1. INLEIDING

Die implementering van die HNKV (wat Kurrikulum 2005 versterk) is die volgende stap in die transformasieproses van die onderwys in Suid-Afrika. Skole moet behoorlik voorbereid wees om hierdie stap te doen om samehangende implementering van die hoogste gehalte te verseker.

2. BESTUUR VAN VERANDERING

Daar is met groot waardering kennis geneem van die entoesiasme van skole om so spoedig moontlik met die implementering van die HNKV te begin. Dit is egter duidelik dat skole in verskillende stadiums van gereedheid hiervoor verkeer. Die implementering van die HNKV vereis versigtige beplanning, voorbereiding en monitering op alle vlakke. Dit is van die uiterste belang dat hoofde ‘n leidende rol speel as kurrikulumbestuurders in die HNKV-implementeringsproses. Die ingeslote brosjure kan vir die prinsipaal en sy of haar skoolbestuurspan (SBS) van waarde wees in hierdie verband.

Terwyl daar voorbereidings getref word vir die implementering van die HNKV is dit belangrik om terselfdertyd te verseker dat daar by die huidige beleid gehou word en dat daar teenoor die Spesifieke Uitkomste opgeteken en gerapporteer word tot tyd en wyl die amptelike oorskakeling na Leeruitkomste op nasionale vlak plaasvind.

Die HNKV as 'n bron

Die oorspronklike Nasionale Kurrikulumverklaring het bekend gestaan as Kurrikulum 2005 (K2005) en was die beginpunt vir die ontwikkeling van die Hersiene Nasionale Kurrikulumverklaring.

In die HNKV is die groot aantal K2005 Spesifieke Uitkomste in elke leerarea saamgegroepeer in 'n kleiner aantal Leeruitkomste. Die Assesseringstandaarde is ontwerp om meer besonderhede te verskaf aangaande die konsepte, vaardighede, kennis en persoonlike eienskappe wat bekom moet word. Die HNKV kan dus onmiddellik gebruik word as ‘n bron vir beplanning.

3. HNKV-DOKUMENTE
3.1 Alle skole moes reeds ‘n promosiestel van die HNKV ontvang het. Hierdie stel is in ‘n komplimentêre houer verpak en bestaan uit die Engelse weergawe van die 8 Leerareas en die Oorsigdokument.
3.2 Skole wat Afrikaans as die onderrigtaal (TLO) of as Addisionele Taal aanbied, moes reeds 'n promosiestel van die Taalleerarea-dokumente in Afrikaans ontvang het.
3.3 Skole wat Xhosa as TLO of Addisionele Taal aanbied, moes reeds die promosiestel van die Taalleerarea-dokumente in Xhosa ontvang het.
3.4 Skole wat nog nie enige of sommige van die relevante dokumente ontvang het nie, word vriendelik versoek om hulle Onderwysbestuurs-en-ontwikkelingsentrum (OBOS) se Hoofkurrikulumadviseur skriftelik daarvan in kennis te stel binne 5 dae na ontvangs van hierdie omsendbrief.
3.5 Skole sal stelle werkdokumente van die HNKV van die nasionale Departement van Onderwys ontvang vir verspreiding aan elke opvoeder (een stel per opvoeder). Alhoewel hierdie werkdokumente deur die opvoeder gebruik word, bly dit die eiendom van die Wes-Kaapse Onderwysdepartement (WKOD). Sou ‘n opvoeder oorgeplaas word na ‘n ander skool, moet hy/sy die werkdokumente saamneem. Indien die opvoeder haar/sy termyn as ‘n werknemer van WKOD staak, moet sy/hy die werkdokumente aan die hoof van die laaste skool waar sy/hy gewerk het, oorhandig. Die werkdokumente is slegs in Engels beskikbaar.
3.6 Leerprogrambeleidsriglyne/Onderwysershandleidings sal ook in die loop van die jaar deur die nasionale Onderwysdepartement aan skole gestuur word.

4. MAATREëLS VAN DIE WES-KAAP ONDERWYSDEPARTEMENT (WKOD) TER ONDERSTEUNING VAN DIE IMPLEMENTERING VAN DIE HNKV
4.1 Algemene strategie vir die AOO-band (2003 - 2008)

Die volgende aktiwiteite is beplan om die nasionale implementeringsproses te bevorder en waarde daaraan toe te voeg:

  • Plakkate met inligting oor die HNKV sal aan skole versend word, beginnende by primêre skole.

  • Die WKOD sal voorspraak maak vir die HNKV om by ouers en ander rolspelers ‘n begrip van en entoesiasme vir die HNKV te skep.

  • Die WKOD-Kurrikulumwebbladsye sal inligting bied en voorbereiding vir die implementering van die HNKV ondersteun, en bronnepakkette en databasisse bevat.

  • Beleidsoriënteringsessies sal gehou word.

  • Werkswinkels sal vir prinsipale, skoolkurrikulumkoördineerders en fasehoofde gehou word.

  • Werkswinkels sal vir opvoeders gehou word.

  • Kursusse sal by die Kaapse Onderwysinstituut aangebied word.

  • Gevorderde Onderwyssertifikaat- (GOS-) kursusse sal aangebied word.

  • Assessoropleidingskursusse sal aangebied word.

  • Assesseringsriglyne sal aan alle skole gestuur word.
4.2 Spesifieke strategie vir die Grondslagfase (Graad R tot 3)

‘n Reeks HNKV-verwante kursusse vir die Grondslagfase sal van die OBOS verkry kan word om die nasionale implementeringsproses te bevorder en waarde daaraan toe te voeg:

4.2.1 Vir prinsipale en SBS’e:
4.2.1.1 “Bestuur die HNKV in u skool” (vanaf Junie 2003)
Dit sal aspekte soos die opstel van roosters, die seleksie van leerderondersteuningsmateriaal (LOM), en menslike hulpbronontwikkeling insluit.
4.2.1.2 Daarbenewens sal die Kaapse Onderwysinstituut 2-weekkursusse vir gekeurde prinsipale in die loop van 2003 aanbied.
4.2.2

Vir onderwysers:

  • ‘n Oriënteringswerkswinkel (deurlopend vanaf die eerste kwartaal 2003)

  • Leerareawerkswinkels (deurlopend vanaf Mei 2003)

  • Kruiskurrikulêre werkswinkels (deurlopend vanaf Mei 2003)

  • Effektiewe gebruik van LOOM en bronne in die klaskamer (deurlopend vanaf die derde kwartaal 2003)

  • Werkswinkels in klaskamerorganisasie en bestuur (deurlopend na derde kwartaal 2003)

    • Hierdie kursusse en werkswinkels sal opvoeders in staat stel om in detail by die HNKV betrokke te wees en ‘n gesonde basis te ontwikkel waarvandaan gepaste leerprogramme ontwerp kan word.
    4.2.2.2 Daarbenewens bied die Kaapse Onderwysinstituut deurlopend in 2003 kursusse in Wiskunde en leesonderrig aan vir gekeurde grondslagfaseopvoeders.
    4.2.3 Skole word aangeraai om hulle OBOS’e se Hoofkurrikulumadviseur te kontak vir verdere inligting rakende die tyd en wyse waarop die OBOS hierdie werkswinkels sal aanbied.
    4.2.4 Daar word van elke prinsipaal verwag om akkuraat boek te hou van alle oriëntering, opleiding en personeelontwikkeling wat ten opsigte van die HNKV deur opvoeders onderneem is. Personeelontwikkeling ten opsigte van die HNKV moet gekoppel word aan die Ontwikkelingsassesseringstelsel- (OAS-) proses.

    5. OPLEIDING (NASIONALE DEPARTEMENT VAN ONDERWYS) VIR DIE GRONDSLAGFASE (Graad R tot 3) - JUNE/JULIE VAKANSIE
    5.1 Alle opvoeders sal in die Junie/Julie vakansie ‘n werkswinkel wat hulle sal oriënteer ten opsigte van die HNKV en die ontwikkeling van leerprogramme moet bywoon. Hierdie werkswinkel sal 5 dae duur. Dit sal onderwysers voorsien van konkrete, praktiese ervaring in die ontwikkeling van leerprogramme ingevolge die vereistes van die HNKV-faseplan, -jaarskedule en -werkeenheid. Die werkswinkel sal aanvullend tot die WKOD-kursusse wees en sal hulle nie dupliseer nie.
    5.2 Daar sal van SBS’e verwag word om ‘n werkswinkel oor kurrikulumbestuur by te woon.
    5.3 Hierdie werkswinkels is ontwikkel deur die nasionale Departement van Onderwys vir nasionale implementering. ‘n Provinsiale kernspan van opleiers sal as fasiliteerders funksioneer.
    5.4 Skole sal vroeg in die tweede kwartaal inligting rakende die datums en reëlings van hierdie werkswinkels ontvang. Opvoeders met beplande, onvermydelike verpligtinge sal geakkommodeer word. Skole word versoek om te wag vir die besonderhede in die volgende omsendbrief voordat hulle met hulle OBOS in verbinding tree.
    5.5 Prinsipale moet seker maak dat alle betrokke onderwysers hierdie kennisgewing van werkswinkels wat in die Junie/Julie vakansie gehou gaan word betyds sal ontvang.

    6. ROL VAN SKOLE IN DIE VOORBEREIDING VIR DIE IMPLEMENTERING VAN DIE HNKV

    Daar is sekere stappe wat skole moet volg in hulle voorbereiding vir die implementering van die HNKV:

    6.1 Prinsipale en SBS’e moet beide die WKOD-oriënteringsprogram en die nasionale Departement van Onderwys se werkswinkel oor kurrikulumbestuur bywoon.
    6.2 Van alle prinsipale word verwag om
    6.2.1 'n oudit onder opvoeders uit te voer wat sal aandui waar kundigheid en behoeftes lê,
    6.2.2 'n plan vir die professionele ontwikkeling van alle opvoeders op te stel,
    6.2.3 opvoeders by te staan met die keuring van kursusse van die WKOD-reeks,
    6.2.4 verseker dat opvoeders die verpligtende oriënteringsessie wat deur die Provinsiale Kernopleidingspan gedurende die Junie/Julie vakansie aangebied word, bywoon,
    6.2.5 te toon dat opvoeders bevoeg gemaak is waar daar nuwe inhoud in die leerareaverklarings is.
    6.3 Prinsipale moet interne kurrikulumstudiegroepe stig wat die HNKV krities lees en bespreek en ‘n begrip ontwikkel van die filosofie en die vereistes van die HNKV.
    6.4 Prinsipale moet tyd toewys en ondersteuningsmaatreëls implementeer om aan opvoeders voldoende geleentheid te bied om aan professionele ontwikkeling met betrekking tot die HNKV te werk.
    6.5 Skole kan leiding, ondersteuning en kanale van kommunikasie vind op die
    WKOD-Kurrikulumwebtuiste by (http://curriculum.wcape.school.za).

    7. SLOTSOM

    Die suksesvolle implementering van die HNKV as ‘n nasionale kurrikulum hang af van gedeelde begrip en voldoende voorbereiding.

    Die WKOD wil graag beklemtoon hoe belangrik dit vir alle skole is om aan bogenoemde prosesse deel te neem sodat ons saam kurrikulumverandering en -implementering tot voordeel van al ons leerders kan hanteer. Ons wil graag prinsipale en onderwysers bedank vir hulle ondersteuning in hierdie verband.

    Hoofde van onderwysinrigtings word versoek om seker te maak dat die inhoud van hierdie omsendbrief onmiddellik onder die aandag van alle opvoeders gebring word.



    GETEKEN: R.B. SWARTZ
    HOOF: ONDERWYS
    DATUM: 2003:03:23