1. Die Raad vir Gehalteversekering in Algemene en Verdere Onderwys en Opleiding (UMALUSI) het die modereringsproses van die graad 12 deurlopende evaluering (DASS) vir 2003 geverifieer. Beide UMALUSI-verifieerders en WKOD-amptenare was beïndruk deur die portefeuljestelsel en die algehele hoë standaard van die assesseringstake. Daar is ook verslag gelewer dat die portefeuljes goed bestuur en goed in stand gehou is.

2. Oor die algemeen dui beide die provinsiale en die nasionale verifiëringsprosesse van 2003 op die voordele wat die portefeuljestelsel vir die onderrig-, leer- en assesseringsprosesse inhou. Onderwysers word bemagtig aangesien hulle die geleentheid kry om hulle leerervaringe te deel. Hulle word ook blootgestel aan gemeenskaplike norme en standaarde.

3. Die aanbevelings wat deur UMALUSI gemaak is, sal rigting gee aan die WKOD se modereringsproses van 2004. Die volgende is ‘n kort opsomming van die algemene aanbevelings:

  • Die OBOS'e moet, in samewerking met die provinsiale VOO-DASS-koördineerder, ‘n modereringsplan ontwikkel wat deurlopende interne, kluster- en provinsiale moderering insluit.

  • Moderering in die beginfase (d.w.s. op skoolvlak) moet aandag geniet. Ondersteuning op hierdie vlak is van kardinale belang om gehalte te verseker en dit sal ook vir leerders ‘n aanduiding gee dat daar na hulle belange omgesien word.

  • Moderering van onderwysers se portefeuljes moet volgens nasionale en/of provinsiale beleid geskied. Dit is die primêre verantwoordelikheid van die OBOS-Kurrikulumadviseur. Departementshoofde, prinsipale en onderwysers word egter aangemoedig om betrokke te raak by die klustermodereringsessies om sodoende gemeenskaplike norme en standaarde te bevorder.

  • Onderwysers moet meer formatiewe terugvoering aan leerders en ouers gee.

  • Kurrikulumbeplanners moet onderwysers se vermoëns om na te sien, te assesseer en kommentaar te lewer oor die taal en die inhoud van assesseringstake, ontwikkel sodat leerders van hulle foute bewus gemaak kan word.
4. Die implementering van die DASS-ontwikkelingsplan vir moderering in 2004 sal deur die OBOS'e georganiseer en bestuur word. Ten einde hierdie modereringsproses te fasiliteer, sal die datums van modereringsvergaderings teen nie later nie as middel Februarie 2004 aan skole voorsien word. Die modereringsproses, wat sal bestaan uit drie gestruktureerde vergaderings gedurende loop van die jaar, sal soos volg verloop:

  • Standaardiseringsvergadering

  • Ondersteunings- en ontwikkelingsvergadering

  • Finale kluster-/aangesigmoderering
5. Die verifiëringsproses om te verseker dat moderering doeltreffend uitgevoer is, sal op die volgende twee vlakke geskied:

  • Op provinsiale vlak deur Hoofkantoor

  • Op nasionale vlak deur UMALUSI
6. Die uitdaging vir 2004, insoverre dit moderering en verifiëring betref, is soos volg:

  • Om 'n betekenisvolle verandering van normgebaseerde na kriteriumgebaseerde assessering te bewerkstellig

  • Om te verseker dat leerders se assesseringstake van beskrywende kommentaar voorsien word (formatiewe terugvoering) ten einde hulle te help om die gehalte van hulle werk te verbeter

  • Om modereringsverslae aan alle vlakke te voorsien (d.w.s. skole, OBOS'e en Hoofkantoor)

U samewerking sal waardeer word.



GETEKEN: J.P. RAULT-SMITH
HOOF: ONDERWYS
DATUM: 2004:02:02