Goedkeuring is verleen vir die terugwerkende verhoging in die kwartaallikse subsidies van die mees behoeftige preprimêre (graad R-) klasse/leerterreine vanaf R3 tot R6 of R7 per leerder met ingang van 1 April 2005 (2de kwartaal). In ‘n poging om die kontantvloei van die meeste preprimêre leerterreine te verbeter het die Wes-Kaap Onderwysdepartement (WKOD) besluit om die huidige betalingsmetode van 4(vier) kwartaallikse subsidie- oordragbetalings te verander.
| 1. |
VERHOGING VAN SUBSIDIE
Vanweë beperkte fondse kon nie alle skole/leerterreine by die verhoging in subsidie baat nie. Gevolglik is die beginsels van die Nasionale Norme en Standaarde vir die befondsing van skole toegepas om die mees behoeftige skole te identifiseer. Skole wat van mening is dat hulle armoedevlak foutiewelik geklassifiseer is, kan ‘n brief met ‘n volledige motivering aan die Direkteur van die plaaslike Onderwysbestuur-en-ontwikkelingsentrum (OBOS) van die WKOD rig vir ‘n moontlike hersiening van hulle klassifikasie. Skole wat gebaat het by die verhoging het individuele briewe ontvang.
|
| 2. |
VERANDERING IN BETALINGSMETODE
Die huidige stelsel van vier kwartaallikse subsidie-oordragbetalings aan skole verander met onmiddellike effek om voorsiening te maak vir twee sesmaandelikse betalings. Die eerste betaling sal jaarliks vanaf Julie ‘n aanvang neem. Dit sal betrekking hê op die tweede kwartaal en insluit ‘n voorskotbetaling vir die derde kwartaal gebaseer op die leerderinskrywing vir die tweede kwartaal. Die tweede betaling sal jaarliks in Oktober geskied. Dit sal betrekking hê op die vierdie kwartaal en insluit ‘n voorskotbetaling vir die eerste kwartaal van die nuwe akademiese jaar. Die proses met betrekking tot die indiening van subsidie-aansoekvorms sal onveranderd bly, nl. aan die einde van elke skoolkwartaal. Die rekonsiliasie van skole se rekeninge sal op ‘n deurlopende basis geskied en oorbetalings sal van die volgende betaling verhaal word. Streng finansiële dissipline moet toegepas word om te verseker dat die graad R-opvoeder haar maandelikse salaris ontvang en fondse beskikbaar is vir die dag-tot-dag bestuur van die leerterrein/klas.
|
| 3. |
DOEL VAN DIE SUBSIDIE
Vanweë algemene onduidelikheid rakende die benutting van die subsidie, geld die volgende riglyne met onmiddellike effek om te verseker dat die subsidie korrek toegepas word:
|
| 3.1 |
Die basiese verdeling van die subsidie moet wees 70% as bydrae tot die opvoeder se salaris en 30% as bydrae tot die dag-tot-dag instandhouding van die leerterrein/klas, d.i. die aankoop van preprimêre (graad R-) leermateriaal, skryfbehoeftes en toerusting. Die volgende lys van items word beskou as noodsaaklik:
‘n Basiese salaris vir die opvoeder
Leerderondersteuningsmateriaal en dienste, bv. gom, verf, deeg, ens.
Opvoedkundige speelgoed/toerusting.
NB. Aangesien dit duidelik is dat die Staatsubsidie nie voldoende sal wees om alle uitgawes te dek nie, moet die bestuur van die leerterrein/skool ander opsies oorweeg om hul inkomste aan te vul, en ‘n maandelikse vergoeding van ten minste R2 000 vir die opvoeder te verseker nl. borgskappe, fondsinsameling, finansiële ondersteuning deur die ouers ens. Skole moet egter ook kennis neem dat alle kwalifiserende leerders met ingang van die tweede kwartaal van 2006 gefinansier gaan word. Die inskrywings vir ‘n enkel klas moet egter nie 30 leerders oorskry nie.
|
| 3.2 |
'n Kontrak moet op ‘n jaarlikse basis tussen die opvoeder en haar werkgewer opgestel word en die volgende inligting bevat:
‘n basiese maandelikse salaris
voorwaardes vir aanstelling bv. jaarlikse verlof, werkure, ens.
kurrikulum wat gevolg moet word.
|
| 4. |
VOORWAARDES VIR DIE BETALING VAN ‘n SUBSIDIE
|
| 4.1 |
Die volgende dokumente moet die kwartaallikse aansoek om finansiering (Bylae A en B) vergesel:
‘n Volledige finansiële staat (Bylae C) moet deur die finansiële beampte van die skool voorberei word en aandui hoe die vorige subsidie gespandeer is. (Hierdie finansiële staat moet deur die prinsipaal, die graad R-opvoeder, ‘n getuie en die Voorsitter van die Beheerliggaam, indien enige, onderteken word. Die staat moet ook vergesel word van kwitansies vir alle uitgawes wat gemaak is.)
‘n Afskrif van die daaglikse klasbywoningsregister wat die daaglikse aanwesigheid en afwesigheid van elke leerder duidelik aandui.
‘n Sertifikaat van effektiewe finansiële bestuur (Bylae D)
|
| 4.2 |
Die skool moet ook voldoen aan die volgende vereistes:
Dit moet amptelik by die WKOD geregistreer wees en in besit wees van ‘n registrasiesertifikaat uitgereik deur die WKOD-hoofkantoor.
Dit moes die kitsopnamevorm sowel as die jaarlikse opnamevorm (OBIS) ingedien het.
Dit moet die eienaar wees van ‘n amptelike bankrekening wat in die naam van die skool en nie ‘n privaat entiteit nie, geregistreer is, waarin die subsidie oorgedra kan word.
Dit moet voldoen aan die WKOD-kurrikulum.
|
| 4.3 |
Onvermoë om te voldoen aan enige van die bogenoemde mag lei tot die onbepaalde opskorting van die subsidie tot tyd en wyl daar aan die vereistes voldoen is.
|
| 4.4 |
Skole/leerterreine se aandag word weereens gevestig op die inhoud van WKOD Omsendbrief 0046/2004, wat bepaal dat geen voorgraad-R-leerders, d.w.s. leerders jonger as 4 jaar en 6 maande, op die terreine van openbare skole gehuisves mag word nie.
|
| 5. |
Die inhoud van hierdie omsendbrief moet onder die aandag gebring word van alle rolspelers wat by Vroeëkindontwikkeling- (VKO-) opvoeding by die skool/leerterrein en die plaaslike OBOS betrokke is.
|
GETEKEN: D.R. SHEPHERD
HOOF: ONDERWYS
DATUM: 2006:07:12
|