Goedkeuring is verleen vir die verhoging van die per kapita-subsidie ten opsigte van kinders in graad R by goedgekeurde graad R-klasse/leerplekkepreprimêre klasse terugwerkend vanaf 1 April 2008 (2de kwartaal). Die per kapita-subsidie is soos volg verhoog:

Skole in kwintiele 1 & 2 van R9 tot R12
Skole in kwintiel 3 van R8 tot R9
Skole in kwintiel 4 van R4 tot R6
Skole in Kwintiel 5 van R4 tot R5.

Slegs die subsidie van skole wat kwalifiseer vir die minimum subsidie van R24 000 per jaar se subsidie bly onveranderd. Die subsidies van sommige van die skole/leerterreine se subsidies is reeds gedoen en die agterstallige gelde in hul rekeninge betaal. Die ander skole/leerterreine sal hulle agterstallige gelde vroeg in die nuwe jaar ontvang.

Hoofde van skole met graad R en hoofde van inrigtings vir vroeë kindontwikkeling (VKO) word daaraan herinner dat aansoeke om subsidie korrek en volledig voltooi en onderteken moet word alvorens dit aan die onderwysdistrikskantoor voorgelê word. Onvolledige aansoeke of aansoeke wat direk aan die Hoofkantoor voorgelê word, moet ongelukkig terugverwys word, wat lei tot vertragings in die goedkeuring daarvan asook in die betaling van die eise.

Die kwartaallikse subsidie-eise vir 2009 moet stiptelik voor of op die volgende datums via die plaaslike onderwysdistrikskantoor aan die Hoofkantoor voorgelê word:

Kwartaal	Onderwysdistrikskantoor	Hoofkantoor
1ste Kwartaal 2009	Vrydag, 6 Maart 2009	Vrydag, 27 Maart 2009
2de Kwartaal 2009	Vrydag, 22 Mei 2009	Vrydag, 12 Junie 2009
3de Kwartaal 2009	Vrydag, 28 Augustus 2009	Vrydag, 18 September 2009
4de Kwartaal 2009	Vrydag, 6 November 2009	Vrydag, 27 November 2009

Skole/leerplekke wat versuim om hul eise teen die bepaalde keerdatums in te dien, loop die gevaar om hul subsidie te verbeur, aangesien die WKOD talle versoeke om finansiële ondersteuning van ander behoeftige skole met graad R-klasse ontvang. Skole wat ondersteuning nodig het met die voltooiing van die subsidie-eisvorms kan met die Vroeëkindontwikkeling-kurrikulumadviseur by die distrikskantoor in verbinding tree.

Na aanleiding van talle navrae in bogenoemde verband wil die Departement dit duidelik stel dat die vergoeding van graad R-opvoeders (uitgesluit opvoeders op die WKOD se diensstaat) die verantwoordelikheid van die beheerliggaam van die betrokke instansie is. Dit is derhalwe noodsaaklik dat die beheerliggaam van 'n preprimêre leerterrein 'n dienskontrak met die graad R-opvoeder aangaan, waarin laasgenoemde se diensvoorwaardes duidelik uiteengesit word.

In die lig van die stygende lewenskoste word as riglyn vir die vergoeding van graad R-opvoeders aanbeveel dat die minimum vergoeding op R3 500 per maand vasgestel word.

Die subsidie wat deur die WKOD aan VKO-leerterreine betaal word, moet uitsluitlik vir die bedryf van die graad R-klas(se) aangewend word. Sewentig persent (70%) van die subsidie moet benut word as bydrae tot die vergoeding van die betrokke onderwysers, terwyl die balans (30%) vir die aankoop van leerderondersteuningsmateriaal aangewend moet word. Omdat die WKOD nie die volle gelde vir die bedryf van graad R-klasse en die salaris van die graad r-praktisyn voorsien nie, is dit die beheerliggaam van die instansie se verantwoordelikheid om die tekort deur middel van fondsinsameling en die heffing van skoolfondse aan te vul.

Aangesien fondse beperk is, word dit voorts aanbeveel dat skole/inrigtings slegs leerondersteuningsmateriaal van goeie gehalte aanskaf sodat graad R-leerders die maksimum voordeel daaruit kan trek.

Dit moet beklemtoon word dat enige wanbesteding van graad R-fondse sal lei tot die opskorting van 'n preprimêre leerterrein se subsidie. Om hierdie rede is dit noodsaaklik dat die verkorte finansiële staat (Bylae C) wat kwartaalliks saam met die aansoek om subsidie ingedien word, sorgvuldig voltooi moet word.

'n Belangrike vereiste vir voortgesette registrasie is dat 'n minimum van 20 leerders per graad R-klas gehandhaaf word. Waar skole/sentrums (behalwe dié in afgesonderde landelike gebiede) nie daarin slaag om hierdie vereiste na te kom nie, kan sodanige registrasie en/of subsidie onbepaald opgeskort word tot tyd en wyl aan hierdie vereistes voldoen word.