1. AGTERGROND
Soos u bewus is, maak die Wet op die Indiensneming van Opvoeders, 1998, (Wet 76 van 1998) voorsiening vir die aanstelling van nuutgekwalifiseerde opvoeders en tydelike opvoeders met diensonderbreking in Posvlak 1-poste sonder dat die poste geadverteer hoef te word, en ook sonder die aanbeveling van die skoolbeheerliggaam. Besonderhede hiervan kan gevind word in Omsendbrief 0014/2007 van 16 Maart 2007.

2. FUNZA LUSHAKA-BEURSHOUERS
2.1 Sedert 2007 het die nasionale Departement van Onderwys, deur middel van die Funza Lushaka Beursskema 'n aansienlike getal beurse beskikbaar gestel aan persone wat verlang om as onderwysers te kwalifiseer. Die eerste groep beurshouers het hulle studies voltooi aan die einde van 2007. Hierdie beurshouers is dus onmiddellik beskikbaar vir aanstelling in Posvlak 1-poste. Dit spreek vanself dat hierdie benoembare en gekwalifiseerde onderwysers so spoedig as moontlik aangestel moet word in onderwysposte om die belange van die onderwys te dien en die streng voorwaardes van die beurs na te kom.
2.2 Die Wes-Kaap Onderwysdepartement (WKOD) sal graag hierdie nuutgekwalifiseerde onderwysers so gou as moontlik wil aanstel. Hulle mag permanent aangestel word sonder om te wag dat die poste in die vakaturelys geadverteer word en sodanige aanstellings kan gemaak word ingevolge artikel 6A van die Wet op die Indiensneming van Onderwysers, 1998 (Wet 76 van 1998).

3. BREË BEGINSELS WAT DIE AANSTELLING VAN ONDERWYSERS IN POSVLAK 1-POSTE REGULEER
Alleenlik onderwysers wat woonagtig is in die Wes-Kaapprovinsie sal in aanmerking kom vir aanstelling soos beoog in artikel 6A. Verder moet alle aanstellings gemaak word met deeglike oorweging van die diensbillikheidsbeleid en die kurrikulumbehoeftes van die pos. Die volgende kriteria vir aanstelling, in voorkeurvolgorde, moet gebruik word:
3.1 FUNZA LUSHAKA-beurshouers en nuutgekwalifiseerde opvoeders
3.2 Werklose en tydelike onderwysers en/of onderwysers wat nie die geleentheid gehad het om 'n uitgebreide loopbaan in onderwys te volg nie en wie se dienste nie deur die indiensnemende departement beëindig is as gevolg van wangedrag of drostery gedurende die vorige twee jaar nie
3.3 Opvoeders wat nie bedank het gedurende die twee jaar voor die datum van aanstelling wat van toepassing is op die pos waarvoor hulle oorweeg word nie
3.4 Ander tydelike opvoeders of opvoeders wat nie in diens is nie wat bedank het in die vorige twee jaar.
3.5 Opvoeders wat aansoek gedoen het vir en aan wie toegeken is die Onderling Ooreengekome Skeidingspakket van 2001 of die Skeidingspakket van 2003 en wat nie sedertdien permanent aangestel is nie
3.6 Onderwysers wat die Vrywillige Skeidingspakket geneem het ingevolge RAVO se resolusie 3/1996 gedurende 1996, 1997 en 1998

4. PROSEDURE AANGAANDE HIERDIE AANSTELLINGS
4.1 Ten opsigte van onderwysers wat genoem is onder paragraaf 3 hierbo, wil die WKOD
4.1.1 nominasies van skole en individuele aansoeke van onderwysers ontvang;
4.1.2 met die betrokke beheerliggaam beraadslaag oor die vakante pos en sy vereistes;
4.1.3 seker maak dat die applikant aan die vereistes vir die pos voldoen en oor die voorgeskrewe kwalifikasies beskik; en
4.1.4 die aansoeke prosesseer en pas by die beskikbare vakante poste
4.2 Let asseblief daarop dat voorkeur gegee gaan word aan die aanstelling van nuut-gekwalifiseerde opvoeders bo opvoeders met 'n diensonderbreking.

5. GOEDKEURING VAN NOMINASIES
Ingevolge artikel 6A moet alle nominasies deur skole aanbeveel word deur die betrokke kringspanbestuurder voor dit voorgelê word aan Hoofkantoor vir aanstelling.

6. ALGEMEEN
6.1 Prinsipale word versoek om 'n afskrif van hierdie omsendbrief te besorg aan die voorsitters van hulle skoolbeheerliggame om te verseker dat hulle van hierdie amendement bewus is.
6.2 Bring asseblief die inhoud van hierdie omsendbrief onder die aandag van alle personeel by u inrigting, kantoor of direktoraat, met insluiting van diegene wat tans met verlof is, en versoek hulle om 'n ontvangserkenning van hierdie dokument te onderteken en te dateer.


GETEKEN: CJ FOURIE
HOOF: ONDERWYS
DATUM: 2008:11:06