1. Alle openbare skole en onderwysdistrikskantore in die Wes-Kaapprovinsie word hiermee herinner dat die huidige termyn van skoolbeheerliggame (SBL'e) in 2009 verstryk.
2. Die Komitee van Hoofde van Onderwysdepartemente (HEDCOM) het goedkeuring verleen dat die volgende rondte van die verkiesing van nuwe skoolbeheerliggame in Junie 2009 gehou word. Alle openbare skole moet SBL-verkiesings in 2009 hou en word geadviseer om nou reeds voorbereidings te tref.
3. 3Openbare skole en onderwysdistrikskantore is reeds voorsien van kopieë van die gewysigde Maatreëls betreffende Beheerliggame vir alle Gewone Openbare Skole (Buitengewone Provinsiale Koerant 6519 van Dinsdag 20 Mei 2008) en Maatreëls vir Openbare Skole vir Leerders met Spesiale Onderwysbehoeftes (Buitengewone Provinsiale Koerant 6554 van Vrydag 12 September 2008). Dit is belangrik dat prinsipale en amptenare van onderwysdistrikskantore hulself vergewis van die wysigings. Dit is ook belangrik om kennis te neem van die verskillende rolle en verantwoordelikhede wat skole en distrikte het om te vervul gedurende die periode voor, gedurende en na die verkiesings.
4. Die SBL-verkiesings in die provinsie sal gekoördineer en gemonitor word deur drie verskillende taakspanne, naamlik 'n provinsiale verkiesingspan, distriksverkiesingspanne en skoolverkiesingspanne wat saamgestel sal word met die hulp van die betrokke rolspelers. Die Departementshoof het reeds goedkeuring verleen vir die aanstelling van mnr. R Larney (021-4672337) as Provinsiale koördineerder om die provinsiale verkiesingspan wat verskeie rolspelers sal insluit, te lei, terwyl onderwysdistriksdirekteure verantwoordelik sal wees vir die samestelling van distriksverkiesingspanne en die koördinering van die samestelling van skoolverkiesingspanne. Die rolle van die verskillende verkiesingspanne word by Aanhangsel A uiteengesit. Meer inligting in hierdie verband sal op 'n later stadium voorsien word. Die samewerking van alle rolspelers sal waardeer word aangesien gereelde terugvoering oor die voorbereiding van die SBL-verkiesings aan die nasionale Departement van Onderwys, deur hierdie kantoor deurgegee moet word.
5. Prinsipale van openbare skole sal weereens opgelei word as kiesbeamptes om die SBL-verkiesings te bestuur. Verdere inligting sal binnekort aan u verskaf word.
6. Prinsipale word ook versoek om asseblief hierdie kantoor nie later nie as 30 Januarie 2009, via hul onderwysdistrikskantoor, van datums te voorsien waarop beheerliggaamverkiesings vir hul skole sal plaasvind.
7. Die WKOD besef dat die verkiesing van beheerliggame 'n groot taak is en daar word op die samewerking van almal wat betrokke is, staatgemaak om dit 'n sukses te maak. Indien u verdere inligting verlang kan u mnr I Morkel by telefoonnommer 021-4672768, of mnr A Brierley by telefoonnommer 021-467-2210, skakel of by faksnommer 021-467 2996 of 021-467 2565 kontak.


GETEKEN: HA LEWIS
HOOF: ONDERWYS
DATUM: 2008:12:09

Aanhangsel A  (grootte: 15 KB)