1. Sekere artikels van die Suid-Afrikaanse Skolewet, 1996 (Wet 84/1996), en ander wette word ingevolge bogenoemde Wysigingswet gewysig. Dit beteken dat provinsiale wetgewing en regulasies dienooreenkomstig aangepas moet word. Die gewysigde wetgewing en beleid sal mettertyd aan u voorsien word.
2. U aandag word spesifiek gevestig op die bepalings van artikels 5 en 15 van die voormelde Wysigingswet, waarvan uittreksels voorsien word. Ingevolge hierdie artikels is ‘n verbod geplaas op inisiasiepraktyke by onderwysinrigtings en moet leerders se aandag pertinent gevestig word op die gevolge wat deelname aan of die bedryf van inisiasiepraktyke inhou. In hierdie verband word u versoek om te let op die bepalings van Omsendbrief 164/2001 van 19 Desember 2001.
3. Hoofde en beheerliggame word versoek om ingevolge die “Regulasies betreffende ernstige wangedrag van leerders by skole” op te tree teen leerders wat deelneem aan inisiasiepraktyke, en opvoeders wat deelneem aan of toelaat dat sodanige praktyke voortgaan, moet ingevolge die Wet op die Indiensneming van Opvoeders, 1998 (Wet 76/1998) soos gewysig, gedissiplineer word.
4. Die bepalings laat ‘n leerder wat ‘n slagoffer is van inisiasiepraktyke toe om ‘n siviele eis in te stel teen ‘n persoon of groep persone wat hom of haar gedwing het om deel te hê aan sodanige praktyke.
5. Inisiasiepraktyke word gedefinieer as enige handeling wat

  1. die geestelike of liggaamlike welsyn of veiligheid van ‘n persoon in gevaar stel.

  2. die intrinsieke waarde van mense ondermyn deur sommige persone as minderwaardig aan ander te behandel.

  3. individue onderwerp aan vernederende of geweldadige optredes wat die grondwetlike waarborg van waardigheid in die Handves van Menseregte ondermyn.

  4. die fundamentele regte en waardes wat deur die Grondwet onderskryf word, ondermyn.

  5. die ontwikkeling van ‘n ware demokratiese kultuur wat aan elke individu die reg gee om met respek en deernis behandel te word, belemmer.

  6. publieke of private eiendom beskadig of vernietig.
6. Samevattend, inisiëringspraktyke word verbied en deelname aan sodanige oefeninge deur leerders en/of opvoeders sal dissiplinêre optrede teen so ‘n leerder of opvoeder tot gevolg hê. Daarbenewens sal enige leerder wat onderwerp word aan inisiëring ‘n siviele eis kan instel teen die persoon of groep persone wat die inisiëringspraktyke afgedwing het.
7. Bring asseblief die inhoud van hierdie omsendbrief onder die aandag van alle personeel en beheerliggaamlede.

GETEKEN: J.H. LYNERS
HOOF: ONDERWYS
DATUM: 2003:01:16