1. Die Wes-Kaap Onderwysdepartement (WKOD) het onlangs Omsendbrief 0013/2006 van 23 Februarie 2006 uitgereik om die belangrikheid en dringendheid van die vulling van prinsipaalsposte by nuwe skole te beklemtoon. Dit is egter nie altyd vir die WKOD moontlik om hierdie poste betyds te vul wanneer hierdie skole hul deure vir die eerste keer open nie.
2. Ten einde die gladde opening en bestuur van nuwe skole in gevalle waar permanente prinsipale nog nie aangestel is nie te verseker, word daar van kringbestuurders verwag om reëlings te tref vir die aanstelling van waarnemende prinsipale by hierdie skole.
3. Die vul van vakante prinsipaalsposte in 'n waarnemende hoedanigheid by nuwe skole moet met versigtigheid hanteer word ten einde 'n geskikte persoon te kan vind wat in staat is om veral die opening en vestiging van die nuwe skool, goed te kan bestuur.
4. Vir die doeleindes van regverdigheid en deursigtigheid en ten einde die bes moontlike kandidaat vir die pos te kies, het die WKOD besluit om die volgende prosedure gedurende die keuringsproses te volg:
4.1 Die senior kringbestuurder tesame met 'n onderhoudspan wat uit die volgende persone bestaan, sal verantwoordelik wees vir die werwing en keuring van 'n geskikte kandidaat:

  • die senior kringbestuurder (voorsitter)

  • die verantwoordelike kringbestuurder

  • nog 'n kringbestuurder van die betrokke OBOS

  • 'n personeellid van die betrokke OBOS om as sekretaris te dien

  • Unieverteenwoordigers (het slegs waarnemerstatus).
4.2 Daar moet soos volg te werk gegaan word by die advertering van die pos:
4.2.1 die pos moet behoorlik geadverteer word deurdat die advertensie per e-pos aan skole onder die beheer van al die betrokke OBOS'e gestuur word en / of in die plaaslike media (indien bekostigbaar) geadverteer word om belangstellende opvoeders die geleentheid te bied om aansoek te doen. Neem asseblief kennis dat die maatreëls soos uiteengesit in Resolusie 8/2002 gedateer 13 Desember 2001 van die Raad Op Arbeidsverhoudinge in die Onderwys (RAVO) in hierdie geval van toepassing is ( Omsendbrief 45/2002 gedateer 24 April 2002 verwys);
4.2.2 Slegs aansoekers op die rang van Adjunk-Prinsipaal (posvlak 3) met die uitsondering van departmentshoofde wat alreeds as prinsipaal waargeneem het, sal oorweeg word. Waar moontlik sal die aansoeke van afgetrede prinsipale ook oorweging geniet.
4.2.3 die advertensie moet voorsiening maak vir 'n posbeskrywing van en verantwoordelikhede verbonde aan die pos;
4.2.4 die vereistes vir aanstelling met betrekking tot die aantal jare ondervinding en Relatiewe Onderwyskwalifikasiewaarde (ROKW) verbonde aan die pos,bly dieselfde soos aangedui in die departementele vakaturelyste wat van tyd tot tyd uitgereik word;
4.2.5 die kriteria vir die pos moet duidelik uitgespel word soos bepaal word deur die spesifieke behoeftes en uniekheid van die skool en die gemeenskap wat dit bedien;
4.2.6 'n Sluitingsdatum vir ontvangs van die aansoeke moet aan aansoekers gegee word en geen laat aansoeke moet oorweeg word nie;
4.2.7 die advertensie moet ook die besonderhede van die Senior Kringbestuurder waarheen die aansoeke gestuur moet word, aandui.
4.3 'n Lys van almal wat aansoek gedoen het moet opgestel en gesif word deur die kringbestuurder;
4.4 die onderhoudkomitee moet met nie meer as vyf kandidate onderhoude voer nie en dan die suksesvolle kandidaat identifiseer, waarna die senior kringbestuurder die waarnemende aanstelling van die kandidaat ingevolge die bestaande delegasies van toepassing op waarnemende aanstellings sal goedkeur ( Omsendbrief 0045/2002 gedateer 24 April 2002 verwys).
4.5 Die senior kringbestuurder moet na afhandeling van bogemelde proses al die nodige vorms so spoedig moontlik aan die Direkteur: Personeelbestuur (Opvoeders) se kantoor besorg.
5. Die waarnemende prinsipaal sal vir tydperke van ses kalendermaande op 'n keer aangestel word totdat die pos permanent gevul word en sal ook 'n kontrak in hierdie verband moet onderteken, in welke geval die aanstelling sal geld vanaf die kwartaal voordat die skool amptelik open.
6. Neem asseblief kennis dat in die geval waar daar nie botalligheid by 'n skool voorkom nie, sal die skool waarvandaan die opvoeder tydelik oorgeplaas word, 'n posvlak 1 plaasvervanger ontvang en enige persoon wat in die tydelik oorgeplaasde opvoeder se pos waarneem, sal 'n waarnemingstoelae ooreenkomstig Resolusie 8/2002 ontvang.
7. Bring asseblief die inhoud van hierdie omsendminuut onder die aandag van alle belanghebbende partye.


GETEKEN: J.H. HURTER
HOOF: ONDERWYS
DATUM: 2006:10:19