1. Hoofde van onderwysinrigtings en direkteure word versoek om opvoeders te verwittig van die instelling van 'n uittredingsonderhoudinstrument wat gebruik moet word wanneer opvoeders die diens van die Wes-Kaap Onderwysdepartement (WKOD) verlaat. Die doel van hierdie instrument is die versekering van doeltreffende bestuur wat deel is van die omvattende WKOD-bestuursplan.
2. Die uittredingsonderhoudinstrument is daarop toegespits om soveel inligting as moontlik rakende uittredende opvoeders se sienswyses omtrent die werksomstandighede en kultuur van die WKOD te verkry. Op hierdie wyse kan tekortkominge punte aangespreek word en kan daar, waar nodig, voorkomend opgetree word. Aangesien die belange van die opvoeder as eerste prioriteit beskou moet word, sal die inligting wat verkry word as streng vertroulik gehanteer word.
3. Die WKOD stel 'n nuwe vorm, "Opvoeders wat die diens van die WKOD verlaat" bekend vir voltooiing deur die uittredende opvoeder. Sodra die hoof van die inrigting of direkteur deur 'n opvoeder ingelig word dat hy/sy die diens van die Departement gaan verlaat, moet hy/sy die opvoeder versoek om die vorm te voltooi.
4. Die inrigtingshoof moet die kringbestuurder dienooreenkomstig inlig en die kringbestuurder moet 'n onderhoud met die opvoeder voer voór die datum van vertrek. In die geval van kantoorgebaseerde opvoeders sal die betrokke direkteur die onderhoud voer. Die vorm "Uittredingsonderhoudvraelys" moet vir hierdie doel gebruik word. By hierdie onderhoud sal die opvoeder versoek word om te reageer op 'n aantal vrae om die onderhoudvoerder in staat te stel om sy/haar bevindings te boek te stel.
5. Beide vorms moet na voltooiing gestuur word aan die Die Hoof: Onderwys, Privaatsak X9114 Kaapstad, 8000. Vir aandag: Die Direkteur: Personeelbestuur (Opvoeders).
6. Daar moet volledigheidshalwe daarop gewys word dat insoverre dit Staatsdienspersoneel betref, die Wes-Kaapse Provinsiale Administrasie (WKPA) tans besig is om ‘n dwarsleggende beleidsdokument te finaliseer. Die belanghebbende vakbonde moet egter eers geraadpleeg word voordat ‘n soortgelyke stelsel vir Staatsdienspersoneel geïmplimenteer kan word.
7. Bring asseblief die inhoud van hierdie omsendbrief onder die aandag van alle opvoeders.


GETEKEN: G.J. ELLIOTT
HOOF: ONDERWYS
DATUM: 2004:07:12

Opvoeders wat die diens van die WKOD verlaat  (grootte: 14 KB)
Uittredingsonderhoudvraelys  (grootte: 23 KB)