1. Die Departement van Onderwys sal, in samewerking met die provinsiale onderwysdepartemente, vanaf 1 tot 21 September 2004 'n sistemiese evaluering in graad 6 onderneem. Hierdie ondersoek, wat deel vorm van die breër sistemiese evalueringsprogram, volg op die graad 3-ondersoek wat in September 2001 en 2002 plaasgevind het, en sal gevolg word deur 'n ondersoek in graad 9 in 2006.
2. Die hoofdoel van sistemiese evaluering is om prestasie te standaardiseer en om vas te stel watter vordering gemaak is t.o.v. die bereiking van die onderwysstelsel se doelwitte van transformasie wat toeganklikheid, redres, gelykheid en gehalte betref. Dit strewe ook daarna om vas te stel in watter konteks leer en onderrig plaasvind, om faktore te identifiseer wat leerderprestasie beïnvloed en om op gepaste onderwysintervensies te besluit.
3. Daar sal van die leerders verwag word om leerderprestasietake in die volgende areas te voltooi:

  • Taal, Geletterdheid en Kommunikasie (TGK)

  • Wiskundige Geletterdheid, Wiskunde en Wiskundige Wetenskappe (WGWWW)

  • Natuurwetenskappe (NW)

Kontekstuele vraelyste sal deur leerders, ouers, opvoeders, prinsipale en OBOS-amptenare ingevul word.
4. Voorbereidings word tans getref en die betrokke skole sal teen Junie 2004 van hulle keuring verwittig word. Die Gehalteversekeringsafdeling te Hoofkantoor sal instruksies oor die administrasie van take aan skole verskaf.
5. Bring asseblief die inhoud van hierdie omsendbrief onder die aandag van alle betrokkenes.
6. Enige navrae rakende die inhoud van hierdie omsendbrief moet gerig word aan me K Bydell by telefoon 021 467 2571 of stuur 'n e-pos aan K. Bydell by qualass@pgwc.gov.za.


GETEKEN: R.B. SWARTZ
HOOF: ONDERWYS
DATUM: 2004:04:21