1. Die Wes-Kaap Onderwysdepartement (WKOD) is bewus van gevalle waar werknemers vals akademiese kwalifikasies en/of vervalste akademiese sertifikate ingedien het en beskou hierdie oortredings in 'n baie ernstige lig.
2. In haar 2004-begrotingstoespraak het die Minister van Staatsdiens en Administrasie, me GJ Fraser-Moleketi, die Staatsdiens se Antikorrupsiestrategie beklemtoon wat, onder andere, sal fokus op die toepassing van die Wet op die Voorkoming en Bestryding van Korrupte Aktiwiteite (Wet 12/2004), en die verantwoordelikheid om werknemers binne die konteks van die agt beginsels van Batho Pele risiko- en etiekbewus te maak. Uiteraard sluit dit ook leerders, ouers, opvoeders, lede van skoolbestuurspanne en skoolbeheerliggame, en WKOD-beamptes op alle vlakke, in.
3. Ingevolge artikel 51(1)(a)(i) van die Wet op Openbare Finansiële Bestuur (Wet 1/1999), het die WKOD risiko-assesserings onderneem en beleide en planne geïmplementeer om bedrog teen te werk. Dit reflekteer sy oorhoofse benadering tot bedrog en korrupsie en sy voorneme om oneerlikheid, korrupsie en verwante oortredings uit te wis.
4. Artikel 18(1)(aa) van die Wet op die Indiensneming van Opvoeders (Wet 76/1998), en Resolusie 1/2003 van die Staatsdiens Koördinerende Bedingingsraad (SDKBR) noteer die vervalsing van rekords en bedrog as dade van wangedrag. Die WKOD het dus 'n benadering van geen verdraagsaamheid teenoor sodanige wangedrag aanvaar en sal voorsittende beamptes versoek om 'n sanksie van ontslag op te lê as 'n werknemer skuldig bevind word aan die indien van vals akademiese kwalifikasies en/of vervalste akademiese sertifikate.
5. Siftings- en onderhoudskomitees en aanstellingsowerhede word daaraan herinner dat dit hulle verantwoordelikheid is om die akademiese kwalifikasies van aansoekers noukeurig na te gaan en, vernaamlik, hulle te verifieer. Dit behoort die risiko van die aanstelling van mense met vervalste kwalifikasies te verminder en doeltreffendheid, doelmatigheid en professionalisme in die Onderwyssektor en die Staatsdiens te bevorder.
6. Bring asseblief die inhoud van hierdie omsendbrief onder die aandag van alle betrokkenes.


GETEKEN: J.H. HURTER
HOOF: ONDERWYS
DATUM: 2004:10:01