1. Dit is die Wes-Kaap Onderwysdepartement (WKOD) se ernstige strewe om alle vakante poste so spoedig moontlik te adverteer. Dit geld ook vir vakante prinsipaalsposte by nuwe skole.
2. Indien prinsipaalsposte by nuwe skole laat geadverteer word, kan dit in sommige gevalle lei tot ernstige konflik in sowel as buite die skool.
3. Die WKOD het derhalwe besluit dat die kringbestuurder die nodige reëlings moet tref vir die adverteer van die prinsipaalspos sodra daar ‘n vaste besluit geneem is oor die datum waarop die skool sal open.
4. Met die adverteer (opstel en plasing van advertensie) van die pos moet die kringbestuurder die volgende in gedagte hou:

  • Die besondere behoeftes en eiesoortigheid van die skool en gemeenskap wat bedien word, sal bepaal watter profiel die verlangde skoolhoof moet hê.

  • Die advertensie moet so opgestel word dat die kriteria vir seleksie en die vereistes van die pos baie duidelik gestel is.
5. Die aanstellingsdatum van die suksesvolle aansoeker sal die datum wees waarop die skool open. Benoemings vir die aanstelling in die onderhawige prinsipaalsposte sal steeds deur die (interim) skoolbeheerliggaam uitgeoefen moet word. Let asseblief daarop dat wanneer ‘n nuwe skool tot stand kom ingevolge die Suid-Afrikaanse Skolewet van 1966, of enige toepaslike provinsiale wet, tot tyd en wyl die betrokke beheerliggaam of -raad van die skool ingestel is, die aanstelling in, bevordering tot of oordrag na enige pos in tydelike hoedanigheid deur die Departementshoof gemaak moet word.
6. Aangesien die betrokke nuwe skole nie op Persal sal reflekteer nie, sal die inligting nie op die Web verskyn nie. Derhalwe sal die betrokke kringbestuurder die verlangde advertensievorm tesame met die amptelike kennisgewing ten opsigte van die opening van die skool aan die WKOD moet voorlê, sodat die personeelkantoor self die advertensie kan plaas.


GETEKEN: J.H. HURTER
HOOF: ONDERWYS
DATUM: 2006:02:23