1. In my brief van 7 Desember 2001 (verwysing 13/2/8/17/2/B) is bevoegdheid aan prinsipale van skole wat van amptelike leerdervervoerskemas gebruik maak verleen om addisionele leerders by sodanige skemas in te sluit op voorwaarde dat die addisionele leerders per skema nie die goedgekeurde aantal leerders met meer as 10% oorskry nie.
2. Alhoewel die Wes-Kaap Onderwysdepartement (WKOD) groot waardering het vir die rol wat prinsipale in hierdie verband gespeel het, het `n beperkte begroting vir vervoerskemas die heroorweging van hierdie gedelegeerde bevoegdhede genoodsaak. Versoeke om die insluiting van addisionele leerders sal dus met baie groot omsigtigheid bestuur moet word en daar sal nou binne die konteks van die onderwysplan vir die betrokke kring na alternatiewe vir insluiting gekyk moet word.
3. In die lig van die bogemelde word daar dus vanaf 1 November 2004 tot verdere kennisgewing 'n moratorium geplaas op prinsipale se bevoegdheid om die insluiting van addisionele leerders op 'n amptelike vervoerroete goed te keur. Dit beteken dat addisionele leerders vanaf 1 November 2004 slegs met die goedkeuring van Hoofkantoor op amptelike vervoerskemas ingesluit mag word.
4. Prinsipale word versoek om die volgende prosedure te volg wanneer aansoek om die insluiting van addisionele leerders op 'n bestaande vervoerroete gedoen word:

  • 'n Volledig gemotiveerde aansoek om die insluiting van sodanige leerders moet op die voorgeskrewe wyse via die betrokke Onderwysbestuurs-en-ontwikkelingsentrum (OBOS) aan Hoofkantoor voorgelę word. By ontvangs van die aansoek moet die senior kringbestuurder sy/haar aanbeveling op die aansoek maak en dit dan aan Hoofkantoor vir die aandag van mnr R Biscombe stuur.

  • Indien Hoofkantoor goedkeuring verleen dat leerders op 'n roete bygevoeg of weggelaat word, moet die prinsipaal die name van sodanige leerders in die register (WKOD 062) byvoeg of skrap en onmiddellik die betrokke kontrakteur van `n afskrif van die gewysigde register voorsien. Let daarop dat as Hoofkantoor leerders by 'n roete voeg, betaling vir die addisionele leerders eers met ingang van die eerste dag van die daaropvolgende maand in werking sal tree. Indien leerders egter gedurende die loop van `n maand ophou om van die diens gebruik te maak, sal die kontrakteur steeds tot die einde van die betrokke maand vir daardie leerders vergoed word. Wanneer bykomende leerders dus op `n roete gemagtig word, moet die prinsipaal die magtigingsdatum op die WKOD 062 aandui. Hierdie datum moet in berekening gebring word wanneer die kontrakteur se eisvorm (WKOD 063) as korrek gesertifiseer word.
5. OBOS-direkteure moet toesien dat beamptes wat by hulle sentrums met leerdervervoerskemas gemoeid is, ten volle bewus is dat daar vanaf 1 November 2004 nie vir addisionele leerders betaal mag word nie. Die getal leerders wat op die betaaladviese van 31 Oktober 2004 gereflekteer word, mag dus nie oorskry word nie.
6. U samewerking in hierdie verband sal waardeer word.


GETEKEN: J.H. LYNERS
HOOF: ONDERWYS
DATUM: 2004:09:27