1. Ingcaciso yokwandlalela

Sekuliqela leminyaka iSebe leMfundo leNtshona Koloni lijongene nomngeni wokubonelela ngendawo eyaneleyo yokufundisela abafundi kweli phondo. Ezona mpawu ziphambili zale ngxaki zingashwankathelwa ngolu hlobo lulandelayo:
1.1 Ukwanda kwenani labafundi

Iisaveyi zokujonga amanani abantu (demographic surveys) zibonisa ukuba ngama-48 000 abantu abafudukela eNtshona Koloni qho ngonyaka. Kwiminyaka elishumi edlulileyo inani labafundi ababhaliswe kwizikolo ezikwiphondo leNtshona Koloni lande ngama-65 000 abafundi, ukususela kuma-832 000 ngowe-1995 ukuya kuma-912 000 ngowe-2004 kuphela, loo nto ithethe ukwanda kwabafundi ngama-24 000.
1.2 Ukufuduka nokungahlali ndaweninye kwabafundi
1.2.1 Ukukhula kwamanani abafundi ababhalisiweyo kunye nokungahlali ndaweninye kwabafundi kwenza ukulungiselela abafundi indawo yokufunda kube nzima yaye kucacisa into yokuba kukho inani elikhulu lamagumbi okufundela nezikolo ezingasetyenziswa ngokupheleleyo kweli phondo kwakunye nengxinano nokunqongophala kwamagumbi okufundela kwelinye icala.
1.2.2 Zininzi iindlela ekungalungiswa ngazo ukubhidana phakathi kokubonelela (supply) nemfuneko (demand) yamagumbi okufundela: ngokuthi kuhlanganiswe izikolo, kusetyenziswe iibhasi zokuthutha abafundi, kwakhiwe amanye amagumbi okufundela, kusetyenziswe oomahamba-nendlwana njengamagumbi okufundela (mobile classrooms), njl. njl. Nangona kunjalo, ukuze zibe nokubenziseka ezinye zezi ndlela, kubaluleke ngokukodwa ukuba kuqulunqwe isikhokelo emasilandelwe ngokumalunga nomthamo wendawo yokufundela yesikolo.
2. Uxanduva oluwiswa ngumthetho
2.1 INtloko yeSebe leMfundo inoxanduva lokulawula ukwamkelwa kwabafundi kwisikolo sikarhulumente. Nakuba umgaqo-nkqubo wokwamkelwa kwabafundi kwisikolo sikarhulumente ugqitywa libhunga lolawulo lesikolo, zonke izicelo zokwamkelwa kwabafundi kwisikolo sikarhulumente mazithunyelwe kwiSebe leMfundo ngendlela ekuya kugqitywa ngayo yiNtloko yeSebe leMfundo. Ngaphezulu, umgaqo-nkqubo wokwamkelwa kwabafundi webhunga lolawulo lesikolo mawungqinelane noMgaqo-siseko weRiphablikhi yoMzantsi Afrika, noMthetho weZikolo waseMzantsi Afrika kunye nemigaqo-nkqubo yephondo esebenzayo.
2.2 Ukuba iNtloko yeSebe leMfundo iyala ukumamkela umfundi kwisikolo sikarhulumente, umfundi okanye umzali angenza isibheno kuMphathiswa weMfundo wePhondo esichasa eso sigqibo.
3. Injongo yomgaqo-nkqubo osisikhokelo
3.1 Injongo yesi sikhokelo kukucacisa gca umgaqo-nkqubo ongokumalunga nomthamo wendawo yokufundela yesikolo. Oku kuya kwenza iSebe leMfundo leNtshona Koloni likwazi ukulawula ubhaliso lwabafundi ngokugqithisileyo kwizikolo ezithile kuze kwelinye icala kube nokusetyenziswa bhetele indawo efumanekayo kwezinye izikolo.
3.2 Ukuze kube nokwenziwa isigqibo ngesi sikhokelo somgaqo-nkqubo kubalulekile ukuba kunikwe ingcaciso ngokumalunga noku kulandelayo:
3.2.1 Igumbi lokufundela okanye indawo yokufundela

Indawo yokufundela ichazwe kwiSetyhula 0240/2003 njengendawo efumaneka kulo naliphi na igumbi lokufundela, kuqukwa iilabhoratri, amagumbi awodwa kunye namanye amagumbi afanelekileyo kwisakhiwo sesikolo anokusetyenziselwa ukufundisa abafundi. (Kungandakanywa Iiholo zezikolo neentendelezo zengxoxo.)

Amagumbi awodwa anjengeelabhoratri zesayensi abandakanyiwe kwiinkcazo zamagumbi okufundela. Nakuba kunjalo, makuthathelwe ingqalelo imithetho echaphazelekayo, yaye kuqwalaselwe kwangokunjalo imiba yezempilo nokhuseleko lwala magumbi awodwa.
3.2.2 Amagumbi okufundela akhiwe ngeemali ezisuka kwii-arhente ezingezizo ezikaRhulumente

NgokweSiqendu 37(A) seSASA "Zonke ii-asethi ezifunyenwe sisikolo sikarhumelente … ziyipropathi yesikolo."

Njengoko izikolo zikarhulumente zikuMhlaba kaRhulumente, uMphathiswa weMfundo wePhondo/iSebe leMfundo leNtshona Koloni lingamisela iindlela emazisetyenziswe ngayo izakhiwo. Onke amagumbi okufundela asesikolweni aya kuthi ngoko ke athathelwe ingqalelo xa kusenziwa isigqibo ngelona nani lisezantsi labafundi emalibe kwiklasi nganye.
3.2.3 Umthamo wendawo yokufunda esikolweni nomlinganiselo wenani labafundi emalifundiswe ngutitshala (teacher:learner ratio)

Umthamo wendawo yokufunda esikolweni asiyonto efanayo nomlinganiselo wenani labafundi emalifundiswe ngutitshala. Umthamo wendawo yokufunda esikolweni uxhomekeke kwinani labafundi abanako ukufakwa kwisikolo esithile kusetyenziswa inani labafundi elinokufundiswa kwigumbi lokufundela (classroom:learner ratio).
4. Ukumiselwa komthamo wendawo yokufundela yesikolo
4.1 Isikhokelo sokumisela umthamo wendawo yokufundela yezikolo zikarhulumente eziqhelekileyo ukulungiselela u-2005 siza kusebenzisa umlinganiselo oza kuxhomekeka kwiimeko ezithile ukusuka kwelona nani lincinane ukuya kwelikhulu (sliding scale) ongulo 35 - 38. Ngamanye amazwi, umthamo wesikolo wokwamkela abafundi ngowe-2005 uza kuba ngabafundi abangama-35 kuye kuma-38 kwigumbi elinye, oko kuthi, 1:35 - 38 kuzo zonke izikolo.
4.2 Izikolo eziye zabhalisa zagqithisa kumthamo wazo omiselweyo ngabafundi abali-100 okanye ngaphezu koko ngo-2004, mazilinciphise inani labafundi ezilibhalisayo kule minyaka mihlanu izayo libe ngumthamo wazo omiselweyo. Izikolo ziza kunikwa esinye isikhokelo ngokumalunga noku ukwenzela ukulungiselela ukwamkela abafundi ngo-2005.
5. Ukusingatha ubhaliso lwabafundi ezikolweni kujoliswe kumthamo wazo omiselweyo

Kuza kulandelwa le nkqubo ilandelayo ngo-2004 ukulungiselela u-2005:
5.1 ABalawuli bee-EMDC baza kwazisa zonke izikolo ngencwadi ebhaliweyo ngokumalunga nomthamo wazo wokubhalisa abafundi ngokwemigangatho emiselweyo.
5.2 Ziyakhuthazwa izikolo ezabhalisa ngaphezu komthamo wazo omiselweyo ukuba zinciphise inani labafundi ezilibhalisayo.
5.3 Iiprayimari nezikolo eziphakamileyo eziya kuba namanani amancinane abhalisiweyo ngo-2005, zingacelwa nguMphathi weSekethe ukuba zibhalise abanye abafundi.
5.4 Ukuphendula kwisicelo esilolu hlobo, inqununu yesikolo inganika izizathu zokungabanda-kanywa kwamagumbi awodwa okanye icele ukuba kuthathelwe ingqalelo izifundo ezifundiswa sisikolo eso xa kumiselwa umthamo wendawo yokufundela kwisikolo eso.
5.5 UMphathi weSekethe uya kuthi emva koko aye kwisikolo eso ukuya kuqinisekisa ngemeko nenani lamagumbi awodwa, aze anike ingcebiso kuMlawuli we-EMDC ngenjongo yokuba aphinde akuthathele ingqalelo engaphezulu oku.
5.6 Ukuba kuye kwagqitywa ekubeni isikolo eso sinayo indawo eyaneleyo yabanye abafundi, kuya kuqaliswa ukubanjwa iindibano zokubonisana kunye nebhunga lolawulo lesikolo (SGB) elichaphazelekayo zokuba kubhaliswe abanye abafundi ukuya kutsho phantse kuma-38 baso nasiphi na isikolo. Aba bafundi mababhaliswe kumabakala okungena kwabo okokuqala kwisikolo eso (umzekelo kwiBakala 1, iBakala 8 okanye iBakala 10).
5.7 Kwiimeko ezithile apho kufumaniseke ukuba imfuno yendawo yokufunda iphakame kakhulu, uMlawuli we-EMDC makasebenzise ingqiqo yakhe ngokumalunga nokusetyenziswa kweendawo ezifumanekayo ukuqinisekisa ukuba bonke abafundi bafumana indawo yokufunda.
5.8 Izikolo ezikwiidolophana zasemaphandleni apho kukho isikolo esinye kuphela zingacelwa ukuba zamkele abafundi abangaphezu kwenani elichazwe kwingongoma 5.6 ngasentla.
5.9 Ukuba kufikelelwa kwimvumelwano malunga nokwamkelwa kwabanye abafundi, makulandelwe zonke iinkqubo nemigaqo efunwa libhunga lolawulo lesikolo.
5.10 Ukuba akukho mvumelwano ekufikelelwa kuyo ngokumalunga nokubhaliswa kwabanye abafundi ngo-2005, isikolo sinako ukwenza isibheno kuMlawuli we-EMDC oya kuthatha isigqibo sokugqibela ngokumalunga noku.
5.11 Ukuba kubhaliswa abanye abafundi, ezo zikolo ziya kwabelwa ngo-2005 izithuba ezinikwa ngenxa yokwanda kwamanani, ifanitshala kunye neZinto zokuNcedisa ekuFundeni (Learner Support Materials) ngokungqinelana nemigangatho emiselweyo.


ISAYINWE: R.B. SWARTZ
INTLOKO: YESEBE LEMFUNDO
UMHLA: 2004:11:24