorsien word nie, is sodanige aansoek om ongeskiktheidsverlof en/of aftrede op grond van swak gesondheid 'n nie-geldige en nie-wettige aansoek, en mag die Gesondheidsrisikobestuurder nie sodanige aansoek assesseer nie. In so 'n geval is die Departement verplig om verlof sonder betaling vir die tydperk van afwesigheid in te stel. |
| 6. |
Bring asseblief die inhoud van hierdie omsendbrief onder die aandag van alle personeel onder u beheer en sorg dat die voorsitter van die beheerliggaam 'n afskrif daarvan kry. |
| 7. |
U samewerking in hierdie verband en voortgesette pogings om siekteverlof op doeltreffende wyse te bestuur, sal op prys gestel word. |
GETEKEN: PA VINJEVOLD
HOOF: ONDERWYS
DATUM: 2010:12:01
Grand Central Towers, Laer-Parlementstraat, Privaatsak X9114, Kaapstad 8000
Meld asseblief verwysingsnommers in alle korrespondensie
VEILIGE SKOLE: 0800 45 46 47
INBELSENTRUM: 0861 92 33 22
|
