1. AGTERGROND
1.1 Die Lid van die Uitvoerende Raad (LUR) vir onderwys het, soos voorgeskryf deur wetgewing, oorleg gepleeg met die werknemerspartye in die Provinsiale Raad op Arbeidsverhoudinge in die Onderwys (PRAVO) en die erkende skoolbeheerliggaamverenigings in hierdie provinsie, oor die mandjie bekostigbare opvoederposte wat vir onderwysinrigtings van die Wes-Kaap Onderwysdepartement (WKOD) beskikbaar is. Hy het vir 2010 die aantal bekostigbare opvoederposte met 322 vermeerder in vergelyking met die aantal poste wat in 2009 beskikbaar was. 140 van hierdie 322 poste is geoormerk vir inklusiewe onderwys en 112 poste vir die vermindering van die leerder-opvoeder-verhoudings in die Grondslagfase in die armste skole van die provinsie.
1.2 Die diensstate van gewone openbare skole is bepaal ingevolge die hersiene postevoorsieningsnorme soos goedgekeur deur die Hoofde van Onderwysdepartemente-komitee (HODKOM) in 2007 wat gevolg het op die jongste veranderinge aan die graad 12-kurrikulum. Die gewigtoekennings in graad 12 het verander as gevolg van die veranderinge aan die graad 12-kurrikulum wat vir die eerste keer in 2009 geïmplementeer is.
1.3 Voor 2005 is diensstate vir openbare spesiale skole elke 3de jaar uitgereik. Sedert 2005 is diensstate vir daardie sektor elke jaar uitgereik.
1.4 Die WKOD het, soos voorgeskryf deur wetgewing, oorleg gepleeg met die werknemerspartye in die PRAVO sowel as die erkende skoolbeheerliggaamverenigings in hierdie provinsie oor die diensstate van gewone openbare skole en spesiale openbare skole.

2. MAATREËLS (BREË BEGINSELS)
2.1 POSSTRUKTUUR
Die postestruktuur en beskrywings vervat in Kollektiewe Ooreenkoms 4/2003 van die Raad op Arbeidsverhoudinge in die Onderwys (RAVO) is van toepassing op diensstate van opvoederpersoneel. U aandag word gevestig op die feit dat die resolusies in die Beroepspesifieke Dispensasie vir Opvoeders (BSD) (Kollektiewe Ooreenkoms 1 van 2008 van die RAVO) nie die diensstate van openbare skole vir 2010 beïnvloed het nie.
2.2 SKOOLGRADERING
Skole word gegradeer ooreenkomstig die Skoolgraderingsnorme soos vervat in Kollektiewe Ooreenkoms 3/2006 van die RAVO. Sien asseblief ook paragraaf 2.1 hierbo.
2.3 POSTE WAT VERVAL OP 31 DESEMBER 2010
2.3.1 Ingevolge die maatreëls van die Hersiene Posverspreidingsmodel (HPVM), moet gewone openbare skole en spesiale openbare skole van hulle diensstate voorsien word voor die einde van September van die voorafgaande jaar. Dit beteken dat vir die 2010 akademiese jaar alle opvoederdiensstate wat uitgereik is aan gewone openbare skole en spesiale openbare skole sowel as alle addisionele poste wat geskep is vir en uitgereik is aan 'n openbare skool gedurende 2009 en 2010, as gevolg van óf 'n toename in leerderinskrywings óf die kurrikulumbehoeftes van 'n inrigting, aan die einde van 2010 sal verval.
2.3.2 Die ad hoc-poste (bo en behalwe die poste wat op die vaste diensstaat van 'n openbare skool voorkom) wat aan skole toegestaan is gedurende 2009 vir gebruik in 2010 om te verseker dat sekere openbare gewone skole 'n leerder:opvoeder-verhouding het van 33:1 (sekondêre skole) of 37:1 (primêre skole), verval ook aan die einde van 2010.
2.4 AD HOC-TOEKENNING: 458 AD HOC-POSTE (POSVLAK 1-POSTE)
Die WKOD kondig met genoeë aan dat, met die toename in die oorhoofse aantal bekostigbare poste, dit nou moontlik is om die ad hoc-poste vir 2010 te behou. Dit sal aan skole toegeken word soos hieronder uiteengesit:
2.4.1 Altesaam 458 poste is goedgekeur vir die 2010 akademiese jaar en sal aan skole toegeken word op 'n ad hoc-grondslag bo en behalwe die vaste diensstate.
2.4.2 Met behoorlike inagneming van elke inrigting se vaste diensstaat vir 2010 is hierdie 458 addisionele ad hoc-poste aan gewone openbare skole toegeken en wel soos volg:

  • Waar die model minder as 6 opvoederposte aan 'n klein sekondêre skool toegeken het, het ons die opvoederposte tot 6 aangevul. Indien die skool byvoorbeeld vir 4 onderwysers gekwalifiseer het, het ons dit aangevul met 2 ekstra poste;
  • Waar die model minder as 6 opvoederposte aan 'n sekondêre fase van 'n gekombineerde skool toegeken het, het die WKOD die opvoederposte tot 6 in die sekondêre fase aangevul. So bv., indien die skool vir 4 onderwysers in die sekondêre fase gekwalifiseer het, is daar 2 ekstra poste aan die skool toegeken;
  • Veertig poste is aan sommige eenpersoonskole toegeken;
  • Die res van die ad hoc-poste is aan skole toegeken met 'n leerder-opvoeder-verhouding van meer as 33:1 in sekondêre skole en/of meer as 37:1 in primêre skole, van die armste tot die rykste skool, tot die goedgekeurde aantal ad hoc-poste uitgeput is.
2.4.3 Hierdie ad hoc-poste wat (bo en behalwe die poste wat op die vaste diensstaat van 'n openbare skool verskyn) aan skole toegestaan is vir gebruik in 2010 om te verseker dat sekere gewone openbare skole 'n leerder:opvoeder-verhouding het van 33:1 (sekondêre skole) of 37:1 (primêre skole), verval aan die einde van 2010. Dit beteken dat hierdie poste nie permanent is nie.
2.4.4 Die WKOD behou die reg voor om enige ad hoc-toekenning te herbereken indien die inligting oor 'n skool, soos vervat in die SOBIS-aanlynopname van Maart 2009, nie korrek is nie.

L.W. Twee en veertig ad-hoc dansposte is toegeken om te dien as rondreisende poste wat meer as 42 skole in die provinsie bedien.

Een en twintig rekenaarposte vir die vak Inligtingstegnologie (IT) is oor die provinsie heen toegeken aan 21 skole wat sal dien as rekenaarsentrums. Van hierdie rekenaarsentrums word verwag dat hulle hierdie poste gedurende skoolure sal benut om hulle eie leerders te onderrig, maar ook om IT-klasse in die middae aan te bied aan naburige skole wat die vak neem maar nie onderwysers het wat die vak kan aanbied nie. Die name van hierdie rekenaarsentrums is op versoek beskikbaar van die Direktoraat: Menslikekapitaalbeplanning. Alhoewel die poste permanent is, behou die WKOD hom die reg voor om die pos te onttrek van 'n skool wat nie die pos gebruik ooreenkomstig die bepalings van die WKOD nie. Alhoewel die skole gekeur word, is die gekeurde skole verplig om aansoek te doen om hierdie poste.
2.5 TOEKENNING: FOKUSSKOOLPOSTE
2.5.1 Sewe-en-vyftig permanente fokusskoolposte is toegeken aan sekere fokusskole bo en behalwe die vaste opvoederdiensstate vir 2010.
2.5.2 Hierdie poste moet uitsluitlik gebruik word vir die doel waarvoor hulle toegeken is en moet die doelwitte van die Fokusskool-inisiatief bevorder. Die poste moet nie aangewend word om te verseker dat die skool se rooster balanseer nie. Geen moeite moet ontsien word om te verseker dat geskikte, professioneel-gekwalifiseerde onderwysers vir hierdie poste gewerf word nie. Indien dit nie moontlik is om 'n geskikte gekwalifiseerde onderwyser te werf nie, kan 'n onderwyser met die vereiste ondervinding in die vakgebied in aanmerking kom vir aanstelling, mits 'n volledige, skriftelike motivering ingedien word. Indien 'n skool nie die pos benut vir die doel waarvoor dit toegeken is of op die voorgeskrewe manier nie, sal die pos van daardie skool teruggeneem word en aan 'n ander skool toegeken word.
2.5.3 Met die oog op verbetering van onderwys en slaagsyfers, is daar aan sekere WWT-fokusskole, veral in Wiskunde en Fisiese Wetenskappe een addisionele pos (Posvlak 1) toegeken.
2.5.4 Die aantal toegekende fokusskoolposte vir 2010 word aangedui in die diensstaatbrief wat aan die inrigting gestuur word.
2.5.5 Die getal toegekende fokusskoolposte beïnvloed nie die skool se gradering nie. Alhoewel hierdie poste permanent is, sal hulle nie in aanmerking geneem word wanneer die aantal bevorderingsposte aan 'n skool toegeken word nie.
2.6 DINALEDI-POSTE
2.6.1 Die wyse waarop addisionele poste aan Dinaledi-skole toegeken is, (bo en behalwe die vaste diensstaat van daardie betrokke Dinaledi-skool) bly dieselfde.
2.6.2 Die reëls wat van toepassing is op die fokusskoolposte, geld ook vir Dinaledi-poste. Alhoewel hierdie poste permanent is, sal hulle nie in aanmerking geneem word wanneer die aantal bevorderingsposte aan 'n skool toegeken word nie.
2.7 POSTE VIR DIE GRONDSLAGFASE
2.7.1 In 2009 het ons 514 Grondslagposte aan primêre skole toegeken. Ons sal hierdie poste aan dieselfde skole toeken in 2010, indien hulle nog oop is. Hierdie poste is permanent. Twee faktore speel 'n rol by die bepaling of 'n skool vir sodanige pos sal kwalifiseer of nie: die getal leerders in die Grondslagfase en die armoedefaktor van die skool. Alhoewel hierdie poste permanent is, sal sommige skole nie hierdie poste in 2011 ontvang nie. Die feit dat 'n skool die pos in 2008, 2009 of 2010 ontvang het, beteken nie dat die skool outomaties vir die pos in 2011 kwalifiseer nie. Dit moet goed verstaan word dat die poste toegeken word aan armer skole om te help met die Geletterdheid- en Gesyferdheidresultate van daardie skole.
2.7.2 Ons verwag dat daardie skole wat hierdie pos vir 2010 ontvang het, sal toon waar die pos in die Grondslagfase gebruik is. Indien die pos in 'n spesifieke graad aangewend is, is die verwagting dat die klasgrootte van al die klasse in daardie graad minder as 35 leerders per opvoeder sal wees. Skole wat nie die pos op die voorgeskrewe wyse aanwend nie en geen vordering toon met die geletterdheid- en gesyferdheidsresultate in die geaffekteerde graad nie, die pos sal verbeur. Die pos mag nie gebruik word om die skool se rooster te balanseer nie.
2.7.3 Hierdie addisionele Posvlak 1-poste mag slegs in die Grondslagfase van die skool gebruik word.
2.7.4 Dit beteken dat alle betrokke skole ten minste die aantal Grondslagfase-poste moet hê wat normaalweg aan die skool toegeken word PLUS die ad hoc-Grondslagfase-pos(te) wat aan die skool toegeken is.
2.7.5 Die addisionele Posvlak 1-pos(te) wat toegeken is, mag op 'n permanente grondslag gevul word.
2.7.6 Hierdie poste word in berekening gebring wanneer die getal bevorderingsposte wat aan 'n skool toegeken word, bepaal word.
2.8 POSTE WAT DIE LEERDER:OPVOEDER-VERHOUDING IN NASIONALE KWINTIEL 1-SKOLE MOET VERLAAG
2.8.1 Om die leerder:opvoeder-verhouding in Grondslagfase te verlaag het ons 112 poste aan primêre skole in nasionale kwintiel 1 vir 2010 toegeken. Ons het hierdie poste toegeken in nasionale kwintiel 1-skole met die grootste getal Grondslagfaseleerders. Dit is gedoen om die Geletterdheid- en Gesyferdheidstrategie van die WKOD te ondersteun - 'n strategie wat beoog om die resultate van Geletterdheid en Gesyferdheid in die Grondslagfase te verbeter. Hierdie poste is permanent. Twee faktore speel 'n rol wanneer bepaal word of 'n skool vir sodanige pos kwalifiseer: die getal leerders in die Grondslagfase en die armoedefaktor in die skool. Alhoewel die pos permanent is, beteken dit nie dat 'n skool wat sodanige pos in 2010 gekry het dit outomaties ook in 2011 sal ontvang nie. Die pos word aan armer skole toegeken om te help met die Geletterdheid en Gesyferdheidresultate in daardie skole. Ons wil sien dat so 'n pos goed aangewend word.
2.8.2 Ons verwag dat daardie skole wat hierdie pos vir 2010 ontvang het, sal toon waar die pos in die Grondslagfase aangewend is. Indien die pos in 'n spesifieke graad aangewend is in die Grondslagfase, kan verwag word dat die klasgrootte vir al die klasse in daardie graad minder as 35 leerders per opvoeder sal wees. Skole wat nie die pos op die voorgeskrewe manier benut nie en geen vordering toon in die resultate vir geletterdheid en gesyferdheid nie sal die pos verbeur. Die pos moet nie gebruik word om die skool se rooster te balanseer nie.
2.8.3 Hierdie addisionele Posvlak 1-poste mag slegs in die Grondslagfase van die skool benut word.
2.8.4 Dit beteken dat alle skole wat geraak word ten minste oor die getal Grondslagfaseposte moet beskik wat normaalweg aan die skool toegeken word PLUS die Grondslagfasepos(te) wat aan die skool toegeken is.
2.8.5 Die addisionele Posvlak 1-pos(te) wat toegeken is, kan in 'n permanente hoedanigheid gevul word.
2.8.6 Hierdie poste word nie in berekening gebring by die bepaling van die getal bevorderingsposte wat aan 'n skool toegeken word nie.
2.9 LEERONDERSTEUNINGSPOSTE
Die Leerondersteuningsposte by gewone openbare skole is geskakel met die dienstate van onderwysdistrikte en verskyn dus nie op die dienstate van skole nie, buiten waar die poste toegeken is aan gewone openbare skole met goedgekeurde eenheidsklasse.
2.10 TERAPEUTEPOSTE
Vier addisionele terapeuteposte is vir die 2010 akademiese jaar toegeken. Dit bring die totale aantal poste wat aan spesiale skole toegeken word, op 136 te staan.
2.11 SIELKUNDEPOSTE: SPESIALE OPENBARE SKOLE
Die sielkundeposte by spesiale openbare skole, waar van toepassing, is deel van die bevorderingsposte.
2.12 HERSIENING VAN 2010 SE DIENSSTATE
2.12.1 Die WKOD het die aantal bekostigbare poste onder inrigtings onder sy beheer versprei in ooreenstemming met die HPVM en die maatreëls soos uiteengesit in hierdie omsendbrief. Slegs beamptes wat werk in die Direktoraat: Menslikekapitaalbeplanning van die WKOD mag 'n opvoederpersoneeldiensstaat vir 'n skool druk.
2.12.2 Ons het leerderinskrywingstotale soos op 3 Maart 2009 gebruik (soos aan skole bekend gemaak is) om die skool se opvoederdiensstaat te bepaal. Die leerdertotale sluit nie preprimêre skoolleerders in nie. Indien 'n skool 'n skielike en afsienlike afname in sy inskrywingstal ervaar het na 3 Maart 2009, sou die skool se diensstaat teruggehou gewees het en dan verminder gewees het indien die skoolbestuur nie 'n goeie rede vir hierdie skielike afname in inskrywings kon gee nie. Dit kon lei tot dissiplinêre verhore. Daardie skole wat nie die vaslegging van leerdergegewens op die SOBIS teen 3 Maart 2009 voltooi het nie, of wat groot getalle leerders na 3 Maart 2009 ingeskryf het sal vir addisionele poste moet aansoek doen na die 10de skooldag in 2010.
2.12.3 Skole sal toegelaat word om die berekening van hulle opvoederdiensstaat te betwis slegs deur hulle 2009 leerderinskrywing te gebruik. Om die berekening te betwis, sal die skool moet bewys, buite enige twyfel, dat die Direktoraat: Menslikekapitaalbeplanning van die WKOD skriftelik ingelig is voor 3 Maart 2009 dat die skool probleme ervaar het met die bywerk van hulle SOBIS-inligting voor 3 Maart 2009. Geen ander rede sal aanvaar word nie. Sodanige skole sal toegelaat word om die 2010 personeeldiensstaat aanlyn te betwis vanaf 10:00 op 16 September 2009 tot 15:00 op 18 September 2009. Geen brief aan enige WKOD-beampte oor hierdie kwessie sal aanvaar word nie. Geen laat betwistings sal deur die WKOD oorweeg word nie.
2.12.4 Die WKOD besef egter dat daar hoofde van gewone openbare skole kan wees wat hulle diensstate sal wil laat hersien as gevolg van buitengewone verandering in die omstandighede by hulle skole. Versoeke om die hersiening van sodanige diensstate (aansoek om kurrikulumposte) moet behoorlik gemotiveer word en kan aanlyn ingedien word op SOBIS vanaf 10:00 op 5 Oktober 2009 tot 15:00 op 23 Oktober 2009. Al hierdie aanlynaansoeke sal teen 30 November 2009 deur die WKOD se Direktoraat: Menslikekapitaalbeplanning geprosesseer wees. Geen laat aansoeke sal oorweeg word nie. Appèl teen uitkomste sal nie toegelaat word nie. Kriteria wat sal geld tydens die proses van die toekenning van ekstra poste aan skole verskyn in Menslikekapitaalbeplanningsminuut 0008/2009.
2.13 AFSKAFFING VAN POSTE AS GEVOLG VAN MINDER INSKRYWINGS OP DIE EERSTE SKOOLDAG VAN 2010
2.13.1 Waar 'n skool 'n verlaging in sy leerderinskrywing ondervind wanneer die skool in 2010 heropen, d.w.s. waar die leerderinskrywing op die eerste skooldag laer is as die leerderinskrywing soos weerspieël op sy diensstaat vir 2010, mag poste slegs gevul word gelykstaande aan die leerder:opvoeder-verhouding vir daardie skool se diensstaat vir 2010, die ratio 1:37 in primere skole en 1:33 in sekondere skole moet gebruik word.
2.13.2 Bogenoemde beteken dat indien 'n skool se diensstaat vir 2010 (gegrond op die SOBIS 2009-data) van 1000 leerders voorsiening maak vir 30 poste (wat 'n leerder:onderwyser-verhouding van 33,33:1 vir die gewone openbare skool gee) en die leerderinskrywing op die eerste skooldag van 2010 slegs 920 is, die prinsipaal slegs 28 poste mag vul (920÷ 33,33 = 28 [27, 60]). Die oorblywende twee poste sal afgeskaf word en toegeken word aan skole waar daar groei was. Hierdie hertoekenning sal ook gegrond word op die aantal leerders wat op SOBIS geregistreer is.
2.13.3 Bogenoemde maatreël is NIE van toepassing op gewone openbare skole waar ALLE poste permanent gevul is nie. Indien 'n pos egter om watter rede ook al vakant sou raak, sal bogenoemde maatreël geld.
2.14 HERBEREKENING VAN OPVOEDERDIENSSTATE AS GEVOLG VAN 'N VERANDERING IN LEERDERINSKRYWINGS TYDENS 2010
2.14.1 Die WKOD behou die reg voor om Posvlak 1-poste af te skaf indien daar gedurende die loop van 2010 'n verlaging is in die skool se leerderinskrywing. In sulke gevalle sal opvoeders wat tydelik aangestel is, na ander poste by ander inrigtings oorgeplaas word. Wanneer opvoeders dus tydelik gewerf word, moet hoofde van inrigtings aansoekers inlig dat hulle aangestel word met dien verstande dat hulle dalk oorgeplaas kan word na ander inrigtings indien hulle poste afgeskaf sou word as gevolg van 'n verlaging in leerderinskrywing.
2.14.2 Alle kontrakaanstellings mag slegs gemaak word tot 31 Maart 2010. Substantiewe kontrakaanstellings wat vanaf 1 April 2010 gemaak word, kan tot 31 Desember 2010 gemaak word indien die skool vir 'n pos kwalifiseer.
2.14.3 Ons verwagting is dat alle skole hulle inskrywingstotale reeds sou bygewerk het op SOBIS teen Dinsdag, 2 Maart 2010. Die opvoederdiensstaat van alle skole wat 'n leerderinskrywing het op Dinsdag, 2 Maart 2010 wat minder is as die leerderinskrywing van 3 Maart 2009, sal herbereken word teen 12 Maart 2010. In die geval waar 'n skool 'n pos of poste moet verloor, sal die getal substantiewe kontrakposte gelyk aan of minder as die getal poste wat die skool verloor, vanaf 1 April 2010 nie meer toegeken wees nie.
2.14.4 In gevalle waar daar 'n toename in leerderinskrywings was vanaf 3 Maart 2009 tot 26 Januarie 2010, sal die skool in die periode 13 Januarie 2010 tot 29 Januarie 2010 aanlyn mag aansoek doen om 'n groeipos. Die inskrywingstotaal wat in ag geneem sal word, is die inskrywingstotaal op SOBIS wanneer aansoek gedoen word.
2.14.5 Die opvoederdiensstaat van 'n skool wat doelbewus leerders wat die skool verlaat het teen 2 Maart 2010 nie gederegistreer het nie, sal ook herbereken word.
2.15 SKEPPING VAN POSTE AS GEVOLG VAN 'N VERHOGING IN DIE INSKRYWINGS VIR 2010
2.15.1 Gewone openbare skole wat by die WKOD aansoek doen om die skep van addisionele poste op grond van 'n toename in leerderinskrywings of ander kontekstuele faktore, moet aanlyn voorgelê word, via SOBIS. Geen aansoek sal oorweeg word indien dit nie aanlyn, via SOBIS gedoen is nie. Hierdie aansoeke moet voorgelê word tydens die periode vanaf 13 Januarie 2010 tot 15:00 op Vrydag, 29 Januarie 2010.
2.15.2 Prinsipale moet asseblief op die volgende let:

  • Aansoeke om addisionele poste sal slegs oorweeg word tot aan die einde van die eerste skoolkwartaal in Maart 2010;
  • Die nominasie van 'n opvoeder vir addisionele poste by 'n skool (waarom aansoek gedoen word as gevolg van groei en/of kurrikulumbehoeftes van die skool), kan nie plaasvind tensy skriftelike goedkeuring van die WKOD se Direkteur: Menslikekapitaalbeplanning of sy/haar gevolmagtigde verkry is vir die skep van daardie addisionele pos nie.
3. 2010 DIENSSTATE
3.1 VUL VAN POSTE WANNEER DIE AANTAL POSTE TOEGENEEM HET
3.1.1 Waar daar 'n toename in die aantal opvoedersposte is wat aan die gewone openbare skole toegeken is, mag nuwe poste op die volgende wyses gevul word:

  • Passing en plasing van botallige personeel (Let daarop dat die passing en plasing van botallige opvoeders 'n voortdurende proses is, wat voorkeur sal geniet bo die adverteer van poste.);
  • Deur advertensies in die Vakaturelys met die oog op die permanente vul van sulke poste (Dit beteken dat Posvlak 1- en bevorderingsposte so gou moontlik geadverteer moet word.);
  • Op 'n permanente of tydelike grondslag, of in waarnemende hoedanigheid ingevolge bestaande beleidsmaatreëls.
3.2 VUL VAN POSTE WANNEER DIE AANTAL POSTE VERMINDER IS
3.2.1 Waar daar 'n afname in die aantal poste is wat aan 'n gewone openbare skool of spesiale openbare skool toegeken is (d.w.s. 'n pos of poste is afgeskaf), kan die skool slegs poste vul tot en met die getal soos aangedui op die diensstaat. Skole mag dus nie meer poste vul as waarvoor sy diensstaat voorsiening maak nie.
3.2.2 Indien daar reeds meer permanente opvoeders by die skool is as die aantal poste waarvoor die diensstaat van daardie skool voorsiening maak, mag die skool nie enige verdere tydelike of permanente aanstellings maak nie.
3.2.3 Hoofde van inrigtings word ook daaraan herinner dat die WKOD nie waarnemende onderwysers toeken aan 'n inrigting waar daar meer permanente opvoeders as poste is nie.
3.2.4 Indien 'n permanente opvoeder botallig verklaar word, moet dit geskied ingevolge Kollektiewe Ooreenkoms 2/2003 van RAVO.
3.3 VUL VAN GEADVERTEERDE POSTE
3.3.1 Alle poste wat reeds in 'n Departementele Vakaturelys geadverteer is, mag permanent gevul word, mits die pos op die diensstaat vir 2010 verskyn.
3.3.2 Indien 'n geadverteerde pos nie op die diensstaat vir 2010 verskyn nie, is die inrigting nie geregtig op die pos nie en sal sodanige pos geag foutiewelik geadverteer te wees.
3.3.3 Die bepaling dat 'n geadverteerde pos (veral 'n bevorderingspos) slegs gevul kan word indien dit nie 'n addisionele botallige opvoeder skep nie, bly van krag.
3.3.4 Indien hoofde van inrigtings en beheerliggame van mening is dat die posbeskrywing van die geadverteerde pos nie langer aan die kurrikulumbehoeftes van die inrigting voldoen nie, mag hulle die WKOD versoek om die pos te beskou as foutiewelik geadverteer. 'n Uitgebreide verduideliking moet so 'n versoek vergesel.
3.4 VUL VAN AD HOC-POSTE
Ad hoc-poste kan slegs in tydelike hoedanigheid gevul word. Ad hoc-poste sal geldig wees tot 31 Maart 2010. Hulle sal slegs deur die skool behou word na daardie datum indien die skool steeds daarvoor kwalifiseer na 'n herberekening gebaseer op 2 Maart 2010 se inskrywingstotaal. Die aanstelling van 'n ad hoc-posbekleër mag nie langer as 31 Desember 2010 geld nie.
3.5 BOTALLIGE OPVOEDERS
3.5.1 Opvoeders wat reeds botallig verklaar is op grond van vorige diensstate en in ooreenstemming met vorige prosesse en wat steeds botallig is, behou hulle botallige status. Hierdie opvoeders sal hanteer word ingevolge die geldende kollektiewe ooreenkomste van die RAVO.
3.5.2 Hierdie botallige opvoeders (verwys na paragraaf 3.5.1) kan geabsorbeer word in vakatures op die nuwe diensstaat deur middel van passing en plasing (sien paragraaf 3.1.1 (a)
3.5.3 Soos aangedui in paragraaf 3.2.4 hierbo, moet permanente opvoeders botallig verklaar word ingevolge Kollektiewe Ooreenkoms 2/2003 van die RAVO.

4. NAVRAE
Rig asseblief alle navrae aangaande hierdie omsendbrief (maatreëls, ens.) aan kringspanbestuurders.

5. ALGEMEEN
Bring asseblief die inhoud van hierdie omsendbrief onder die aandag van alle opvoeders en lede van die beheerliggaam.


GETEKEN: BK SCHREUDER
HOOF: ONDERWYS
DATUM: 2009:08:28