1. Kufakwe apha, njengeziHlomelo A - H, izintlu zokugqibela (final lists) zoncwadi olumiselweyo lweBakala 12 zazo zonke iilwimi zaseburhulumenteni kumanqanaba eeLwimi zeNkobe nawoLwimi lokuQala oLongezelelweyo kwizikolo zikarhulumente ukususela kuNovemba 2009 ukuya kutsho kuMatshi 2012. Izintlu zoncwadi olumiselweyo lwe-Afrikansi nesiXhosa iiLwimi zeSibini ezoLongezelelweyo zika-2009 zifakiwe nazo kwangokunjalo.
2. Ezi zintlu zenziwe liSebe leMfundo likazwelonke, ngokubonisa namasebe emfundo amaphondo.
3. Ezi zintlu zibandakanya iinoveli, iidrama nemibongo kulwimi ngalunye kwiiLwimi ezili-11 zaseMzantsi Afrika zeNkobe nezokuQala eZongezelelweyo. Amabalana amafutshane eAfrikansi kuLwimi lokuQala noLwimi lweSibini kunye noLwimi lokuQala oLongezelelweyo adwelisiwe nawo kwangokunjalo. Zidwelisiwe needrama zoLwimi lwesiXhosa lweSibini oLongezelelweyo.
4. Zimi ngolu hlobo lulandelayo iimfuno zoncwadi olumiselweyo zoviwo lweSatifikethi seMatriki sikaZwelonke:

  • ULWIMI LWENKOBE

    Ukulungiselela iinjongo zoviwo lwangaphandle, izikolo mazikhethe itayitile ibe nye kuhlobo ngalunye kwezi ntlobo zintathu (iNoveli, iDrama neMibongo) zoncwadi lokufundwa kwiiLwimi zeNkobe:

    Inoveli

    Iinoveli ezingeelwimi ezili-11 zaseMzantsi Afrika zidweliswe kwisiHlomelo A. Izikolo mazikhethe ibe nye kwiitayitile ezidwelisiweyo emayifundwe.

    Idrama

    Iidrama kulo ngalunye lweelwimi ezili-11 zaseMzantsi Afrika zidweliswe kwisiHlomelo A. Izikolo mazikhethe ibe nye kwiitayitile ezidwelisiweyo emayifundwe.

    Imibongo

    Imibongo emayikhethwe ngo-2009 kulwimi ngalunye kwezili-11 zaseMzantsi Afrika idweliswe kwisiHlomelo E.

    ISebe leMfundo likazwelonke liya kwazisa amasebe emfundo amaphondo ngesetyhula ukuba yeyiphi na imibongo eza kufundwa ukulungiselela iinjongo zoviwo lwangaphandle ngo-2010 no-2011. Le ngcaciso iya kukhutshwa ngoJuni 2009 nangoJuni 2010 ngokulandelelanayo, yaye iSebe i-WCED liya kwazisa izikolo ngokufanelekileyo.

  • ULWIMI LOKUQALA OLONGEZELELWEYO

    Izikolo mazikhethe iintlobo zibe mbini kwezi zine (iNoveli, iDrama, iBali eliFutshane, iMibongo) zoncwadi lokufundwa kuLwimi lokuQala oLongezelelweyo. Ukulungiselela iinjongo zoviwo, inye itayitile kulo ngalunye lweentlobo ezimbini ezikhethiweyo ekufuneka ifundwe.

    Inoveli

    Iinoveli ezingeelwimi ezili-11 zaseMzantsi Afrika zidweliswe kwisiHlomelo A. Ukuba olu hlobo loncwadi luye lwakhethwa, izikolo mazikhethe ibe nye kwiitayitile ezidwelisiweyo ekufuneka ifundwe.

    Idrama

    Iidrama ezingeelwimi ezili-9 zaseMzantsi Afrika zidweliswe kwisiHlomelo D. Ukuba olu hlobo loncwadi lukhethiwe, izikolo mazikhethe ibe nye kwiitayitile ezidwelisiweyo ekufuneka ifundwe.

    Uyacelwa uqaphele ukuba akukho ncwadi zedrama zimiselweyo kwisiNdebele nakwisiXhosa kuLwimi lokuQala oLongezelelweyo yaye ke ngoko olu hlobo alusayi kukhethwa kwizifundo zezi lwimi zombini.

    IBalana eliFutshane

    Amabali amakakhethwe ngo-2009 kwiAfrikansi nakuLwimi lwesiNgesi lokuQala oLongezelelweyo adweliswe kwisiHlomelo F.

    Akakabhengezwa amabalana amakakhethwe eeLwimi eZongezelelweyo ngo-2009. ISebe leMfundo likazwelonke liya kuwazisa la mabalana ekuhambeni kwexesha, yaye iSebe i-WCED liya kwazisa izikolo ngokufanelekileyo.

    ISebe leMfundo likazwelonke liya kwazisa amasebe emfundo amaphondo ngesetyhula ukuba ngawaphi na amabalana amafutshane aya kufundwa ukulungiselela iinjongo zoviwo lwangaphandle ngo-2010 nango-2011. Le ngcaciso iya kukhutshwa ngoJuni 2009 nangoJuni 2010 ngokulandelelanayo, yaye iSebe i-WCED liya kwazisa izikolo ngokufanelekileyo.

    Imibongo

    Imibongo emayikhethwe ngo-2009 kulwimi ngalunye kwezili-11 zaseMzantsi Afrika idweliswe kwisiHlomelo G.

    ISebe leMfundo likazwelonke liya kwazisa amasebe emfundo amaphondo ngesetyhula ukuba yeyiphi na imibongo eya kufundwa ukulungiselela iinjongo zoviwo lwangaphandle ngo-2010 nango-2011. Le ngcaciso iya kukhutshwa ngoJuni 2009 nangoJuni 2010 ngokulandelelanayo, yaye iSebe i-WCED liya kuthi ke lona lazise izikolo ngokufanelekileyo.

  • IILWIMI ZESIBINI EZONGEZELELWEYO

    Ukulungiselela iinjongo zoviwo, izikolo mazifundisise amabalana amafutshane akhethiweyo eAfrikansi kuLwimi lweSibini oLongezelelweyo. KwisiXhosa uLwimi lweSibini oLongezelelweyo, izikolo mazikhethe enye yeetayitile ezidwelisiweyo zedrama kufundwe yona. Ezi zintlu zoncwadi olumiselweyo kuLwimi lweSibini oLongezelelweyo zifakwe kwisiHlomelo H.
5. Ziyacelwa iinqununu ukuba zazise okubhalwe kule setyhula bonke ootitshala beelwimi.


ISAYINWE: NGU-BK SCHREUDER
INTLOKO: YESEBE LEMFUNDO
UMHLA: 2008:12:08

IsiHlomelo A  (ubukhulu: 28 KB)
IsiHlomelo B  (ubukhulu: 25 KB)
IsiHlomelo C  (ubukhulu: 27 KB)
IsiHlomelo D  (ubukhulu: 23 KB)
IsiHlomelo E  (ubukhulu: 42 KB)
IsiHlomelo F  (ubukhulu: 17 KB)
IsiHlomelo G  (ubukhulu: 31 KB)
IsiHlomelo H  (ubukhulu: 20 KB)