| 1. |
Ingevolge artikel 10(1)(cA)(i) van die Inkomstebelastingwet, 2000 (Wet 30/2000) is alle openbare skole vrygestel van inkomstebelasting. Let egter daarop dat hierdie vrystelling teruggetrek kan word ten opsigte van 'n openbare skool wat ‘n besigheid bedryf wat nie in die geheel of hoofsaaklik fokus op die bevordering van sy hoofdoel as onderwysinrigting nie. |
| 2. |
Ingevolge artikel 18A van die bogemelde Inkomstebelastingwet, soos gewysig deur die negende skedule van die Inkomstebelastingwet, 2002 (Wet 30/2002), het die Suid-Afrikaanse Inkomstediens (SAID) goedkeuring verleen vir die groepregistrasie van alle openbare skole om ingevolge gemelde artikel 18A kwitansies aan donateurs uit te reik. Die verwysingsnommer wat vir hierdie doel aan alle openbare skole in die Wes-Kaap toegeken is, is 930000372. Die praktyk om ingevolge artikel 18A individueel aansoek om registrasie te doen moet op versoek van SAID gestaak word. |
| 3. |
Registrasie ingevolge artikel 18A maak belastingkortings moontlik ten opsigte van donasies vir spesifieke onderwysgerigte projekte, uitgesluit skoolgelde. Die belastingkorting is onderhewig aan die beperkings vervat in artikel 18A en sal slegs oorweeg word indien die nodige kwitansie en belastingsertifkaat, soos deur die betrokke onderwysinrigting uitgereik, saam met die jaarlikse belastingopgawe ingedien word. |
| 4. |
Geen belastingkorting sal toegestaan word indien die Kommissaris enige rede het om te glo dat ‘n onderwysinrigting 'n artikel 18A-kwitansie uitgereik het aan ‘n donateur vir skoolgelde of nie-opvoedkundige doeleindes. Misbruik van donasies ingevolge artikel 18A kan meebring dat die registrasie as Publieke Weldaadsorganisasies van skole van die Wes-Kaap Onderwysdepartement teruggetrek word en dat skole gevolglik ontneem sal word van die geleentheid om addisionele fondse vir opvoedkundige doeleindes in te samel. |
| 5. |
Die prosedures en vereistes rakende die administrasie van artikel 18A-kwitansies word vervat in die Riglyne en minimum vereistes ten opsigte van kwitansies wat hierdie kantoor binnekort deur middel van ‘n omsendbrief sal uitreik. |
| 6. |
Inrigtings wat artikel 18A-kwitansieboeke wil bekom, moet skriftelik by die Adjunkdirekteur van hulle Onderwysbestuurs-en-ontwikkelingsentrum (OBOS) aansoek doen. Voordat die OBOS sodanige kwitansieboek sal uitreik, sal dit verseker dat die inrigting die nodige interne kontroles in plek het om die prosedures van die Departement en SAID te kan volg en aan hulle vereistes te kan voldoen. |
| 7. |
Prinsipale en skoolbeheerliggame kan hulle OBOS versoek om ondersteuning met die nakoming van die prosedures en vereistes, onder andere die jaarlikse verslagdoening rakende die uitreiking van artikel 18A-kwitansies vir die belastingjaar 1 Maart tot 28 Februarie. |
| 8. |
Bring asseblief die inhoud van hierdie omsendbrief onder die aandag van alle belanghebbendes, insluitend ouers. |
GETEKEN: L.J. ELY
HOOF: ONDERWYS
DATUM: 2004:11:17
|