1. Die Wes-Kaap Onderwysdepartement (WKOD) is verbind tot die deurlopende ondersteuning en versterking van die implementering van die Nasionale Kurrikulumverklaring soos bepaal deur nasionale beleid (2002), die WKOD Geletterdheid- en Gesyferdheidstrategie (2006 - 2016) en die Grondslag-vir- Leerveldtog (2008 - 2011).
2. Met hierdie doel voor oë is kurrikulumbeleidboeke vir die Grondslag- (Graad R tot 3) en Intermediêre (Graad 4 tot 6) fase saamgestel. Hierdie boeke bevat die volledige Nasionale Kurrikulumverklaring (NKV) en Nasionale Beleid oor Assessering en Kwalifikasies vir Skole in die AOO-band (NBAK) vir elke fase. Die kombinasie van die NKV-oorsig, al die NKV-leerarea-verklarings en die NBAK in een boek, spesifiek tot 'n fase, voorsien aan onderwysers en beamptes maklike toegang tot fase-spesifieke beleid.
3. Die Direktoraat: Kurrikulum AOO maak met graagte bekend dat hierdie boeke in Junie 2009 soos volg uitgedeel sal word:

  • aan alle openbare primêre skole: Die getal eksemplare van Grondslagfase- en Intermediêrefaseboeke wat by elke skool afgelewer sal word, is bepaal vanaf SOBIS-data. Daar is 'n Grondslagfaseboek vir elke onderwyser van graad R tot 3 en 'n Intermediêrefaseboek vir elke onderwyser van graad 4 tot 6, tesame met een Grondslagfase- en een Intermediêrefaseboek vir die prinsipaal. Indien die getal onderwysers verskil van die getal boeke wat voorsien is, word prinsipale versoek om die aangehegte Skool- afleweringsverslag te voltooi.
  • aan alle onderwysdistrikskantore: 'n Skedule met 'n verspreidingsontleding vir beamptes sal aan die onderwysdistriksdirekteur gestuur word.
4. Hierdie boeke bevat nie nuwe beleid nie, maar bestaande beleid wat saamgevoeg is in 'n fase-spesifieke boek. Die NBAK is egter sedert die samestelling van hierdie boek gewysig en hierdie wysigings moet ook nou geïnkorporeer word. Verwys in hierdie verband na Omsendbrief 0018/2009: Vorderings- en Bevorderingsvereistes vir Graad 1 - 9 vanaf 2009.  Bylae A voorsien die toepaslike addendums wat in hierdie beleidboeke geplak moet word.
5. Hierdie beleidboeke moet gevoeg word by die kurrikulumbronpakket wat vanjaar aan elke graad 1- tot graad 6-onderwyser verskaf is in die vorm van WKOD-werkskedules en Gidse (in blou bokse). Elke onderwyser moet nou 'n beleidboek ontvang om saam met die werkskedule te bewaar. Die twee gaan hand aan hand - beleid synde die brondokument vir die werkskedules.
6. Graad R-onderwysers moet ook 'n eksemplaar van die Grondslagfaseboek ontvang.
7. Hierdie beleidboeke bly die eiendom van die skool/onderwysdistrik en moet dus gestempel en in die inventaris opgeneem word.
8. Die WKOD Direktoraat: Kurrikulum AOO sal terugvoering oor hierdie bron verwelkom. Kommentaar kan gestuur word aan givanwyk@pgwc.gov.za of mcameron@pgwc.gov.za


GETEKEN: BK SCHREUDER
HOOF: ONDERWYS
DATUM: 2009:06:17

Skoolafleweringsverslag  (grootte: 13 KB)
Bylae A  (grootte: 11 KB)