1. Omsendbrief 56/2005, gedateer 3 Oktober 2005, het bepaal dat skole 60% van hul norme-en-standaardetoekennings op handboeke moet bestee.
2. Alle skole moet daarop let dat elke leerder 'n handboek moet hê vir elke leerarea of vak.
3. Artikel 21-skole ontvang hul norme-en-standaardetoekenning vir die 2006/07 finansiële jaar in twee paaiemente, naamlik 60% in April en 40% in November. Met die eerste oordragbetaling, wat gedurende April 2006 gemaak is, moes leer- en onderrigondersteuningsmateriaal (LOOM) aangekoop word sodat dit voor die einde van September 2006 beskikbaar kon wees.
4. Die algehele bedrag vir handboeke vir alle nie-artikel 21-skole beloop volgens die skolebegrotings (WKOD 032) R60,53 miljoen. By kontrolering is daar bevind dat daar tot en met 27 September 2006 slegs R33,04 miljoen aan handboeke bestee is. Sommige skole vereis selfs van ouers om handboeke vir leerders aan te koop, hoewel die WKOD fondse aan skole beskikbaar stel om handboeke aan te koop.
5. Nie-artikel 21 skole se aandag word daarop gevestig dat N & S-toekennings wat onderskeidelik vir handboeke en plaaslike aankope gespesifiseer is voortaan slegs aangewend mag word vir die oorspronklike oogmerk. Geen verskuiwing van fondse vanaf u toekenning vir handboeke na die toekenning vir plaaslike aankope sal toegelaat word nie.
6. Die Wes-Kaap Onderwysdepartement moet deurlopend verslag doen aan die nasionale Departement van Onderwys oor die aanwending van die algehele begrote bedrag vir LOOM. Dit is dus noodsaaklik dat skole wel die bedrae wat volgens WKOD 032 vir die aankoop van handboeke begroot is, nie later nie as 16 Oktober 2006 op handboeke bestee. Die rekwisisies (WKOD 034) moet dus nie later nie as 16 Oktober 2006 by die bestelkantoor te Kuilsrivier ingedien word.
7. U samewerking in hierdie verband word waardeer.


GETEKEN: J.H. LYNERS
HOOF: ONDERWYS
DATUM: 2006:10:04