| 1. |
Die National Council of Women of South Africa het hul kommer uitgespreek oor die onsensitiewe wyse waarop ouers behandel word deur administratiewe personeel by sommige openbare skole, veral met betrekking tot die betaling van skoolgelde.
|
| 2. |
Die bogemelde Raad het ook 'n resolusie by hul onlangse kongres aanvaar waarin die Minister van Onderwys versoek word om gestandaardiseerde prosedure in te stel om professionele optrede en kundigheid by administratiewe personeel by openbare skole op te skerp.
|
| 3. |
Die Nasionale Departement van Onderwys het nou provinsiale onderwysdepartemente versoek om skole bewus te maak van die kommer wat uitgespreek is.
|
| 4. |
Prinsipale van openbare skole en voorsitters van beheerliggame word versoek om personeel te herinner aan hul verpligting om ouers met die nodige sensitiwiteit te behandel. U moet asseblief hierdie personeellede herinner aan die beginsels van Batho Pele en iKapa Elihlumayo en seker maak dat hierdie personeellede behoorlik opgelei is om die publiek op 'n hoflike en sensitiewe wyse te hanteer.
|
| 5. |
Ons wil egter ook van hierdie geleentheid gebruik maak om ons waardering uit te spreek teenoor dié administratiewe personeel by skole wat nog altyd ouers met prysenswaardige hoflikheid en takt behandel het.
|
GETEKEN: J.H. LYNERS
HOOF: ONDERWYS
DATUM: 2006:11:07
|