Hierdie omsendbrief dien as 'n bevestiging van beleidsvereistes soos bepaal in die volgende dokumente:
1. VAKKEUSES EN REËLS VIR VAKKOMBINASIES OM 'N NASIONALE SENIOR SERTIFIKAAT (NSS) TE VERWERF

1.1 Die vakkeuses is opgesom in Bylae A van hierdie omsendbrief.
1.2 'n Leerder moet 'n minimum van 7 (sewe) vakke aanbied.
1.3 ‘n Leerder mag nie beide Rekenaartoepassingstegnologie en Inligtingstegnologie aanbied nie.
1.4 'n Leerder mag nie beide Verbruikerstudies en Gasvryheidstudies aanbied nie.
1.5 Paragraaf 1.3 en 1.4 is net van toepassing op graad 10 vanaf 2008; grade 10 en 11 vanaf 2009 en grade 10-12 vanaf 2010 soos verduidelik in Omsendbrief 31/2007.
1.6 Vir doeleindes van bevordering in Lewensoriëntering aan die einde van graad 10 en 11 en sertifisering aan die einde van graad 12, moet vyf interne assesseringstake per graad voltooi word. Alle bewyse van leerders se prestasie in die 5 interne take moet in die leerders se werk wat aan die einde van graad 10, 11 en 12 vir moderering voorgelê word, gereflekteer word.
1.7 Indien 'n leerder verkies om agt (8) of meer vakke aan te bied, sal dit dien as verryking van sy of haar kwalifikasie alleenlik. Die bevorderingsuitslae sal op sewe vakke gebaseer wees. In die NSS kan geen bonuspunte verwerf word deur meer as sewe vakke aan te bied nie. Indien ‘n leerder wel meer vakke wil aanbied, moet hy/sy die vak vanaf Graad 8 af aanbied. ‘n Leerder sal nie toegelaat word om met ‘n nuwe ekstra vak in graad 11 of 12 te begin nie.
1.8 Ingevolge die Nasionale Senior Sertifikaat moet twee amptelike tale aangebied word, op voorwaarde dat een van die twee amptelike tale op huistaalvlak aangebied word en die ander op huistaalvlak of die vlak van Eerste Addisionele Taal. Een van die tale moet die taal van leer en onderrig wees (TLO).

2. TOEGEWINGS VIR IMMIGRANTE
2.1 Dit is nodig dat prinsipale sal let op taaltoegewings wat aangebied word aan diegene wat aan die vereistes voldoen, en ook op die prosedure wat gevolg moet word indien om taalvrystelling aansoek gedoen word.
2.2 Nie alle leerders van vreemde lande kwalifiseer vir die taaltoegewings nie. Aangesien sommige van hierdie leerders egter dikwels oor die hoof gesien word wat onderwys in 'n tweede taal in die primêre fase betref, bevind hulle hulle in 'n netelige posisie wanneer hulle in die graad 9-eksamen - of selfs later - ontdek dat hulle nie vir taalvrystelling kwalifiseer nie. Dit is dus noodsaaklik dat prinsipale van primêre skole ook kennis neem van die kriteria wat op taalvrystelling van toepassing is.
2.3 'n Immigranteleerder word as volg gespesifiseer in paragraaf 12 van die beleidsdokument, die Nasionale Senior Sertifikaat: ‘n Kwalifikasie op Vlak 4 van die Nasionale Kwalifikasieraamwerk (NKR):
  1. 'n kind of afhanklike van 'n diplomatieke verteenwoordiger van 'n vreemde regering wat in Suid-Afrika geakkrediteer is, of
  2. 'n persoon wat

    3. (aa) eers ingeskryf het en skool bygewoon het by 'n Suid-Afrikaanse skool in graad 7 of later, of
    (bb) na 'n begin van sy/haar skoolloopbaan by 'n skool in Suid-Afrika, 'n skool buite Suid-Afrika vir twee of meer agtereenvolgende jare bygewoon het na graad 6 of sy ekwivalent.
2.4 Om as 'n immigranteleerder geklassifiseer te word, moet die leerder in besit wees van die toepaslike amptelike dokumentasie, uitgereik deur die Departement van Binnelandse Sake en die toepaslike amptelike dokumentasie uitgereik deur die skool waar die leerder die Suid-Afrikaanse skoolstelsel vir die eerste keer betree het.
2.5 'n Immigranteleerder, soos hierbo gedefinieer, kan slegs een (1) amptelike taal aanbied op ten minste Eerste Addisionele Taalvlak en moet 'n slaagsyfer van ten minste 30% behaal om in daardie taal te slaag, op voorwaarde dat 'n ander vak van groep B aangebied word in die plek van die een amptelike taal wat nie aangebied word nie (Bylae A).
2.6 Ander opsies ten opsigte van leerders wat hulle huistaal aanbied word gestipuleer in paragraaf 1.2(1)(a) - (v)(bb) van die beleidsdokument, Die Nasionale Senior Sertifikaat: ‘n Kwalifikasie op Vlak 4 van die Nasionale Kwalifikasieraamwerk (NKR) (bladsy 16).
2.7 Die leerders na wie verwys is in paragraaf 2.6 hierbo moet hulle huistaal slaag binne die periode wat begin 6 maande voor hulle die NSS aflê en eindig 6 maande na hulle die Nasionale Senior Sertifikaat-eksamens afgelê het. Die uitslag van hierdie huistaaleksamen moet sonder versuim na die Departement gestuur word vir die doel om 'n sertifikaat uit te reik. Die onus berus by die leerder om die nodige reëlings te tref vir die aflê van die A-vlak eksamen van die Britse Raad by die volgende adres: 
Die Britse Raad
Eksamendienste 
Hoofdtstraat 33 
Braampark, Forum 1
Grondvloer 
Braamfontein 
2001

Telefoon:086 001 2233
2.8 Daar word ook Departementele goedkeuring vereis vir taalvrystelling vir immigranteleerders vir die graad 9-assessering.
2.9 Let asseblief op die volgende ten opsigte van aansoeke om taalvrystelling:
2.9.1 Die aangehegte form (Bylae B) moet voltooi word wanneer aansoek gedoen word om taalvrystelling. Die voltooide vorm moet vergesel wees van die nodige amptelike dokumente, soos bepaal in paragraaf 2.4 van hierdie omsendbrief.
2.9.2 Alle aansoeke om taalvrystelling moet via die skoolhoof aan die Departement voorgelê word.
2.9.3 Die Departementele vrystellingsbrief of goedkeuring sal direk aan die skool gestuur word.
2.9.4 Die vrystelling of goedkeuringsdatum moet, in die geval van 'n voltydse leerder geregistreer wees op die leerderrekord en die vrystellingsbrief/goedkeuringsbrief moet aan die rekordkaart vasgeheg word indien hy of sy na die nuwe skool oorgeplaas word.
2.9.5 Aansoek om vrystelling moet gedoen word onmiddellik nadat die leerder vir die eerste keer tot 'n skool in Suid-Afrika toegelaat is, en nie eers wanneer die leerder vir 'n eksamen inskryf nie.
2.9.6 Leerders wat tydelik in Suid-Afrika gevestig is vereis 'n studiepermit wat uitgereik word deur die Departement Buitelandse Sake. 'n Afskrif van die permit moet die aansoek om taalvrystelling vergesel.
2.9.7 Dit is van die uiterste belang dat alle aansoeke vir graad 9 - 12-leerders Die Direktoraat: Eksamenadministrasie bereik voor 15 Maart van elke jaar. Slegs vir die jaar 2008 sal die sperdatum 23 Mei 2008 wees.

3. LEERDERS WAT LEERSTOORNISSE ONDERVIND
3.1 Graad 10-12-leerders wat leerstoornisse ervaar, sal toegelaat word om een van die volgende drie leergange te volg met die oog op 'n kwalifikasie:
  1. Die nasionale Senior Sertifikaat (NSS) soos bepaal in die beleidsdokumente, Die Nasionale Senior Sertifikaat: 'n Kwalifikasie op Vlak 4 op die Nasionale Kwalifikasie- raamwerk en die wysiging van daardie beleid, soos bepaal in Regeringskoerant 29851
    van 30 April 2007,
    OF
  2. 'n Geëndoseerde Nasionale Senior Sertifikaat soos bepaal in Regeringskoerant 29466 van 11 December 2006 en Regeringskoerant 30371 van 11 October 2007 vir leerders wat nie aan die vereistes soos uiteengesit in die staatskoerante genoem in paragraaf 3.1(a) hierbo kan voldoen nie.
3.2 Ten opsigte van aansoeke gerig aan die Wes-Kaap Onderwysdepartement vir eksamenkonsessies ( d.w.s. bykomende tyd of enige ander aangepaste of alternatiewe wyse van eksaminering) vir leerders wat die Nasionale Senior Sertifikaat-eksamen aflê, moet daar op die volgende gelet word:
  1. Inrigtingshoofde wat aansoeke aan die Departement voorlê vir eksamenkonsessies (addisionele tyd of enige ander aangepaste of alternatiewe wyse van eksaminering) vir kandidate vir die Nasionale Senior Sertifikaat-eksamen, moet dit doen in ooreenstemming met die riglyne soos uiteengesit in Bylae A van Eksamensomsendminuut 0015/99 van 3 September 1999. Indien u inrigting nie in besit van hierdie beleidsdokument is nie, kan dit verkry word van die Direktoraat: Eksamenadministrasie.
  2. Die sluitingsdatum vir aansoeke om toegewings vir alle aanpassings vir leerders van hoofstroomskole is 15 Maart van elke jaar. Slegs vir die jaar 2008 sal die sperdatum 23 Mei 2008 wees
  3. 'n Gedetailleerde professionele verslag (nie ouer as 3 jaar nie) van 'n mediese dokter, paramediese beampte of sielkundige, sowel as ander ondersteunende bewyse (toetsresultate, eksamenuitslae, ens.) moet die gepaste aansoekvorm vergesel (Bylae C1 en C2).
  4. 'n Gesertifiseerde afskrif van die leerder se identitieitsdokument moet die aansoek vergesel.
4. KONSESSIES TEN OPSIGTE VAN LEERDERS WAT LEERSTOORNISSE ONDERVIND IN 'N SPESIFIEKE VAK
4.1 Om vir 'n NSS te kwalifiseer of om graad 10 en 11 te slaag, mag dowes een (1) amptelike taal op Eerste Addisionele Taalvlak aanbied, op voorwaarde dat 'n ander vak van groep B aangebied word in die plek van die een amptelike taal wat nie aangebied word nie. (Bylae A).
4.2 Om vir 'n NSS te kwalifiseer of om graad 10 en 11 te slaag, mag leerders wat erge leerstoornisse in tale ervaar, soos afasie of disleksie, slegs een (1) amptelike taal op Eerste Addisionele Taalvlak aanbied op voorwaarde dat 'n ander vak van Groep B aangebied word in die plek van die een amptelike taal wat nie aangebied word nie. (Bylae A).
4.3 Leerders wat 'n ernstige leerstoornis soos diskalkulie in wiskunde ervaar, mag vrygestel word daarvan om Wiskunde of Wiskundige Geletterdheid aan te bied, op voorwaarde dat 'n ander vak van Groep B aangebied word in die plek van Wiskunde of Wiskundige Geletterdheid (Bylae A).
4.4 Die bogemelde toegewings sal ook van toepassing wees op die leerders wat inskryf vir die Geëndosseerde Nasionale Senior Sertifikaat vir leerders met spesiale behoeftes.
4.5 'n Verslag van die opvoedkundige ondersteuningspan van die skool, wat insluit 'n skolastiese geskiedenis van ten minste twee vorige jare en 'n verslag oor die intervensies wat deur die skool onderneem is om die leerder te ondersteun, sowel as ander ondersteunende getuienis (toetsresultate, eksamenresultate, ens.) moet die gepaste aansoekvorm vergesel. Verifikasie van hierdie verslae deur die kringspan van die distrik / multifunksionele span is noodsaaklik.
4.6 'n Gesertifiseerde afskrif van die leerder se identitieitsdokument moet ook die aansoek vergesel.

5. KONSESSIES TEN OPSIGTE VAN LEERDERS WAT LEERSTOORNISSE ONDERVIND EN WAT 'N GEËNDOSSEERDE NASIONALE SENIOR SERTIFIKAAT VERLANG soos gestipuleer in die Regeringskoerant 29466 van 11 Desember 2006 en sy wysigingskoerant 30371 van 11 Oktober 2007.

Die kwalifikasies gelys in Bylae A en D ten opsigte van leerders met spesiale behoeftes sal slegs beskikbaar wees vir

  1. ten opsigte van leerders met spesiale behoeftes sal slegs beskikbaar wees vir
  2. leerders in hoofstroomskle wat geïdentifiseer is en geassesseer is vir plasing in spesiale skole en wat op die waglys is vir toelating tot spesiale skole;
  3. leerders in hoofstroomskole wat geïdentifiseer is en geassesseer is vir plasing in spesiale skole, maar wat verkies het om in 'n hoofstroomskool te bly; en
  4. leerders wat ernstige leerstoornisse ervaar en wat voldoen aan kriteria gespesifiseer in Bylae D van hierdie omsendbrief.
6. BEVORDERINGSVEREISTES VIR DIE NASIONALE SENIOR SERTIFIKAAT

Aangeheg aan hierdie omsendbrief is 'n opsomming van die bevorderingsvereistes wat van toepassing is op alle kandidate vir die Nasionale Senior Sertifikaat (Bylae D). Maak asseblief seker dat alle ouers, onderwysers en leerders van graad 10 tot 12 hulleself vergewis van die inhoud en implikasies van hierdie beleid.
Indien u enige onduidelikheid het aangaande enige van die regulasies wat in hierdie omsendbrief genoem word, kan u een van die volgende persone kontak: 

Mnr GA Valentine Telefoon 021 467 2919 (Immigrante)
Mnr HAJ Coetzee  Telefoon 021 467 2921 (Spesiale behoeftes)
Mev J Johnson    Telefoon 021 467 2887 (Immigrante)


GETEKEN: TT SINGH
HOOF: ONDERWYS
DATUM: 2008:05:12

Bylae A  : Vakkeuses  (grootte: 14 KB)
Bylae B  : Aansoekvorm vir taaltoegewing vir immigranteleerders  (grootte: 23 KB)
Bylae C1: Aansoek om bykomende tyd en/of alternatiewe wyse van eksaminering  (grootte: 28 KB)
Bylae C2: Aansoek om toegewing(s) vir die nasionale senior sertifikaateksamens  (grootte: 18 KB)
Bylae D  : Minimum bevorderingsvereistes  (grootte: 13 KB)

Bylae A van Omsendbrief 15 van 1999:  Alterantiewe en aangepaste wyse van eksaminering/assessering vir leerders met spesiale onderwysbehoeftes  (grootte: 47 KB)

National Senior Certificate: A qualification at Level 4 on the National Qualifications Framework (NQF)  (grootte: 293 KB)
Government Gazette No. 29851  (grootte: 81 KB)
Government Gazette No. 29466  (grootte: 524 KB)
Government Gazette No. 30371  (grootte: 50 KB)