1. Die ampstermyn van alle beheerliggame van openbare skole wat gedurende 2003 ingevolge die Maatreëls betreffende Beheerliggame vir Openbare Skole uitgevaardig kragtens die Suid-Afrikaanse Skolewet, 1996 (Wet 84 van 1996), soos gewysig, verkies of saamgestel is, sal gedurende die jaar 2006 verstryk.
2. Die ampstermyn van ‘n beheerliggaam strek oor drie jaar, beginnend vanaf die datum van die beheerliggaam se eerste vergadering na die verkiesing. Skole wat in 2003 verkiesing gehou het en wie se ampstermyn gedurende 2006 verval moet dus die nodige reëlings tref vir die verkiesing van nuwe beheerliggame gedurende 2006. Die verkiesing moet plaasvind tussen Mei 2006 en Junie 2006, ooreenkomstig ‘n besluit deur die Departement van Onderwys.
3. Ten einde die verkiesingsproses vlot te laat verloop sal die WKOD weereens prinsipale as kiesbeamptes oplei om hulle in staat te stel om die verkiesing op ‘n suksesvolle wyse te hanteer. Opleidingsessies sal in verskeie sentra gehou word en dit is belangrik dat alle prinsipale hierdie sessies bywoon. Die opleidingsprogram sal mettertyd beskikbaar gestel word.
4. Die Handleiding is aangeheg en prinsipale word versoek om die Maatreëls, wat gedurende 2003, onder dekking van omsendbrief 24/2003 aan skole versend is saam te bring na die opleidingssessies.
5. Die Wes-Kaap Onderwysdepartement wil graag die huidige lede van beheerliggame bedank vir die onbaatsugtige diens wat hulle in belang van die onderwys gelewer het.


GETEKEN: J.H. LYNERS
HOOF: ONDERWYS
DATUM: 2006:01:24

Bylae: Handleiding vir Skoolbeheerliggame  (grootte: 44 KB)