Die Minister van Onderwys, me A Motshekga, het onlangs veranderinge aan die skoolkurrikulum aangekondig. Hierdie veranderinge sal in fases geïmplementeer word. Die eerste fase was in 2010 en het kleiner veranderinge aan die Nasionale Kurrikulumverklaring (NKV) behels. Die Raad van Onderwysministers het nou goedkeuring verleen dat die voorgestelde veranderinge aan die huidige kurrikulum- en assesseringsbeleide gepubliseer mag word. Hierdie beleide sal, sodra goedkeuring verleen is in die Grondslagfase in 2011 en in die Intermediêre, Senior en VOO-fases in 2012 geïmplementeer word.

Die voorgestelde veranderinge aan kurrikulumbeleid sal op 1 September 2010 vir kommentaar gepubliseer word. Alle onderwysers en skoolbestuurspanne (SBS'e) word aangemoedig om kommentaar voor te lê aan die Departement van Basiese Onderwys aangaande die volgende sleutelkwessies:

1. Die onderrig van twee tale in graad R tot 3

2. Die kombinasie van leerareas in die Intermediêre Fase

3. Tyd toegeken aan vakke in die Grondslag, Intermediêre en Senior Fases

4. Assessering in graad R tot 9

5. Die Kurrikulumassesseringsbeleidverklaring (KABV) se dokumente wat alle huidige kurrikulum- en assesseringsdokumente vervang

'n Kort dokument aangaande die voorgestelde veranderinge is aangeheg.

Die Wes-Kaap Onderwysdepartement (WKOD) sal besprekingsgroepe stig in distrikte om die beleidsdokumente en die KABV's te bespreek. Sodra die KABV, die kurrikulum en die assesseringsbeleid goedgekeur is, sal die WKOD dit op die WKOD-webtuiste plaas en dit ook aan skole verskaf in CD- en drukstukvorm.

Werkswinkels sal gehou word op distriksvlak in 2010 en 2011. 'n Werkswinkelprogram sal aan skole verskaf word teen die einde van September 2010. In 2010 sal die fokus van die werkswinkels op die Grondslagfase val.

Die volgende LOOM sal in 2010 verskaf word vir gebuik in 2011:

Werkboeke vir graad 1 tot 6 sal gratis aan alle skole verskaf word deur die nasionale Departement van Basiese Onderwys. Besonderhede aangaande die getal en inhoud van werkboeke sal aan skole in die Wes-Kaap verskaf word in Oktober 2010.

Gekeurde leesskemas in Engels vir die Grondslagfase sal verskaf word aan alle skole met Xhosa as die Taal van Leer en Onderrig (TLO) in die Grondslagfase. Die WKOD sal Engels EAT-leesskemas vir graad 1 tot 3 aan Xhosa-skole verskaf om die bekendstelling van die EAT as 'n vak vanaf graad 1 te ondersteun. Skole word egter ook aangeraai om hulle eie LOOM aan te skaf ooreenkomstig norme en standaarde om hierdie leesskemas uit te brei. Indien u besonderhede aangaande hierdie leesskemas verlang, kontak asseblief u Grondslagfase-kurrikulumadviseur.

Leesskemas vir graad 1 tot 6 in die huistaal van elke skool sal gestuur word na die 250 skole op Lit/Num-opleidingsprogramme in 2011. Indien u besonderhede verlang hiervan om te beplan vir 2011, of om aan te koop, indien u nie tel onder die aangewese skole nie, kontak asseblief u Grondslagfase-kurrikulumadviseur.

Wiskunde-handboeke vir alle graad 4, 5, 6 en 7-leerders sal aan alle skole verskaf word. Die WKOD het die titels gekeur wat verskaf moet word. Indien u egter alreeds hierdie boek bestel het, moet u u Intermediêre Fase-kurrikulumadviseur daarvan in kennis stel en u sal dan 'n geleentheid kry om 'n ander handboek van dieselfde prys te bestel, wat deur die WKOD verskaf sal word.