In die geval van meningitis moet ‘n leerder onmiddellik by die skool weggewys word en die leerder mag slegs terugkeer skool toe na goedkeuring deur die leerder se dokter nadat behandeling begin het. Bakteriële meningitis (meningococcal meningitis) is ‘n aanmeldbare siekte en die plaaslike en provinsiale Departemente van Gesondheid moet onmiddellik in kennis gestel word.

In die geval van waterpokkies (varicella virus), moet leerders by die skool weggewys word solank as wat behandeling voortduur en mag die leerder slegs terugkeer nadat toestemming van die dokter verkry is.

In die geval van kopluisbesmetting moet leerders by die skool weggewys word slegs totdat behandeling begin is met ‘n spesiale sjampoe wat by ‘n apteek verkry kan word. Hulle mag daarna na die skool terugkeer selfs al is nete steeds teenwoordig. Behandeling met gewone haarsjampoe sal nie effektief wees nie. Indien ‘n aantal leerders by die skool besmet is, word daar aanbeveel dat al die ouers van kinders by die skool ingelig word en aangeraai word om gereeld te kyk of hule kinders luise het. (Voorbeelde van geskikte briewe is aangeheg).

In die geval van masels moet leerders vir 7 dae by skole weggewys word nadat rooi kolletjies dwarsoor die liggaam uitgeslaan het.

In die geval van jeuksiekte moet leerders by die skool weggewys word tot 24 uur nadat die behandeling begin het. Jeuksiekte kan nie self gediagnoseer of self behandel word nie. Indien die skool vermoed dat ‘n leerder jeuksiekte onder lede het, moet die leerder na die naaste kliniek, dokter of verpleegster verwys word.

In die geval van pampoentjies moet die leerder vir 7 – 9 dae by die skool weggewys word nadat die speekselkliere begin opswel het, en die leerder mag slegs na die skool terugkeer met ‘n goedkeuringsbrief van die dokter.