1. Afdeling 18 van die Regulasies vir die Afneem, Administrasie en Bestuur van Assessering vir die Nasionale Senior Sertifikaat (Staatskoerant 31337, Augustus 2008) skryf die omstandighede voor waaronder 'n aanvullende eksamen aan kandidate toegestaan kan word.
2. Die eerste Nasionale Senior Sertifikaat Aanvullende Eksamens sal in Februarie/Maart 2009 afgeneem word vir kandidate wat aan die vereistes voldoen soos uiteengesit in bogenoemde regulasies. Die vereistes kan soos volg opgesom word:
2.1 Indien 'n kandidaat nie in die finale eksterne eksamen aan die minimum slaagvereistes voldoen het nie, maar nie meer as twee vakke vereis om die Nasionale Senior Sertifikaat te behaal nie, mag hy of sy binne 21 dae na die bekendmaak van die uitslae vir 'n maksimum van twee vakke vir die aanvullende eksamen registreer. Hierdie twee vakke moet vakke wees wat die kandidaat in die vorige jaareindeksamen geskryf het.
2.2 Indien 'n kandidaat medies onbevoeg is en as 'n gevolg daarvan afwesig is van een of meer eksamens, mag hy of sy vir die aanvullende eksamen registreer. Dokumentêre bewys moet by die registrasiesentrum ingedien word.
2.3 'n Kandidaat wat dokumentêre bewys ingedien het dat hy of sy in aanmerking kom vir toelating tot 'n hoëronderwysinrigting of vir 'n beroep maar nie voldoen aan die vereistes van die hoëronderwysinrigting of die vereistes vir die bepaalde beroep nie, mag vir 'n maksimum van twee vakke registreer.
3. Die NSS-aanvullende eksamen begin op 17 Februarie en loop op 2009 Maart 25 ten einde.
4. Twee eksamensessies is vir elke dag geskeduleer. Die oggendsessie sal om 09:00 begin en die namiddagsessie om 14:00.
5. Aangeheg by hierdie omsendbrief is 'n afskrif van die finale rooster vir die 2009 Nasionale Senior Sertifikaat Aanvullende Eksamen.
6. Registrasievorms vir die aanvullende eksamen sal onmiddellik na die bekendmaak van die uitslae aan alle kandidate gepos word wat in aanmerking kom vir die eksamen. Die ingevulde registrasievorms moet na die volgende adres gepos word: 
Direktoraat: Eksamenadministrasie
Vir aandag: Mev C Abrahams
Wes-Kaap Onderwysdepartement
Privaatsak X9114
KAAPSTAD
8000

of dit kan per hand afgelewer word by

WKOD-inbelsentrum 
Grand Central Towers: 2de vloer
Laer Parlementstraat
KAAPSTAD
7. Die sluitingsdatum vir hierdie inskrywings vir die aanvullende eksamen is Vrydag, 23 Januarie 2009. Prinsipale en kandidate word versoek om streng by hierdie datum te hou aangesien laat inskrywings nie aanvaar sal word nie.
8. Eksamensentra vir die afneem van die aanvullende eksamen sal by sekondêre skole en ander lokale geskep word, soos deur die Departement bepaal. Indien 'n skool nie as lokaal vir die aanvullende eksamen kan dien nie, moet die prinsipaal sy of haar IBB-adviseur teen nie later nie as Vrydag, 23 Januarie 2009 daarvan in kennis stel sodat 'n ander lokaal gereël kan word.
9. Dieselfde hoofopsieners en opsieners wat by die afneem van die November 2008 Nasionale Senior Sertifikaat-eksamen betrokke was, sal gebruik word om by hierdie eksamen toesig te hou, soos in hulle ondertekende kontrakte bepaal word.
10. Die hoofopsiener moet seker maak dat kandidate die eksamenlokaal binnegaan 35 minute voor die amptelike aanvangstyd van die eksamensessie. Hierdie tyd moet soos volg gebruik word:
10.1 Die eerste 25 minute moet gebruik word om die kandidate in hulle korrekte sitplekke te laat sit, om die vraestelle uit te deel, ens.
10.2 Gedurende die volgende 10 minute moet die kandidate die geleentheid kry om deur die vraestelle te lees.
10.3 Niemand mag skryf of aantekeninge maak gedurende enige deel van hierdie 35 minute nie. 'n Oortreding van hierdie reël sal as 'n onreëlmatigheid beskou word.
10.4 Kandidate moet ophou skryf op die tyd wat op die eksamenrooster aangedui word.
11. Prinsipale en sentrumbestuurders moet asseblief die inhoud van hierdie omsendbrief onder die aandag bring van alle kandidate wat die November 2008 Nasionale Senior Sertifikaat-eksamen geskryf het.


GETEKEN: BK SCHREUDER
HOOF: ONDERWYS
DATUM: 2008:12:10

Eksamenrooster  (grootte: 49 KB)