1. 'n Dokument, Die Wes-Kaap Onderwysdepartement se beleid en protokol oor veiligheid in skoolwetenskap, is aangeheg. Kommentaar wat van die publiek ontvang is, is ook in ag geneem toe hierdie beleid en protokol opgestel is.
2. Die dokument sit die beginsels, reëls en formele stappe in die Wes-Kaap Onderwysdepartement (WKOD) se beleid en implementeringsplan uiteen om te verseker dat Wetenskap veilig in sy inrigtings aangebied word en dat die chemikalieë in voorraad gebruik word uitsluitlik vir eksperimente soos voorgeskryf in die onderskeie hersiene nasionale kurrikulumverklarings. Dit verskaf ook 'n lys van verbintenisse wat deur die WKOD aangegaan is en voorwaardes waaraan skole moet voldoen.
3. Al die betrokke inrigtings word versoek om te verseker dat hulle gereed sal wees vir die implementering van hierdie beleid en protokol op 1 Januarie 2005 deur

  • die betrokke veiligheidsbeamptes aan te stel

  • die personeel verantwoordelik vir hierdie funksie in te lig en op te lei

  • die nodige voorbereidings te tref sodat hulle laboratoriums as veilige sones verklaar kan word.
4. 'n Handleiding vir veiligheid in skoolwetenskap wat die implementering van die beleid sal vergemaklik, sal in die loop van die jaar aan al hierdie inrigtings voorsien word.
5. Hierdie dokument is (ook) beskikbaar op die Kurrikulumontwikkeling Webtuiste by http://curriculum.wcape.school.za/site/52/page/view/. Navrae kan gerig word aan die direkteur of die hoofkurrikulumadviseur by u OBOS.
6. Hoofde van inrigtings word versoek om die inhoud van hierdie omsendbrief onder die aandag van alle opvoeders, ouers/voogde en leerders te bring.


GETEKEN: P.A. VINJEVOLD
HOOF: ONDERWYS
DATUM: 2004:04:10

Beleid en Protokol oor Veiligheid in Skoolwetenskap  (grootte: 85 KB)