1. Die beleidsdokument, Nasionale beleid oor die afneem, administrasie en bestuur van die Nasionale Senior Sertifikaat: 'n Kwalifikasie op Vlak 4 van die Nasionale Kwalifikasieraamwerk (NKR) in Staatskoerant 30048 vereis dat elke skool ‘n Skool Assesserings-onreëlmatighedekomitee (SAOK) moet stig.

2. Die beleid vereis dat die volgende strukture noodsaaklik vir die bestuur van assesseringsonreëlmatighede op nasionale, provinsiale en skoolvlakke geskep word:
2.1 Die Minister van Onderwys moet 'n Nasionale Eksamenonreëlmatighedekomitee (NEOK) stig om die provinsiale departemente te ondersteun in die versekering van die geloofwaardigheid van assesserings en eksamens.
2.2 Provinsiale onderwysdepartemente moet ‘n Provinsiale Eksamenonreëlmatighede-komitee (PEOK) stig om onreëlmatighede te ondersoek en aanbevelings aan die LUR en die Onderwyshoof te maak.
2.3 Interne assesseringsonreëlmatighede waarby leerders betrokke is, moet hanteer word op die vlak van die skool of leerinrigting deur die Skoolassesserings-onreëlmatighedekomitee (SAOK), ooreenkomstig die beleid wat verskaf is deur die provinsiale departement van onderwys.

3. Daar word van elke skool verwag om 'n SAOK in te stel. Die proses, rolle en verantwoordelikhede moet in die skoolassesseringsbeleid gespesifiseer word. Aangeheg by hierdie omsendbrief is riglyne (Bylae A) oor hoe die SAOK ingestel moet word en hoe die komitee saamgestel moet wees.
4. Daar word van skole verwag om hulle SAOK's in te stel sodat dit teen 30 Junie 2008 ten volle funksioneel sal wees.
5. Die SAOK sal alle assesseringsonreëlmatighede in die Algemene Onderwys en Opleidingsband (AOO) sowel as in die Verdere Onderwys- en Opleidingsband (VOO) hanteer. Die SAOK sal ‘n belangrike rol speel in onreëlmatighede betreffende die Gemeenskaplike Take vir Assessering (GTA) en die Graad 12 assessering.
6. Die WKOD sal die instelling van SAOK's moniteer.
7. Staatskoerant No. 30048 kan afgelaai word van die WKOD se webtuiste vir assessering en eksamens by http://curriculum.pgwc.gov.za/site/21/page/view.
8. U samewerking in hierdie verband sal waardeer word.


GETEKEN: TT SINGH
HOOF: ONDERWYS
DATUM: 2008:05:12

Bylae A: Riglyne vir die instelling en funksionering ...  (grootte: 23 KB)