1. Die Wet op Indiensneming van Opvoeders (WIO), 1998, is onlangs gewysig deur die invoeging van Artikel 6B wat voorsiening maak vir die omskakeling van die tydelike aanstellings van opvoeders na permanente aanstellings.
  2.

‘n Tydelike opvoeder is ‘n opvoeder wat tans in ‘n goedgekeurde substantiewe vakante posvlak 1-pos in ‘n tydelike hoedanigheid vir ‘n geslote tydperk aangestel is. Hierdie definisie is nie van toepassing op opvoeders wat in ‘n waarnemende hoedanigheid in vakante substantiewe bevorderingsposte aangestel is of op plaasvervangers wat aangestel is in die plek van (permanente) opvoeders wat om een of ander rede van diens afwesig is nie.

Tydelike opvoeders wat afgetree het uit die diens van die Wes-Kaap Onderwysdepartement (WKOD) en diegene wat ‘n Vrywillige Skeidingspakket (VSP) aanvaar het, word ook uitgesluit van die maatreëls soos in hierdie omsendbrief vervat.
  3. Die omskakeling van ‘n tydelike aanstelling na ‘n permanente aanstelling is onderhewig aan die diskresie van die Hoof van die Departement van ‘n provinsiale onderwysdepartement.
  4. In hierdie verband is dit uiters belangrik om daarop te let dat die WKOD die beginsel van ope mededinging onderskryf wanneer dit kom by die permanente vulling van poste op sy diensstaat en die diensstate van inrigtings onder sy beheer. Ten einde hierdie beginsel te ondersteun, word poste gereeld in die nasionale koerante (in die geval van kantoorgebonde opvoedersposte) en in vakaturelyste (in die geval van poste by inrigtings sowel as kantoorgebonde poste) geadverteer.
  5. Die WKOD het in oorlegpleging met die onderwysersunies wat in die Provinsiale Raad op Arbeidsverhoudinge in die Onderwys (PRAVO) verteenwoordig word, op die volgende kriteria besluit vir die omskakeling van die aanstellingstatus van tydelike opvoeders na permanente opvoeders ingevolge artikel 6B van die Wet op Indiensneming van Opvoeders, 1998, met ingang van 1 Julie 2006:
  5.1 Die permanente aanstelling moet in ‘n vakante substantiewe posvlak 1-pos gemaak word.
  5.2 Die opvoeder moet tans tydelik in diens van die WKOD wees.
  5.3 Die opvoeder moet vir ‘n tydperk van een jaar vanaf die dag van implementering van die wysiging soos vervat in artikel 6B diens gedoen het. Die tydperk van een jaar strek oor die tydperk 26 Januarie 2005 tot 26 Januarie 2006 en mag diensonderbrekings insluit van nie langer nie as een maand op ‘n slag.
  5.4 Die opvoeder moet
  • professioneel gekwalifiseer wees vir die onderwysprofessie;
  • aan die vereistes verbonde aan die pos voldoen waarin sy/haar omskakeling van aanstelling gemaak sal word;
  • geregistreer wees by die SARO.
  5.5 Die keerdatum vir die indien van die aansoeke is 31 Julie 2006..

  6. Die permanente aanstelling moet deur die skoolbeheerliggaam ondersteun word.
  7. In die lig daarvan dat hierdie ‘n buitengewone reëling is vir sodanige opvoeders wat alreeds vakante substantiewe poste beklee, sal Diensbillikheidsdirektiewe (Employment Equity) nie op hierdie aanstellings van toepassing wees nie.
  8. Tydelike opvoeders wat wil aansoek doen om die omskakeling van hul tydelike aanstellings na permanente aanstellings ingevolge artikel 6B van die WIO, 1998 moet ‘n ingevulde DPE 1-vorm (aansoek om betrekking) en ‘n motiveringsbrief by die WKOD indien. Aansoeke moet gepos word aan: Die Hoof van Onderwys, Wes-Kaap Onderwysdepartement, Subdirektoraat: Personeelvoorsiening (Opvoeders), vir aandag: mnr NJ Bailey, Privaatsak X9114, Kaapstad, 8000.
  9. Die WKOD sal ontvangs van die aansoeke erken en daarna sal die aansoeke na die bestuurstruktuur vir kommentaar en/of ‘n aanbeveling verwys word.
10. Die aandag van alle belangstellendes word gevestig op die feit dat die omskakeling van tydelike aanstellings na permanente aanstellings van huidige tydelik aangestelde opvoeders ‘n eenmalige aanbod is en aansoeke wat na die keerdatum ontvang word, nie oorweeg sal word nie.
11. In die lig daarvan dat plaasvervangeropvoeders nie vakante substantiewe poste beklee nie, (maar aangestel is in die plekke van permanent aangestelde opvoeders wat van diens afwesig is of gesekondeer is), mag hulle nie ingevolge die maatreëls soos uiteengesit in hierdie omsendbrief vir permanente aanstelling oorweeg word nie.  Sou ‘n plaasvervanger-opvoeder op ‘n latere stadium ‘n vakante substantiewe pos bekom, mag sodanige op-voeder vir permanente aanstelling oorweeg word indien hy/sy aan die kriteria voldoen soos uiteengesit in paragraaf 5 van hierdie omsendbrief.
12. In die geval van plaasvervangeropvoeders, sal hierdie maatreël van toepassing wees totdat die plaasvervangeropvoeder ‘n tydelike aanstelling in ‘n vakante substantiewe pos bekom, in welke geval die aansoek vir die omskakeling van die tydelike aanstelling na die permanente aanstelling binne drie maande na die aanvangsdatum van die tydelike aanstelling ingedien moet word.
13. Let daarop dat slegs plaasvervangeropvoeders wat ten tye van die uitreiking van hierdie omsendbrief in die diens van die WKOD aangestel was en voldoen aan die kriteria soos uiteengesit in paragraaf 5 van hierdie omsendbrief, vir die omskakeling van hulle tydelike aanstellings na permanente aanstellings kwalifiseer ingevolge die maatreëls van toepassing op plaasvervangeropvoeders in die bovermelde paragrawe 11 en 12.
14. Prinsipale word versoek om te verseker dat hierdie omsendbrief onder die aandag van alle opvoeders op hul personeel, veral diegene wat in ‘n tydelike en plaasvervanger-hoedanigheid aangestel is, gebring word.
15. Hierdie omsendbrief is van toepassing op gewone openbare skole, spesiale skole en VOO-inrigtings.
16. Die samewerking van alle betrokke persone sal die suksesvolle bestuur van hierdie proses verseker en sal dus opreg waardeer word.


GETEKEN: RB SWARTZ
HOOF: ONDERWYS
DATUM: 2006:06:16