1. Die Minister vir Staatsdiens en Administrasie (MPSA) het ‘n bepaling uitgevaardig, in werking vanaf 1 Januarie 2006, oor die instel van ‘n Werknemer-geïnisieerde Skeidingspakket (WGSP).

2. TOEPASSING VAN DIE BEPALING
2.1 Die bepaling is van toepassing op alle werknemers wat permanent aangestel is ingevolge die Staatsdienswet, 1994, soos gewysig, maar sluit persone uit wat tydelik of op ‘n vastetermynkontrak aangestel is.
2.2 ‘n Bepaling word nog ingewag van die Nasionale Minister van Onderwys wat sal besluit of die WGSP op opvoederpersoneel van toepassing gemaak sal word.

3. DOEL VAN DIE BEPALING
3.1 Die bepaling is bedoel om werknemers wat deur transformasie en herstrukturering geraak word en wat die staatsdiens wil verlaat die geleentheid te bied om aansoek te doen om ‘n Werknemer-geïnisieerde Skeidingspakket. Indien sodanige skeidingspakket aanvaar word, sal dit meebring dat die werknemer vrywilliglik uit die staatsdiens bedank.
3.2 Die Departement: Staatsdiens en Administrasie (DPSA) het die volgende verduideliking verskaf oor wat bedoel word met "werknemers wat deur transformasie en herstrukturering geraak word":

Transformasie

“ … dit hou verband met omstandighede waar dit noodsaaklik is om die aard, funksie of toestand van ‘n werknemer se voortgesette diens te verander om uitvoering te gee aan die beginsels vir publieke administrasie soos vervat in artikel 195 van die Grondwet, 1996. In die praktyk sal sulke omstandighede tipies op die volgende betrekking hê:

  • Die verbetering van die doeltreffende gebruik van hulpbronne

  • Die gelyke voorsiening van openbare dienste

  • Die vestiging van ‘n verteenwoordigende werksmag."

Herstrukturering

"dit hou verband met omstandighede waar ‘n werknemer se voortgesette indienshouding ongewens geword het as gevolg van die volgende:

  • Die herorganisasie en/of hervestiging van funksies

  • Die behoefte om voorsiening te maak vir die herontplooiing en/of alternatiewe plasing van werknemers."
4. TOEPASSING VAN DIE BEPALING

pSlegs werknemers wat deur transformasie en herstrukturering geraak word, mag aansoek doen om vrywillig uit die staatsdiens te bedank op grond van die Werknemer-geïnisieerde Skeidingspakket, soos uiteengesit in die aangehegte Bylae WGSP .

5. KRITERIA VIR DIE OORWEGING VAN AANSOEKE
5.1 Wanneer die uitvoerende gesag (of gedelegeerde) ‘n aansoek ontvang, moet hy/sy besluit om die aansoek te ondersteun of nie.
5.2 By die oorweging van die aansoek moet die volgende kriteria, as minimum, in oorweging geneem word:
5.2.1 Die impak wat dit op die diensleweringsvermoëns van die departement sal hê indien die werknemer die departement sou verlaat.
5.2.2 Die werknemer se bevoegdheid en geskiktheid vir voortgesette indienshouding.
5.2.3 Die wyse waarop die werknemer se bedanking die doelwit van die transformasie en herstrukturering van die departement sal bevorder.
5.2.4 Die spesifieke redes vir die werknemer se versoek.
5.2.5 Die vermoë van die departement om die koste te finansier wat verbonde is aan die betaling van die skeidingspakket (bv. terugbetaling aan die Pensioenfonds, skeidingsbetaling, verlofuitbetaling, ens.).
5.2.6 Die uitwerking van die toekenning van die skeidingspakket op die moraal van ander werknemers.
5.2.7 Of die werknemer ‘n pos op die departement se diensstaat beklee en of die werknemer addisioneel tot die diensstaat gedra word.

6. KENNISGEWING VAN BEËINDIGING VAN DIENS

Wanneer die werknemer kennis van die goedkeuring van sy/haar aansoek ontvang, moet ‘n werknemer kennis gee dat hy/sy bedank ooreenkomstig die Staatsdiensregulasies, 2001 (Hoofstuk 1, Deel VII G 2.3). Die werknemer se uittrede uit die departement moet in werking tree binne ‘n tydperk van twee maande na die datum van die kennisgewing van die besluit dat sy/haar aansoek goedgekeur is.

7. ALGEMENE ASPEKTE
7.1 Enige saak van wangedrag of onbevoegdheid teen ‘n werknemer moet eers gefinaliseer word voordat sy/haar aansoek oorweeg kan word.
7.2 Indien ‘n aansoek geweier word, is dit nie nodig om die aansoek na die Departement : Staatsdiens en Administrasie te verwys nie.
7.3 Indien ‘n aansoek geweier word, moet die gronde vir die weiering op skrif gegee word.
7.4 Werknemers moet ingelig word van hulle reg om ‘n besluit in heroorweging te neem. In hierdie opsig moet voldoen word aan die Wet op die Bevordering van Administratiewe Geregtigheid, 2000.

8. BREË FOKUS VAN BESLUITNEMINGSKRITERIA

Die breë fokus van die kriteria soos uiteengesit in paragraaf 5.2 hierbo is om ‘n gesonde balans te tref tussen die diensleweringsvereistes en imperatiewe van transformasie (diensgelykheid met die oog op ‘n meer verteenwoordigende werkmag). Die ministeriële bepaling het as primêre fokus kontinuïteit en stabiliteit in dienslewering. Dit is dus duidelik dat alle aansoeke nie gunstig oorweeg kan of sal word nie. ‘n Holistiese benadering sal ongetwyfeld toegepas moet word om te verseker dat waardevolle vaardighede en kundigheid nie vir die WKOD verlore sal gaan nie. In hierdie opsig is daar besluit dat, alhoewel werknemers hulle aansoeke om die skeidingspakket mag voorlê, die finale besluite oor hierdie aansoeke slegs geneem sal word wanneer die uitkoms van die herontwerpproses van die WKOD bekend is.

9. WERKNEMERS WAT ALREEDS GERAAK IS DEUR VORIGE HERSTRUKTURERINGSOEFENINGE

Alle werknemers wat botallig verklaar is, mag aansoek doen om die skeidingspakket. Jonger werknemers wat verkies om in diens te bly, mag hulle botallige status uitruil met ‘n ouer werknemer wat verkies om die diens te verlaat. Hierdie omruiling sal egter slegs gunstig oorweeg word indien die werknemers van gelyke rang en van dieselfde standplaas is. Indien die werknemers, wat hulle status wil uitruil, nie van dieselfde standplaas is nie, moet die standplase naby genoeg aan mekaar wees om die opname van ‘n botallige personeellid binne die gevolglike vakature te kan fasiliteer.

10. PROSEDURE VIR DIE OORWEGING VAN AANSOEKE

Aansoeke moet as volg voorgelê word:
10.1 Werknemers moet die aangehegte aansoekvorm voltooi (Bylae A).
10.2 Die aansoekvorm (Bylae A) moet aan sy/haar lynbestuurder (vlak van Direkteur/ Hoof van inrigting) vir kommentaar/aanbeveling voorgelê word. Die lynbestuurder moet sy/haar kommentaar/aanbeveling by Afdeling B van Bylae A invoeg.
10.3 Die lynbestuurder moet die aansoekvorm voorlê aan die Personeelkantoor, wat verantwoordelik sal wees vir die verdere prosessering en koördinering van alle aansoeke.

11. BESLUITNEMINGSPROSES

Die volgende besluitnemingsprosesse is gestipuleer in die bepaling van die Minister vir Staatsdiens en Administrasie (MPSA):
11.1 Die betrokke Lid van die Uitvoerende Raad (LUR) (of gedelegeerde ) moet aandui of hy/sy die aansoek ondersteun of nie ondersteun nie.
11.2 Die MPSA (of delegeerde) moet kommentaar lewer ten opsigte van elke aansoek.
11.3 LUR (of gedelegeerde) moet ‘n finale besluit neem.

12. VRAE WAT DIKWELS GEVRA WORD

Aangeheg is ‘n lys van vrae wat dikwels gevra word om werknemers verder te help in hierdie saak. (Sien aangehegte Bylae B.)


13. Die direktief van die MPSA en alle gepaardgaande aansoek-dokumente was slegs in Engels uitgereik. Eksemplare van die dokumente sal binnekort in die ander twee amptelike tale beskikbaar gestel word.

14. Maak asseblief seker dat alle staatsdienswetpersoneellede ingelig word aangaande die inhoud van hierdie omsendbrief. U samewerking in hierdie opsig word waardeer.


GETEKEN: R.B. SWARTZ
HOOF: ONDERWYS
DATUM: 2006:06:15


Die dokumente, waarna verwys word as bylaes by die Omsendbrief, word nie aangeheg nie maar is as drukstukke beskikbaar.