| 1.1 |
|
Nuwe personeelvoorsieningstoewysings rakende Staatsdienspersoneel, gebaseer op gelykberegtiging, is met ingang van 1 Oktober 2002 vir die ondergemelde inrigtings in werking gestel. Die nuwe personeeldiensstate is gedurende die eerste week van Oktober 2002 aan alle relevante inrigtings uitgereik en word nou ingevolge Resolusie 7/2002 bestuur. |
| 1.2 |
|
Op 13 Junie 2002 het die Staatsdienskoördinerendebedingingsraad (SDKBR) ‘n raamwerkooreenkoms vir die transformasie en herstrukturering van die Staatsdiens (Resolusie 7/2002) aanvaar. Die prosesse vir die toekenning en vulling van alle befondse vakante poste op die nuwe en huidige goedgekeurde personeeldiensstate van die WKOD is in Omsendbrief 0116/2002 onder die aandag van alle belanghebbendes gebring. |
| 2. |
KOSHUISE VERBONDE AAN GEWONE OPENBARE SKOLE |
| 2.1 |
|
Die toekenning van Staatsdienspersoneel aan koshuise verbonde aan gewone openbare skole is gebaseer op die aantal koshuisinwoners soos ingeskryf op 1 April 2001. Koshuise met inskrywings van 1-49 voltydse leerders sal ‘n jaarlikse subsidie van R3 500 per inwonende leerder ontvang om spesifiek dienste van personeel in te koop aangesien geen departementele poste aan hierdie inrigtings toegeken word nie. Hierdie subsidie sal as ‘n oordragbetaling aan koshuise gehanteer word en sal by ‘n latere stadium ingefaseer word. Meer inligting oor die infasering van oordragbetalings sal in ‘n later stadium voorsien word. |
| 2.2 |
|
Voltydse poste is toegeken aan koshuise met inskrywings van meer as 49 inwonende leerders. |
| 3. |
KOSHUISE VERBONDE AAN OLSO-SKOLE
Leerders by OLSO-skole benodig deurlopend spesiale sorg en versorging. ‘n Ratio- toekenning per kategorie van OLSO-skool is ten opsigte van Staatsdienspersoneel gemaak, spesifiek vir versorgingdienste addisioneel tot die personeelvoorsiening (spyseniering en skoonmaakdienste) wat vir koshuise by gewone en openbare skole geld. Staatsdienspersoneel word toegeken vanaf een inwonende leerder.
|
| 4.1 |
|
Die poste wat toegeken is aan landbouskole is gebaseer op elke skool se besondere boerderybedrywighede en -behoeftes. Die boerderybedrywighede van die drie landbouskole van die WKOD verskil tot so ‘n mate dat dit nie moontlik was om eenvormige personeelvoorsieningsnorme te ontwikkel wat in die unieke omstandighede van elke landbouskool sou kon voorsien nie.
|
| 4.2 |
|
Die personeeldiensstate van landbouskole maak voorsiening vir ‘n 365-dag per jaar diens deur Staatsdienspersoneel. |
| 5.1 |
|
Die personeelvoorsiening van Staatsdienspersoneel vir koshuise verbonde aan tegniese kolleges is dieselfde as dié vir koshuise by gewone openbare skole.
|
| 5.2 |
|
Ten einde bestuurselfstandigheid te bevorder, is 'n oordragbetaling vir ondersteuningspersoneel goedgekeur. Nieteenstaande die voorafgaande en die aantal botallige personeel binne die WKOD sal die postekapasiteit op die goedgekeurde personeeldiensstaat van tegniese kolleges benut word vir die herontplooiing van hierdie botallige werknemers. Oordragbetalings sal dus in ‘n later stadium ingefaseer word. |
| 5.3 |
|
Die diensstate van die “geamalgameerde tegniese kolleges” (nuwe VOOI’s) sal hersien word sodra hierdie inrigtings ten volle gevestig is. In die tussentyd word die personeelvoorsiening van ‘n geamalgameerde kollege op ‘n globale diensstaat van die relevante individuele tegniese kolleges gebaseer. |
| 6. |
JEUGSORG- EN OPVOEDINGSENTRUMS, OLSO- EN VAARDIGHEIDSKOLE
'n Nuwe model vir die voorkoming en hantering van gedragsprobleme onder jeugdiges en die opvoeding van sodanige jeugdiges is in werking gestel. Die volgende tipe sentrums/skole, elk met sy eie spesifieke fokusarea, kliënte en unieke personeeldiensstaat, is gestig:
2 x Spesiale Jeugsorg- en Onderwyssentums
4 x Jeugsorg- en Onderwyssentrums
4 x Vaardigheidskole
1 x Skool vir leerders met Spesiale Onderwysbehoeftes (OLSO-skool)
|
| 7. |
DIE IMPLEMENTERING VAN RESOLUSIE 7/2002 (TRANSFORMASIE EN HERSTRUKTURERING VAN DIE STAATSDIENS) |
| 7.1 |
|
Die raamwerkooreenkoms maak vir die volgende voorsiening: |
| 7.1.1 |
|
Die herontplooiing en heropleiding van personeel. |
| 7.1.2 |
|
Ondersteuning vir alternatiewe indiensneming buite die Staatsdiens. |
| 7.1.3 |
|
Die advertering van vakatures in ‘n geslote vakaturelys binne die WKOD. (Aanstelling in hierdie vakatures sal beperk word tot dienende botallige personeel binne die WKOD). |
| 7.1.4 |
|
Die voorafverkreë goedkeuring van die Interdepartementele Taakspan (IDTS) voordat ‘n pos in ‘n ope vakaturelys geadverteer mag word. |
| 7.1.5 |
|
Die opsie van vervroegde uitdienstrede vir botallige personeel wat 55 jaar en ouer is en ten minste tien jaar pensioengewende diens voltooi het, sonder die afskaling van pensioenvoordele. |
| 7.1.6 |
|
‘n Skeidingspakket vir botallige personeel op aanvraag (inligting hieroor sal binnekort beskikbaar gestel word). |
| 7.1.7 |
|
‘n Skeidingspakket aan botallige personeel wat nie herontplooi kan word nie. |
| 7.2 |
|
Ingevolge Resolusie 7/2002 het die WKOD ook ‘n Departementele Taakspan (DTS), wat bestaan uit ‘n gelyke verteenwoordiging van werkgewer- (WKOD) en werknemerverteenwoordigers (Staasdiensunies), daargestel. ‘n Interdepartementele Taakspan (IDTS) is ook binne die Wes-Kaapprovinsie geskep om ‘n koördinerings- en oorsigfunksie ten opsigte van die verskillende DTS’e te verrig. |
| 7.3 |
|
Die toegekende begroting vir personeeluitgawes maak dit vir die WKOD onmoontlik om botallige personeel addisioneel tot sy goedgekeurde diensstaat te dra en terselfdertyd alle vakante poste te vul. Die vulling van vakante poste hang eerstens af van die suksesvolle absorpsie van botallige personeel in geskikte vakante poste by inrigtings waar sodanige vakatures bestaan en/of elders op goedgekeurde diensstate van die WKOD en/of binne die PAWK. Ervaring het geleer dat hierdie taak, wat afhang van sulke veranderlikes soos die persoonlike omstandighede van individuele personeellede en die fisiese fasiliteite van die individuele inrigtings, nie maklik is nie. Resolusie 7/2002 verskaf die raamwerk waarbinne, onder andere, die absorpsie (plasing) en herontplooiing van botalliges gehanteer moet word. |
| 7.4 |
|
Die implementering van die nuwe personeeldiensstate vir die betrokke inrigtings/skole het tot gevolg dat die aantal poste in ‘n spesifieke beroepsklas verminder, vermeerder of onveranderd gebly het of in ‘n spesifieke beroepsklas nuutgeskep of totaal afgeskaf is. Die LIEU-beginsel (Laaste in, Eerste uit) is toegepas om personeel per inrigting, per beroepsklas (in daardie gevalle waar daar ‘n afname in die aantal poste in ‘n spesifieke beroepsklas by ‘n inrigting/skool was) botallig te verklaar. |
| 7.5 |
|
Alle botallige personeellede sal binnekort briewe waarin hulle status as botallig bevestig word, via die hoof van die inrigting/skool ontvang. Terselfdertyd sal hulle 'n pro forma-CV ontvang wat voltooi en teen 31 Januarie 2003 by die Direktoraat: Personeelbestuur (Staatsdienspersoneel) ingedien moet word. 'n Spesiale beroep word op prinsipale gedoen om personeellede, waar nodig, met die voltooiing van die CV's te help en te verseker dat die vorms betyds ingedien word. Hierdie CV-vorm maak voorsiening vir persoonlike besonderhede, kwalifikasies, vaardighede en ervaring. Ten einde hulle geskikte absorbering te fasiliteer, sal die besonderhede van alle botallige personeellede op die Wes-Kaap Provinsiale Herontplooiingsdatabasis en ook op die Sentrale Herontplooiingsdatabasis van die Departement van Staatsdiens en Administrasie (DPSA) ingevoer word. |
| 7.6 |
|
Alhoewel die WKOD alles in sy vermoë sal doen om botallige personeel op gepaste wyse in poste binne die beperkings van sy goedgekeurde diensstaat of elders binne die breër PAWK te plaas, bly dit steeds die primêre verantwoordelikheid van botallige personeel om aansoek te doen om gepaste vakante poste wat in die geslote vakaturelys van die WKOD sal verskyn. Botallige personeel moet ook aangemoedig word om aansoek te doen om poste wat van tyd tot tyd in die PAWK of breër Staatsdiens geadverteer word. Alle botallige personeel is verplig om aan die absorpsie-/herontplooiingsproses deel te neem en werknemers wat onredelik weier om herontplooi te word, word geag te bedank het, en sal nie geregtig wees op enige skeidingsvoordele nie. Resolusie 7/2002 vereis ook dat alle botallige personeel aktief moet deelneem aan die herontplooiingsproses om ‘n scenario te vermy waar hulle geag word uit die Staatsdiens te bedank het. |
| 8. |
GEWONE OPENBARE EN OLSO-SKOLE
Die personeeldiensstate wat met ingang van 1 September 2000 (Eerste Fase) aan gewone openbare en OLSO-skole voorsien is, bly van krag. Werknemers wat gedurende hierdie fase botallig verklaar is en nog nie op gepaste wyse in vakatures opgeneem is nie, behou hulle botallige status. Briewe om die botallige eerstefasebeamptes van hul onveranderde status in kennis te stel is reeds uitgestuur as deel van die huidige proses. Let asseblief daarop dat botallige personeel by gewone openbare en OLSO-skole nou ook ingevolge Resolusie 7/2002 gehanteer sal word. Hulle moet dus ook aangemoedig word om aktief aan die nuwe herontplooiingsoefening deel te neem, om sodoende ‘n scenario waar hulle as geag sonder skeidingsvoordele te bedank het, te vermy. Verder moet hulle ook aangemoedig en ondersteun word in hul aansoeke om geskikte geadverteerde poste. |
| 9. |
DIENSTE WAT UITGEFASEER IS
Sekuriteits- en Maatskaplike Hulpdienste wat uitgefaseer is, het veroorsaak dat beamptes in daardie beroepsklasse botallig verklaar is. Die werknemers wat botallig verklaar is en nog nie op gepaste wyse in vakatures opgeneem is nie, behou hul botallige status. Briewe om hulle van hulle onveranderde status in kennis te stel is reeds uitgestuur as deel van die huidige proses. Let asseblief daarop dat botallige sekuriteits- en maatskaplike hulpwerkers ook ingevolge Resolusie 7/2002 gehanteer sal word. Hulle moet dus ook aangemoedig word om aktief aan die nuwe herontplooiingsoefening deel te neem, om sodoende ‘n scenario waar hulle as geag sonder skeidingsvoordele te bedank het, te vermy. Verder moet hulle ook aangemoedig en ondersteun word in hul aansoeke om geskikte geadverteerde poste. |
| 10. |
ONDERSTEUNING AAN BOTALLIGE PERSONEEL |
| 10.1 |
|
Dit is ‘n traumatiese ondervinding om as botallig in die werkplek verklaar te word. Hoofde van inrigtings, skole en komponente by OBOS’e en Hoofkantoor word dus herinner aan hul plig as bestuurders om emosionele en administratiewe ondersteuning aan botallige werknemers te verleen. Die eerste plek waar emosionele en administratiewe bystand verleen moet word, bly die komponent, skool of inrigting waar die betrokke werknemer in diens is. Aangesien baie botalliges nie goed geletterd is nie, is dit die plig van bestuurders om hulle te ondersteun om die komplekse prosesse te begryp en ook om hulle individuele gevalle te bevorder. |
| 10.2 |
|
Botallige personeel wat professionele sielkundige ondersteuning en berading as gevolg van die uitwerking van hulle botalligverklaring benodig, moet aangemoedig word om hul naaste OBOS, waar professioneel-opgeleide personeel vir hierdie doel beskikbaar is, te nader. |
| 11. |
DEELTYDSE WERKNEMERS (5/8- EN 6/8-AANSTELLINGS)
Die goedgekeurde diensstaat van die WKOD maak nie meer voorsiening vir deeltydse poste nie, daarom word botallige deeltydse werknemers aangemoedig om aansoek te doen om geadverteerde voltydse poste/vakatures om hulle absorpsie/aanstelling op ‘n permanente basis te fasiliteer. Hulle moet ook aktief deelneem aan die herontplooiingsproses ingevolge Resolusie 7/2002, ten einde ‘n moontlike scenario om as te bedank het beskou te word, te vermy.
|
| 12.1 |
|
As gevolg van finansiële beperkings, vererger deur die volgehoue abnormale hoë aantal kontrakaanstellings, sal kontrakaanstellings in vakante poste, ingeslote nuwe vakatures na aanleiding van die implementering van die nuwe personeeldiensstate, slegs op meriete oorweeg word. Hoofde van inrigtings/skole sal volledige motiverings moet verskaf vir kontrakaanstellings, aangesien fondse vir die doel beperk is. Die herontplooiing van botallige personeel in poste wat tans deur vastetermynkontrakwerkers gevul word, sal fondse hiervoor beskikbaar stel. |
| 12.2 |
|
Die kontrakte van die meeste vastetermynkontrakwerkers het op 31 Desember 2002 verstryk. Die vulling van vakatures deur kontrakaanstellings na hierdie datum om ‘n volgehoue dienslewering te verseker, sal oorweeg word. Hoofde van inrigtings/skole sal vir dié doel ‘n versoek met ‘n volledige motivering moet indien. Dit moet egter beklemtoon word dat elke aansoek op meriete oorweeg sal word. |
| 12.3 |
|
Alle huidige vastetermynkontrakwerkers is uitgesluit van die herontplooiings-/ absorpsie-oefening soos in Resolusie 7/2002 vervat en mag, hoofsaaklik vanweë die streng finansiële beperkings en die feit dat daar meer permanente botallige personeel as vakante poste is, nie aansoek doen om of aangestel word in poste wat in die geslote vakaturelys geadverteer word nie. |
| 12.4 |
|
Aangesien daar meer vakante poste van administrasieklerk as botallige administrasieklerke is, sal die poste waar daar kontrakwerkers is nie geadverteer word nie, tensy die inrigting dit spesifiek versoek. Volledige motivering vir die advertering van die poste sal vereis word. Dit sal ‘n ononderbroke dienslewering bevorder. Die benadering sal ongelukkig nie met die ander kategorieë poste gevolg kan word nie, aangesien die botallige personeel die aantal beskikbare vakatures oorskry. |
| 13. |
VOORMALIGE STAATSDIENSWERKNEMERS IN DIENS VAN SKOOLBEHEER-LIGGAME
Die finansiële implikasies om skoolbeheerliggaamwerknemers ingevolge Resolusie 7/2002 te hanteer is van so ‘n omvattende aard dat die WKOD nie in hierdie stadium in ‘n posisie is om hierdie personeel binne sy bestaande diensstaatstrukture op te neem nie.
|
| 14. |
HERONTPLOOIING VAN BOTALLIGE PERSONEEL |
| 14.1 |
|
Horisontale absorpsie verwys na die herontplooiing van werknemers in gelyke poste en op dieselfde salarisvlak as die botallige werknemer. Die profiel van botallige personeel moet pas in die pos waarin so ‘n werknemer geabsorbeer/herontplooi sal word. Korttermynheropleiding sal voorsien word om die plasing van botalliges in geskikte beskikbare ekwivalente vakatures te fasiliteer. |
| 14.2 |
|
Herontplooiing/absorpsie in poste met ‘n laer gradering as hulle eie sal oorweeg word indien sodanige aansoekers skriftelik instem tot 'n verlaging in status en salaris verbonde aan so ‘n pos. |
| 14.3 |
|
Herontplooiing in hoër poste is nie toelaatbaar nie, aangesien dit op ‘n bevordering neerkom. ‘n Botallige werknemer wat in ‘n hoër pos herontplooi wil word, sal moet aansoek doen om so ‘n geadverteerde pos en sal dan onderworpe wees aan ope kompetisie met ander kandidate wat aansoek doen om die pos. Geen botallige werknemer wat aansoek doen om enige pos, ongeag van sy of haar rang, salarisvlak of enige ander veranderlike, het enige waarborg dat hy of sy in so ‘n pos herontplooi sal word nie. Dit beteken dat die botalligheid van ‘n beampte ook nie in oorweging geneem word wanneer hy of sy aansoek doen om bevorderingsposte nie. |
| 15. |
ADVERTERING VAN VAKANTE POSTE |
| 15.1 |
|
Prosedureriglyne vir aansoekers en beheerliggame sal verskaf word in die geslote vakaturelys (per beroepsklas) vir Staatsdienspersoneel wat in die eerste kwartaal van 2003 uitgereik sal word. Die WKOD is van voorneme om teen 1 April 2003 die maksimum aantal botallige werknemers op gepaste wyse te plaas. Die omvang van die transformasie- en herstruktureringsproses sal dit nie moontlik maak om deur die uitreiking van een vakaturelys alle botallige werknemers gepas te plaas nie. Die WKOD sal derhalwe probeer om ‘n tweede vakaturelys vroeg in 2003 te publiseer indien die breër transformasie- en herstruktureringsproses binne die Staatsdiens, onder die beheer van DPSA, dit toelaat. |
| 15.2 |
|
Let asseblief daarop dat alle poste met die minimum vereistes soos per die “Code of Remuneration (CORE)” geadverteer sal word. |
| 16.1 |
|
Gedurende die eerste fase van die herstrukturering van diensstate van inrigtings het die meeste WKOD-inrigtings uitstekende ondersteuning verskaf met die herontplooiing van botallige personeel. Die WKOD het groot waardering daarvoor en wil graag sy dank uitspreek vir die spanpoging en die gees waarin die sensitiewe en komplekse aangeleentheid gehanteer is, en veral vir die rol van skoolbeheerliggame in die proses. |
| 16.2 |
|
Die tweede fase van die herontplooiings-/absorpsieproses sal ‘n groter uitdaging wees omdat daar maatreëls is waarvolgens botallige personeel uit diens gestel kan word. Die WKOD versoek derhalwe weereens alle rolspelers om te help met die absorpsie/herontplooiing van soveel as moontlik, indien nie almal nie, van die botallige werknemers gedurende hierdie moeilike tyd in hulle loopbane. U samewerking sal ‘n bepalende faktor in die sukses van hierdie proses wees. |
| 16.3 |
|
Enige navrae kan gerig word aan die volgende herontplooiingsbeamptes:
Mnr PW Willemse 021 467 2729
Mnr JJ Olivier 021 467 2470
|
| 16.4 |
|
U word versoek om onmiddellik die inhoud van hierdie omsendbrief onder die aandag van alle Staatsdienspersoneel onder u beheer, ingesluit personeel wat met verlof of om enige ander rede afwesig is, te bring. |
GETEKEN: J.H. HURTER
HOOF: ONDERWYS
DATUM: 2003:01:17
|