1. Verwys asseblief na Omsendbrief 0017/2004.
2. Tot onlangs was die enigste eksterne assessering van leerdervordering op die graad 12-vlak. In 2002 en 2003 het graad 3- en 6-leerders egter lees- en wiskundetoetse afgelê wat deur die WKOD onderneem is. Hierdie toetse het belangrike data rakende die sterk en swak punte van lees- en wiskundeprogramme aan onderwysers, skole en die WKOD verskaf en het bygedra tot die bepaling van die ondersteuning wat aan skole en onderwysers gebied word.
3. Die uitslae van die graad 3- en 6-toetsing, asook die uitvalkoerse in sekondêre skole en die kommer van onderwysers en ouers oor die lees- en syferkundige vlakke van graad 8-leerders, het aanleiding gegee tot ondersoeke na die moontlikheid van die assessering van graad 8-leerders. Ons ondersoeke het getoon dat alle leerders in gewone openbare en onafhanklike skole geassesseer behoort te word sodat hulle, hulle ouers en onderwysers 'n aanduiding kan kry van hulle sterk en swak punte in lees en wiskunde. Hierdie inligting is van besondere belang wanneer leerders die Verdere-onderwys-en-opleidingsband (VOO-band) nader en daar van hulle verwag word om kursusse en vakke en gevolglik beroepsrigtings te kies.
4. Vanuit die perspektief van die WKOD is dit belangrik dat leerders blootgestel word aan assesseringstake wat deskundig opgestel is en 'n aanduiding gee van die lees- en wiskundevlak van leerders in vergelyking met internasionale standaarde. Daarbenewens behoort sodanige toetse 'n ontleding van leerders se sterk en swak punte in 'n vaardigheidsgebaseerde toets te voorsien.
5. Die Toetssentrum by die Universiteit van Nieu-Suid-Wallis in Australië neem jaarliks in 13 lande toetse af by meer as 6 miljoen leerders in verskillende grade. Elke leerder wat hierdie toetse skryf, ontvang 'n uitvoerige verslag van sy/haar uitslae asook 'n sertifikaat van deelname. Skole ontvang ook uitvoerige verslae van leerders se uitslae.
6. Die toetse wat deur die Universiteit van Nieu-Suid-Wallis vir taal en wiskunde ontwikkel is, sal op Woensdag 19 Mei en Dinsdag 27 Julie 2004 onderskeidelik afgeneem word by alle graad 8-leerders in gewone openbare en onafhanklike skole in die Wes-Kaap.
7. Die toetse sal in die week voor die toetse afgeneem moet word, per koerier aan skole versend word. Spesiaal ontwerpte antwoordblaaie sal ook voorsien word.
8. Klasonderwysers sal vanaf 9:00 to 9:45 die voorbereiding vir die toetse waarneem, en moet ook die toetse administreer. Die toetse sal vanaf 9:45 tot 11:00 afgeneem word. Voltooide antwoordblaaie sal voor 21 Mei en 29 Julie 2004 onderskeidelik deur die WKOD afgehaal word.
9. Die uitslae van die toetse, wat in Australië nagesien sal word, sal met die uiterste vertroulikheid gehanteer word. Verseker asseblief vir leerders wat die toetse skryf dat die uitslae nie aan enigiemand behalwe die skool en individuele leerders beskikbaar gestel sal word nie. 'n Skool se gemiddelde uitslae sal ook as vertroulik gehanteer word.
10. Verdere besonderhede rakende die administrasie van hierdie toetse sal voorsien word in 'n minuut wat u binnekort sal bereik.
11. Bring asseblief bogenoemde inligting onder die aandag van alle graad 8-onderwysers en -leerders.


GETEKEN: P.A. VINJEVOLD
HOOF: ONDERWYS
DATUM: 2004:04:28