1. 'n Aansoek om uitdienstrede weens swak gesondheid moet gedoen word sodra dit blyk dat die werknemer permanent onbevoeg is om die pligte uit te voer wat vir die pos vereis word waarin hy of sy aangestel is.
2. 'n Aansoek om uitdienstrede weens swak gesondheid kan gedoen word voordat normale siekteverlof uitgeput is.
3. Wanneer 'n werknemer aansoek doen om uitdienstrede weens swak gesondheid, of die werkgewer namens die werknemer aansoek doen op grond van swak gesondheid, moet sorg gedra word dat daar gelyktydig om normale siekteverlof en ongeskiktheidsverlof aansoek gedoen word om die werknemer se afwesigheid van werk te dek. Aansoeke om ongeskiktheidsverlof en uitdienstrede weens swak gesondheid moet altyd tegelykertyd by die Gesondheidsrisikobestuurder vir assessering ingedien word.
4. Wanneer 'n werknemer aansoek doen om uitdienstrede weens swak gesondheid, moet die Bylae E-aansoekvorm deur die werknemer, die toesighouer/prinsipaal/kringbestuurder en die mediese praktisyn voltooi word. Dit moet so gou moontlik by die Hoof: Onderwys ingedien word, vir aandag: mnr P Adams, Wes-Kaap Onderwysdepartement, Privaatsak X 9114, Kaapstad, 8000. Die vorm het vier dele:
  • Deel A: Verklaring deur die werkgewer

    Alle nie-mediese inligting moet aan Deel A geheg word.

  • Deel B: Verklaring deur die werknemer

    'n Gewaarmerkte afskrif van die aansoeker se identiteitsdokument moet aan Deel B geheg word. Alle addisionele mediese inligting (bloedtoetse, x-strale, skanderings, ens.) moet aan Deel B geheg word.

  • Deel C: Werknemerstoestemming vorm

  • Deel D: Verklaring deur die behandelende mediese praktisyn

    Wanneer 'n werknemer aansoek doen om uitdienstrede weens swak gesondheid, moet hierdie afdeling deur 'n mediese spesialis ingevul word. Indien daar meer as een behandelende mediese praktisyn is, soos gedefinieer deur die Raad op Gesondheidsberoepe van Suid-Afrika, word daar van elke mediese praktisyn vereis om 'n aparte Deel D in te vul.

5. Alle koste wat verband hou met die mediese verslae en toetse van enige aard en wat vereis word as deel van die aansoek, moet deur die werknemer betaal word.
6. Sodra die ingevulde aansoek by die Hoofkantoor ontvang is, sal ondersteunende dokumentasie deur die WKOD bygevoeg word en binne 5 dae na ontvangs van die aansoek aan die Gesondheidsrisikobestuurder gestuur word. Vereiste dokumentasie wat nie ingedien is nie, sal die proses vertraag.
7. Die Gesondheidsrisikobestuurder kan
  • Addisionele inligting van die werkgewer en/of werknemer versoek;
  • Inligting van lynbestuurders en/of menslikehulpbronpraktisyns versoek;
  • Ingediende inligting ondersoek, verifieer of uitbrei daarop;
  • 'n onafhanklike mediese spesialis versoek om die geval te ondersoek, op die WKOD se koste;
  • Psigometriese toetse aanvra om die kognitiewe funksionaliteit van die werknemer te assesseer, bv. begryp die werknemer wat hy of sy lees;
  • 'n funksionele kapasiteits evaluering doen ten einde die geestelike en/of fisiese vermoëns van die werknemer te assesseer; of
  • Die werkplek van die werknemer besoek om te bepaal of daar omstandighede is wat die werknemer se vermoeë om te presteer beïnvloed en om veranderinge aan te beveel, indien nodig.
8. Die Gesondheidsrisikobestuurder sal dan die aansoek assesseer en oor die volgende advies gee:
  • Die geldigheid van die aansoek
  • Die omvang van die ongeskiktheid
  • Of die ongeskiktheid tydelik of permanent is
  • Potensiële herontplooiing, of aanpassings ten opsigte van die werkplek of taak
  • Potensiaal vir rehabilitasie en/of heropleiding
  • Toekomstige ongeskiktheidsbestuur en -ingryping (d.w.s. advies oor herontplooiing, aanpassing van die werkplek en hantering van toekomstige ongeskiktheid).
9. Indien akkommodasie ten opsigte van die taak of werkplek, of herontplooiing nie moontlik is nie, staan die Beleid oor Ongeskiktheidsverlof en Uitdienstrede weens Swak Gesondheid (PILIR) 30 werksdae aan die Departement toe om die administratiewe prosedures en die diensbeëindiging af te handel. Indien hierdie 30 dae nie voldoende is om die proses af te handel nie, kan nog 30 werksdae gebruik word, wat dan 'n totaal van 60 werksdae meebring waarin die werknemer se diens op grond van swak gesondheid beëindig kan word. Gedurende hierdie 30 of 60-dae tydperk, word daar aanvaar dat die werknemer aan "permanente ongeskiktheid" lei.
10. Die Hoof van die Departement, of sy gedelegeerde, sal die werknemer skriftelik in kennis stel of die aansoek om uitdienstrede weens swak gesondheid goedgekeur is. Indien die aansoek nie goedgekeur is nie, sal skriftelike redes gegee word.
11. In die geval waar 'n aansoek nie goedgekeur is nie, kan die werknemer 'n skriftelike grief aanhangig maak, ingevolge die dispuut resolusie meganisme en soos per die reëls van die RAVO (opvoeders) en die GPSSBC (staatsdienspersoneel). Indien die grief egter nie opgelos kan word nie, het die werknemer die reg om 'n dispuut by die RAVO (opvoeders) en GPSSBC (staatsdienspersoneel) te verklaar.
12. Bogenoemde aansoekvorms vorm 'n redelike dik pak en word nie by hierdie omsendbrief aangeheg nie. Die aansoekvorms en ander verbandhoudende inligting is beskikbaar op die Departement van Staatsdiens en Administrasie se webblad by www.dpsa.gov.za en kan verkry word deur die volgende skakels te volg:
12.1 Maak die webblad van die Departement van Staatsdiens en Administrasie oop.
12.2 Kliek op "Document archive" links op die bladsy.
12.3 Kliek op "Circulars".
12.4 Kliek op "Conditions of service".
12.5 Kliek op "5 December 2005". (Soek hier na die PILIR en die prosedure vir ongeskiktheid en uitdienstrede weens swak gesondheid).
12.6 Kliek op "6 Junie 2006" vir Bylae E.
13. Bring asseblief die inhoud van hierdie dokument onder die aandag van alle personeel.


GETEKEN: TS MATSELISO
HOOF: ONDERWYS
DATUM: 2008:12:17