1. Hierdie dokument verduidelik die beleid oor siekteverlof en dien as 'n werkdokument om prinsipale, toesighouers en werkgewers (opvoeders en staatsdienspersoneel) in staat te stel om siekteverlof meer doeltreffend te hanteer. Dit moet beskou word as aanvullend tot Omsendbrief 57/2003 oor siekteverlof.

2. Siekteverlof word in die volgende kategorieë ingedeel:
2.1 Normale siekteverlof
2.2 Tydelike onbevoegdheidsverlof (Kort periode: 29 dae of minder)
2.3 Tydelike onbevoegdheidsverlof (Lang periode: 30 dae of meer)
2.4 Permanente onbevoegdheidsverlof

3. NORMALE SIEKTEVERLOF
3.1 Werknemers is geregtig op 36 dae siekteverlof oor 'n siklus van drie jaar. (Huidige siklus: 1 Januarie 2007 tot 31 Desember 2009).
3.2 Ongebruikte siekteverlof verval aan die einde van elke driejaarsiklus en kan nie oorgedra word na die nuwe siklus toe nie.
3.3 Werknemers wat op grond van skielike siekte nie in staat is om vir diens aan te meld nie, moet hulle prinsipaal of toesighouer daarvan in kennis stel aan die begin van die werksdag. Dit sal alternatiewe reëlings moontlik maak sodat normale onderrigtye en -dienste gehandhaaf kan word. Prinsipale en toesighouers word aangemoedig om vereistes in hierdie verband te stel, in konsultasie met hulle personeel.
3.4 Die praktyk om teruggedateerde mediese sertifikate voor te lę, moet normaalweg vermy word.
3.5 'n Werknemer wat in sy of haar normale 36 dae-siekteverlofsiklus is en wat meer as twee keer binne 'n 8-weke-periode van werk afwesig was, moet, afgesien van die duur van die siekte of besering, 'n mediese sertifikaat voorlę na die derde tydperk van afwesigheid. Die sertifikaat moet noem dat die werknemer ongeskik was om te werk vir die duur van die drie afwesigheidstydperke, as gevolg van siekte of besering. Indien so 'n mediese sertifikaat nie voorgelę word nie, sal die derde afwesigheidstydperke gedek word deur normale vakansieverlof en/of jaarlikse verlof (met die werkgewer se toestemming) of, alternatiewelik, deur onbetaalde verlof.

Die 8-weke tydperk waarna hierbo verwys is, sal 'n kalendertydperk wees en sal begin op die eerste dag van 'n werknemer se afwesigheid as gevolg van siekte of besering. Enige daaropvolgende dag van afwesigheid as gevolg van siekte of besering na die bogemelde 8-weke-tydperk moet dan beskou word as die eerste dag van die volgende 8-weke-tydperk.

Die WKOD kan versoek dat 'n mediese sertifikaat voorgelę word ter ondersteuning van enige aansoek om siekteverlof (selfs vir periodes van minder as 3 dae), indien omstandighede die voorlegging van sodanige sertifikaat regverdig.

3.6 Alle aansoeke om siekteverlof as gevolg van 'n geestessiekte soos depressie of angsaanvalle, kan vergesel word van 'n mediese sertifikaat uitgereik deur 'n algemene praktisyn, maar slegs na die aanvanklike konsultasie. Die algemene praktisyn moet dan die werknemer verwys na 'n psigiater vir verdere behandeling. 'n Mediese sertifikaat van 'n algemene praktisyn is nie aanvaarbaar vir 'n tydperk van stress of depressie wat langer as twee dae duur nie.
3.7 In gevalle waar daar 'n patroon is wat dui op die misbruik van siekteverlof, bv. afwesig op Maandae, Vrydae, betaaldae, of enkele dae in die middel van die week, kan die werknemer versoek word om 'n mediese sertifikaat in te lewer vir tydperke van siekteverlof van korter as drie dae, indien herhaalde afwesighede van die werkplek meer as drie keer voorgekom het.
3.8 In gevalle waar die WKOD aansoeke om siekteverlof ontvang vir tydperke van drie dae of meer en sonder 'n mediese sertifikaat, sal twee dae as siekteverlof met volle salaris toegestaan word en die orige tydperk as ongemagtigde verlof sonder salaris.
3.9 In gevalle waar die tydperk van siekteverlof waarvoor aansoek gedoen is die tydperk wat deur die mediese praktisyn aanbeveel is, oorskry, sal 'n verdere mediese sertifikaat verkry moet word om die verlengde tydperk as siekteverlof te dek, anders sal laasgenoemde beskou word as onbetaalde verlof.
3.10 Vir elke 15 dae agtereenvolgende verlof sonder betaling, sal 'n werknemer se siekteverlofvoordele verminder met 1/36ste (een dag) van die verlofsiklus in die geval van opvoeders en 1/72ste (halwe dag) in die geval van staatsdienspersoneel.
3.11 Indien 'n inrigtinggebaseerde opvoeder wat opgehoopte verlof neem, of 'n kantoorgebaseerde opvoeder wat opgehoopte of jaarlikse verlof neem, of 'n staatsamptenaar wat jaarlikse of opgehoopte verlof neem, siek word gedurende daardie tydperk, kan hy of sy aansoek doen om daardie tydperk van siekte tydens die jaarlikse of opgehoopte verlof na siekteverlof te laat oorskakel. In sodanige gevalle sal 'n siektesertifikaat van 'n geregistreerde praktisyn binne drie dae na hervatting van diens voorgelę moet word.

4. TYDELIKE ONBEVOEGDHEIDSVERLOF: PILIR

Sien Omsendbrief 0045/2006, van 1 September 2006.


5. PERMANENTE ONBEVOEGDHEIDSVERLOF: PILIR

Sien Omsendbrief 0045/2006, van 1 September 2006.


6. DOKUMENTASIE EN ALGEMENE RIGLYNE
6.1 Alle aansoeke om verlof wat binne die 36 dae siekteverlofsiklus val, moet voorgelę word op vorm Z1(a) (met 'n mediese sertifikaat of sertifikate aangeheg, waar nodig). Daar moet te alle tye gehou word by die algemene reël dat siekteverlofaansoeke, waar moontlik, vooraf voorgelę moet word, of anders binne sewe werksdae van die eerste dag van afwesigheid.
6.2 Prinsipale en toesighouers moet voltooide siekteverlofaansoekvorms aanstuur aan die onderskeie personeelkantore by die Hoofkantoor vir prosessering binne veertien dae van ontvangs van die verlofaansoekvorms.
6.3 Verlofaansoekvorms moet nie opgehoop word nie, maar moet onmiddellik na die Hoofkantoor gestuur word. Hierdie werkwyse sal dit makliker maak om werknemers se siekteverlof doeltreffend te bestuur en sal die WKOD in staat stel om 'n akkurate rekord van werknemers se siekteverlof te verskaf op enige gegewe tydstip. Die WKOD kan die prinsipaal of toesighouer van wangedrag aankla indien hy of sy nalaat om aan hierdie opdrag gehoor te gee.
6.4 Verlofaansoeke moet voltooi word en in duplikaat aangestuur word na die Hoofkantoor vir prosessering. 'n Derde kopie van die voltooide vorm moet deur die aansoeker se prinsipaal of toesighouer vir rekorddoeleindes bewaar word.
6.5 Prinsipale en toesighouers moet 'n persoonlike verlofregister byhou sodat hulle verloftendense van hulle personeel kan bestuur en moniteer.
6.6 Verlofaansoeke op die Z1(a)-vorm moet deur die personeellid wat om verlof aansoek doen, geteken word en die afdeling "Aanbeveling deur Toesighouer/Bestuurder" moet voltooi en geteken word deur die prinsipaal of toesighouer.
6.7 In die geval waar die prinsipaal of toesighouer nie 'n aansoek om siekteverlof aanbeveel nie, moet hy of sy redes daarvoor verskaf aan die betrokke werknemer en aan die WKOD.

7. ALGEMEEN
7.1 Bring asseblief die inhoud van hierdie omsendbrief onder die aandag van alle personeel in u inrigting, kantoor of direktoraat, met inbegrip van diegene wat met verlof is, en versoek hulle om die dokument te teken en te dateer as bewys dat hulle van die inhoud kennis geneem het.
7.2 Waar daar sodanige behoefte bestaan, sal WKOD-beamptes beskikbaar wees om op versoek werkswinkels of opleidingsessies oor die siekteverlofbeleid aan te bied vir prinsipale, toesighouers of personeel.


GETEKEN: TS MATSELISO
HOOF: ONDERWYS
DATUM: 2008:12:17

Z1(a)-vorm: "Application for Leave of Absence"  (grootte: 20 KB)