1. Die Wes-Kaap Onderwysdepartement (WKOD) se naspeuring van leerderinskrywing dui daarop dat baie leerders die skool verlaat voordat hulle die graad 12 Senior Sertifikaat behaal. Verskeie studies, asook skoolhoofde se ondervinding, skryf dit hoofsaaklik daaraan toe dat baie leerders nie by toepaslike programme ingeskryf word nie. Die WKOD het na aanleiding hiervan 'n belangrike veldtog geloods om loopbaan-verwante voorligting aan leerders in graad 9 te voorsien. As deel van hierdie program, sal die WKOD alle graad 8-leerders in Taal (Afrikaans of Engels) en Wiskunde assesseer. Hierdie toetse (in samewerking met die PACE-loopbaanprogram wat tans geïmplementeer word) is bedoel om leerders te help om geskikte loopbaankeuses te maak. Daarbenewens sal hulle gebruik word om areas te identifiseer waar addisionele ondersteuning aan skole nodig mag wees en om ons standaarde teen internasionale standaarde te meet.
2. Die toetse sal soos volg deur alle graad 8-leerders in WKOD openbare skole geskryf word:
2.1 Taaltoets: 19 Mei 2004 van 09:00 tot 10:00
2.2 Wiskundetoets: 27 Julie 2004 van 09:00 tot 10:00
3. Hierdie toetse moet onder formele eksamentoestande geskryf word, en die reëls betreffende die skryf van die Senior Sertifikaat-eksamen moet toegepas word.
4. Die vraestelle sal voor elke eksamen by skole afgelewer word, en die antwoordblaaie sal daarna afgehaal word en deur die ontwikkelaars van die toetse nagesien word. Dit beteken dat daar nie van onderwysers verwag sal word om hulle leerders se antwoorde na te sien nie. Die uitslae van die toetse, saam met gedetailleerde individuele en skool-analises daarvan, sal teen die einde van die jaar aan die betrokke skole gestuur word.
5. Let asseblief daarop dat die toetse nie deel uitmaak van die vorderingspunt vir graad 8-leerders nie, en dat daar ook nie van leerders verwag word om spesifieke inhoud vir die toetse te leer nie, aangesien vaardighede en begrippe op 'n vlak toepaslik vir graad 8 getoets word.
6. Volledige inligting oor die afneem van die toetse sal die vraestelle vergesel. Skoolhoofde word versoek om te verseker dat die toetse op die aangewese datums en tye geskryf word, en om, waar nodig, hulle programme dienooreenkomstig aan te pas.


GETEKEN: P.A. VINJEVOLD
HOOF: ONDERWYS
DATUM: 2004:03:15