1. Hierdie omsendbrief is ‘n opvolging van Omsendbriewe 001/2006,  0019/2006 en 0024/2006 wat handel oor die verkiesing van beheerliggame vir openbare skole in 2006.
2. ‘n Ooreenkoms is tussen die Departement van Onderwys (Nasionaal) en die Onafhanklike Verkiesingskommissie (OVK) bereik dat laasgenoemde skole in die provinsies behulpsaam sal wees gedurende die verkiesing van beheerliggame.
3. Die Wes-Kaap Onderwysdepartement (WKOD) en die OVK in die Wes-Kaap het ooreengekom dat die OVK skole behulpsaam sal wees met die proses van verkiesing van beheerliggame. Die OVK sal nie die verantwoordelikheid van die kiesbeampte wat deur die skool aangestel is, (prinsipaal wat as sodanig aangestel is), en ook nie die verantwoordelikheid van die kringbestuurder of OBOS-direkteur oorneem nie.
4. Die Departement van Onderwys het versoek dat die name en besonderhede van nuutverkose lede van beheerliggame onmiddellik na afloop van die verkiesing aan hulle voorsien word. Prinsipale van skole word derhalwe versoek om die volgende te doen:
(a) die datums van hul verkiesingsvergaderings aan mnr I Morkel by Hoofkantoor, sowel as hul OBOS te voorsien;
(b) die name en besonderhede van persone wat verkies is op die vorm wat by Omsendbrief 0019/2006 gedateer 20 April 2006 aangeheg was, aan die OVK beampte, die OBOS, sowel as mnr Morkel by Hoofkantoor te voorsien; en
(c) die name en besonderhede van die ampsdraers wat by die eerste vergadering van beheerliggame verkies word aan die OBOS sowel as mnr Morkel by Hoofkantoor te voorsien. Die besonderhede vir Mnr Morkel moet na die volgende adres gestuur word: 
Hoof: Onderwys
Wes-Kaap Onderwysdepartement
Vir aandag: Mnr I Morkel
Privaatsak X 9114
KAAPSTAD
8000
5. Prinsipale word daaraan herinner dat indien ‘n kworum nie by die eerste nominasie-en verkiesingsvergadering verkry kon word nie, ‘n tweede vergadering geskeduleer moet word ingevolge die prosedure soos aangedui deur maatreël 12(2) van die Maatreëls, maar in hierdie geval word ‘n kworum nie benodig om voort te gaan met die nominasie-en verkiesingsvergadering nie.
6. Die WKOD besef dat die verkiesing van beheerliggame ‘n groot taak is en daar word op die samewerking van almal staatgemaak om dit ‘n sukses te maak.
7. Dankie vir u samewerking.


GETEKEN: J.H. LYNERS
HOOF: ONDERWYS
DATUM: 2006:06:08