| 1.1 |
Die diensstate vir openbare gewone skole is bereken ingevolge die nuutste pos- voorsieningsnorme wat deur Hoofde van Onderwysdepartemente-komitee (HEDCOM) na die nuutste veranderinge in die Graad 10-kurrikulum, goedgekeur is. Met die uitsondering van die gewigte gekoppel aan Graad 10 as gevolg van die verandering in die Graad 10- kurrikulum, is die res van die gewigte soos vervat in die Hersiene Posvoorsieningsmodel (HPVM) wat as Bylae A tot Omsendbrief 0143/2002 van 15 November 2002, aangeheg is, nog steeds dieselfde. Dit beteken dat dieselfde beginsels en bepalings wat vanaf 2003 tot 2006 gebruik is, ook vir 2007 gebruik word.
|
| 1.2 |
Voorheen is die diensstate van openbare spesiale skole op 'n driejaarsiklus uitgereik. Sedert 2005 is hierdie diensstate egter jaarliks uitgereik.
|
| 1.3 |
Soos bepaal deur wetgewing, het die WKOD oor die personeelvoorsiening van openbare gewone skole en spesiale skole na behore beraadslaag met die werknemerspartye in die Provinsiale Raad op Arbeidsverhoudinge in die Onderwys (PRAVO) sowel as met die erkende skoolbeheerliggaamverenigings.
|
| 2. |
MAATREëLS (BREë BEGINSELS)
|
| 2.1 |
Ingevolge die maatreëls van die HPVM, moet openbare gewone skole jaarliks voor die einde van September van die voorafgaande jaar van hulle diensstate voorsien word. Dit beteken dat alle diensstate wat aan gewone openbare skole uitgereik is, sowel as alle addisionele posvlak 1-poste wat gedurende 2006 as gevolg van 'n toename in leerdertal of die kurrikulumbehoeftes van 'n inrigting geskep is, aan die einde van 2006 sal verval.
|
| 2.2 |
Die ad hoc-poste (bo en behalwe die poste aangedui in die vaste diensstaat van 'n skool) wat aan die einde van 2005 vir benutting gedurende 2006 aan skole toegeken is ten einde te verseker dat sekere skole 'n leerder:opvoederbedeling van 33:1 (sekondêr) of 39,5:1 (primêr) handhaaf, sal ook aan die einde van 2006 verval.
|
| 2.3 |
Skole sal in 'n aparte brief van hulle posisie met betrekking tot die ad hoc-poste vir 2007 ingelig word.
Ad hoc-poste mag slegs in 'n tydelike hoedanigheid gevul word en in die geval van profesioneel-gekwalifiseerde opvoeders mag hulle vir twaalf kalendermaande, maar nie vir langer as 31 Desember 2006 nie, aangestel word.
Die vul van ad hoc-poste sal streng volgens paragrawe 2.8 en 2.9 van hierdie omsendbrief, gevul word.
|
| 2.4 |
Die postestruktuur en omskrywings soos vervat in Kollektiewe Ooreenkoms 4/2003 van RAVO is van toepassing op die diensstate.
|
| 2.5 |
Skole is ingevolge die Skoolgraderingsnorme soos vervat in Kollektiewe Ooreenkoms 3/2006 van die RAVO gegradeer.
|
| 2.6 |
In 2006 is 121 terapeutposte aan spesiale skole toegeken. Vir die 2007-akademiese jaar sal dieselfde aantal terapeutposte aan skole toegeken word, maar onder spesiale skole herverdeel word.
|
| 2.7 |
Die poste vir sielkundiges verbonde aan openbare spesiale skole, waar van toepassing, maak deel uit van die bevorderingsposte.
|
| 2.8 |
HERBEREKENING VAN DIENSSTATE
Die WKOD behou hom die reg voor om 'n diensstaat te herbereken indien daar bevind sou word dat enige inligting nie korrek is nie.
LET WEL
Die diensstate van skole is bereken alleenlik op grond van die inligting ten opsigte van die leerderinskrywings soos in die SOBIS-rekords van individuele skole gereflekteer. Die gevolg hiervan is dat daar moontlik minder poste toegeken sou kon word aan 'n skool as waarvoor die skool kwalifiseer, aangesien inligting nie ten volle op SOBIS teen 11 September 2006 vasgelê was nie. Die WKOD is egter bereid om pleidooie in hierdie verband aan te hoor. Hierdie pleidooie sal egter slegs oorweeg word in ooreenstemming met die SOBIS-inligting (dit sal deur middel van die prossesse gekoppel aan SOBIS geverifieer word). Pleidooie moet die WKOD (vir die aandag van die Hoof: Subdirektoraat Voorsiening (Direktoraat Personeelbestuur (Opvoeders)) teen 20 Oktober 2006 bereik. Die WKOD sal geen pleidooie na gemelde datum oorweeg nie.
|
| 2.9 |
VERMINDERING VAN LEERDERTAL OP DIE EERSTE SKOOLDAG 2007: SLEGS OPENBARE GEWONE PRIMêRE SKOLE
|
| 2.9.1 |
Waar daar by die opening van skole in 2007 'n afname in die leerdertal is, d.w.s. waar die leerdertal op die eerste skooldag laer is as die leerdertal (2006 SOBIS inligting) wat gereflekteer word in die diensstaat vir 2007, mag poste slegs gevul word tot die mate dat dit gelyk is aan die leerder:opvoederbedeling van die diensstaat vir 2007.
|
| 2.9.2 |
Die voorafgaande beteken dat indien 'n skool se diensstaat vir 2007, gebaseer op die 2006 SOBIS-inligting van 1000 leerders, vir 30 poste voorsiening maak (wat 'n leerder: opvoeder-bedeling van 33.33 t.o.v. die betrokke skool gee) en die leerdertal op die eerste skooldag van 2007 op 920 te staan kom, mag die skoolhoof slegs 28 poste (920 ÷ 33.33 = 28 (27.60)) vul. Die oorblywende twee poste sal afgeskaf word en aan ander skole wat groei in die leerdertal ondervind het, toegeken word. Dit sal ook gebasseer word op die aantal leerders op SOBIS.
|
| 2.9.3 |
Die bogenoemde maatreël is NIE van toepassing op openbare gewone skole waar ALLE poste in 'n permanente hoedanigheid gevul is NIE. Indien 'n pos egter om welke rede ookal vakant raak, dan geld bogenoemde maatreël wel.
|
| 2.10 |
AFNAME IN LEERDERTAL 2007: SLEGS OPENBARE GEWONE PRIMêRE SKOLE
Die WKOD behou hom die reg voor om posvlak 1-poste af te skaf waar daar 'n daling in die skool se leerdertal gedurende die jaar 2007 is. In sodanige geval sal opvoeders wat in 'n tydelike hoedanigheid aangestel is, na poste by ander inrigtings oorgeplaas word. Hoofde van inrigtings word derhalwe versoek om opvoeders wat tydelik aangestel word, dienooreenkomstig by werwing in te lig dat hulle aangestel word met die voorbehoud dat hulle na ander inrigtings oorgeplaas sal word wanneer poste as gevolg van 'n daling in leerdertal afgeskaf word.
|
| 2.11 |
AFNAME IN LEERDERTAL 2007: SEKONDÊRE SKOLE
Die ouderdomsbeleid is aan die begin van 2001 gewysig en het tot gevolg gehad dat ongeveer 22 000 minder leerders vir graad 1 geregistreer het. Daar word voorsien dat die algehele aantal graad 8-leerders vir 2007 aansienlik minder sal wees as in vorige jare. In die lig hiervan en ten einde stabiliteit in die stelsel te verseker, sal die vasgestelde diensstate van sekondêre skole vir 2007 nie verander word nie al is daar 'n afname in leerderinskrywings. Paragrawe 2.9 en 2.10 van hierdie omsendbrief het dus nie op sekondêre skole betrekking nie.
|
| 2.12 |
TOENAME IN LEERDERTAL: 2007
Aansoeke om die skep van addisionele poste by openbare gewone skole as gevolg van groei in leerdertal moet so spoedig as moontlik ooreenkomstig Omsendbrief 0011/2003 van 16 Januarie 2003 by die WKOD ingedien word.
Let asseblief daarop dat die WKOD in die prosses is om 'n elektroniese sisteem te ontwikkel vir prinsipale wat aansoek doen om addisionele poste op grond van groei. Hierdie program sal aan SOBIS gekoppel wees met die gevolg dat die toeken van addisionele poste aan skole slegs oorweeg sal word na aanleiding van die inligting op SOBIS. 'n Omsendbrief in hierdie verband sal later uitgereik word.
Geen aanstelling mag sonder die skriftelike goedkeuring van die WKOD gedoen word nie.
|
| 3.1 |
TOENAME IN AANTAL POSTE
In 'n geval waar daar 'n toename in die aantal opvoedersposte is, kan die nuutgeskepte poste op die volgende wyses gevul word:
|
| 3.1.1 |
Opname en plasing (herontplooiing) van botallige opvoeders (let daarop dat opname en plasing van botallige opvoeders 'n deurlopende proses is wat voorrang bo die advertering van poste sal geniet).
|
| 3.1.2 |
Deur middel van die adverteer in die vakaturelys met die oog op die permanente vul daarvan (Dit beteken dat posvlak 1- en bevorderingsposte by die eerste die beste geleentheid geadverteer moet word.)
|
| 3.1.3 |
Op 'n tydelike basis of in 'n waarnemende hoedanigheid ooreenkomstig bestaande beleidsvoorskrifte
|
| 3.2 |
AFNAME IN AANTAL POSTE
|
| 3.2.1 |
In 'n geval waar daar 'n afname in die aantal poste by openbare gewone skole sowel as by openbare spesiale skole is (dit wil sê 'n pos of poste is afgeskaf), mag die onderwysinrigting slegs poste vul tot die perk wat op die diensstaat aangedui is. Dit volg dus dat 'n onderwysinrigting nie meer poste mag vul as waarvoor daar in sy diensstaat voorsiening gemaak is nie.
|
| 3.2.2 |
Indien daar egter meer permanent-aangestelde opvoeders is as waarvoor die diensstaat voorsiening maak, kan die onderwysinrigting nie enige verdere aanstellings, hetsy permanent of tydelik, maak nie.
|
| 3.2.3 |
Inrigtingshoofde word ook daaraan herinner dat die WKOD nie plaasvervangers toewys aan 'n inrigting waar daar meer permanent-aangestelde opvoeders as poste is nie.
|
| 3.2.4 |
Permanent-aangestelde opvoeders moet volgens Kollektiewe Ooreenkoms 2/2003 van RAVO as botallig geïdentifiseer word.
|
| 3.3 |
VUL VAN GEADVERTEERDE POSTE
|
| 3.3.1 |
Alle poste wat reeds in 'n departementele vakaturelys as vakant geadverteer is, mag op 'n permanente grondslag gevul word indien die pos op die 2007-diensstaat verskyn.
|
| 3.3.2 |
Indien 'n geadverteerde pos nie op die 2007-diensstaat verskyn nie, is die inrigting nie geregtig op daardie pos nie en so 'n pos sal as foutiewelik geadverteer beskou word.
|
| 3.3.3 |
Die maatreël waarvolgens 'n geadverteerde pos (veral 'n bevorderingspos) slegs gevul mag word indien dit nie verdere botalligheid tot gevolg sal hê nie, bly steeds van krag.
|
| 3.3.4 |
Indien inrigtingshoofde en beheerliggame die mening toegedaan is dat die geadverteerde pos se werkomskrywing nie meer aan die inrigting se kurrikulumbehoeftes voldoen nie, kan hulle die WKOD versoek om die pos as foutiewelik geadverteer te beskou. 'n Volledige motivering moet so 'n versoek vergesel.
|
| 3.4.1 |
Opvoeders wat reeds aan die hand van vorige diensstate ooreenkomstig vorige prosesse as botallig verklaar is en steeds botallig is, behou hulle botalligheidstatus. Hierdie opvoeders sal gehanteer word ingevolge die geldende kollektiewe ooreenkomste van RAVO.
|
| 3.4.2 |
Hierdie botallige opvoeders (verwys na paragraaf 3.4.1) kan in vakatures op die nuwe diensstaat by wyse van opname en plasing geabsorbeer word (verwys na paragraaf 3.1.1).
|
| 3.4.3 |
Soos aangedui in paragraaf 3.2.4 hierbo, moet permanent-aangestelde opvoeders ingevolge Kollektiewe Ooreenkoms 2/2003 van die RAVO as botallig geïdentifiseer word.
|
| 3.5 |
HERSIENING VAN DIENSSTATE: 2007
|
| 3.5.1 |
Die WKOD het die aantal bekostigbare poste streng ooreenkomstig die HPVM en soos in paragraaf 1.1 hierbo genoem, onder inrigtings onder sy beheer versprei.
|
| 3.5.2 |
Die WKOD besef egter dat daar hoofde kan wees wat vanweë hulle armoedekwalifikasie (armoedekwintiele) of uitsonderlike veranderde omstandighede by hulle inrigtings hulle diensstate sou wou laat hersien. Behoorlik-gemotiveerde versoeke om die hersiening van diensstate kan gerig word aan die WKOD vir die aandag van die Hoof: Subdirektoraat Voorsiening (Direktoraat Personeelbestuur (Opvoeders)) teen 20 Oktober 2006.
|
| 4. |
NAVRAE
Navrae rakende hierdie omsendbrief (maatreëls, ens.) kan gerig word aan kringbestuurders.
|
| 5. |
ALGEMEEN
Bring asseblief die inhoud van hierdie omsendbrief onder die aandag van alle opvoeders en lede van beheerliggame. |
GETEKEN: R.B. SWARTZ
HOOF: ONDERWYS
DATUM: 2006:09:15
|