1. Wanneer daar besluit word dat ‘n skool gesluit of hervestig moet word, moet die Onderwysbestuurs-en-ontwikkelingsentrums (OBOS) direkteur toesien dat die volgende prosedure gevolg word:
1.1 Die OBOS-direkteur moet die Direkteur: Fisiese Hulpbronbeplanning (DPR) skriftelik verwittig dat ‘n sekere eiendom (erf, gebou, koshuis) nie meer deur die OBOS-distrik vir onderwysdoeleindes benodig word nie. Sodanige kennis moet ten minste vier kalendermaande voordat ‘n eiendom ontruim word, gegee word.
1.2 Die OBOS moet ‘n administrateur aanstel om ‘n voorraadopname te doen asook om te besluit oor die beskikking van bedryfsbates, moontlike fondse, betaling van rekeninge, ens.
1.3 Die OBOS moet verseker dat die munisipalediensterekeninge (vir water, elektrisiteit, vullisverwydering, ens) ten volle vereffen is voordat die eiendom teruggegee word.
1.4 Sou die OBOS nie daarin slaag om bogenoemde prosedure af te handel voor die eiendom ontruim word nie, sal die OBOS fondse beskikbaar moet stel vir die aanstelling en besoldiging van sekuriteitsbeamptes om die eiendom te beveilig tot vyf werksdae nadat die eiendom amptelik aan die DPR terugbesorg is.
2. Wanneer onbenutte en/of onderbenutte skoolgeboue en terreine deur ‘n OBOS afgestaan word, sal die volgende prosedure gevolg word:
2.1 Die eiendom sal eers intern aan die 3 takke van die WKOD beskikbaar gestel word, naamlik Operasionele Onderwysbestuur, Onderwysbeplanning en -Ontwikkeling en Korporatiewe Bestuur.
2.2 Versoeke om die eiendom te bekom, moet aan die Direktoraat: Fisiese Hulpbronbeplanning (DPR) gerig word wat dan ‘n voorlegging aan die Hoof: Onderwys sal voorberei met ‘n voorstel om die eiendom vir toekomstige gebruik deur die WKOD te behou of om die eiendom aan die Departement van Vervoer en Openbare Werke (DVOW) (Hoofdirektoraat: Eiendomsbestuur) terug te besorg.
2.3 Sou die eiendom aan DVOW afgestaan word, sal die DPR die DVOW ten minste drie maande voor die eiendom ontruim word, kennis gee dat die eiendom afgestaan gaan word.
2.4 Sou die WKOD nie daarin slaag om bogenoemde prosedure af te handel voor die eiendom ontruim word nie, sal fondse deur die programbestuurder van Program 2 beskikbaar gestel word vir die aanstelling en besoldiging van sekuriteitsbeamptes om die eiendom te beveilig tot vyf werksdae nadat die eiendom amptelik aan die DVOW terugbesorg is.


GETEKEN: R.B. SWARTZ
HOOF: ONDERWYS
DATUM: 2006:06:09